Nikamonan 50 - Ojibwe Kihcimasina'ikan

Tepwe Keshi'anami'aankipan

¹ Maawac meshkawentaakositc Kishemanitoo kaaTipenciketc kiih⁠kiikito; eh⁠kanootank enikohkwaanik ahki eshi moohka'aminitc kiisihsoon, piinihsh weti eshi pankihshimonitc.

² Mii hsa 'iwe Kishemanitoo wenci waahsenaakositc Saayan (Zion) ecikaatenik, ootenaank maawac kaa⁠kiishi minonaakwaninik.

³ KiKishemanitoominaan hsa piishaa, kaawiin ci⁠manaa noontaatitc; ishkoteni hsa ani niikaaniimakanini, waahkaaya'ii itahsh wiinke kohtaanentaakwanini e⁠kihci nootininik.

⁴ Okanootaan hsa kiishik, ahkiini kaye, ci⁠kanawaapamikotc ewiih tipaahkonaatc opimaatisiima'.

⁵ Mii hsa ehkitotc “Ampeyohk ohko naasihkawihshik kiinawaa kaa⁠tipeniminakook, kiinawaa kaakii oshihtamawiyek ahshotamaatiwin kiih⁠pakitinaahsoyek.”

⁶ Kiishik hsa tipaacimoomakanini Kishemanitoo eh⁠kwayahkwaatisitc, wiin iko i'i e⁠ishi onentank.

⁷ “Nimpimaatisiimak, noontawihshik o'o kaa'ininakook, kiinawaa Isriyalak kaawiih kishii kanooninakook, niin ohsha Kishemanitoo, kiKishemanitoomiwaa.

⁸ Kaawiin wiin kaa⁠onci kihci nooci'inakook eshi pakitinaahsoohtamawiyek, kaa⁠pakitinamawiyek kaye kaa‑ankwaahkisikaatekin tino enaahsamiiyaan.

⁹ Kaawiin niwii otaahpinaahsiik kipishihkiimiwaak eyaawaatc kitaya'aawihshiiwikamikowaank, maanatihkwak kaye eyaawaatc eshi kipa'wekwaa.

¹⁰ Kahkina ohsha entahshiwaatc aya'aawihshak niin nintipenimaak, pishihkiwak kaye eyaawaatc mitaahswaahk waciihkaank.

¹¹ Ninkihkenimaak ohsha kahkina pinehshiinshak eyaawaatc waciihkaank, kahkina hsa ko kekoon wehkawiimakahk mihshawahkamik niin nintipentaan.”

¹² “Kiishpin hsa noonteskateyaampaan, kaawiin kitaa wiintamawihsinooninim; niin iitok nintipentaan kahkina ahki, kahkina kaye kekoon i'imaa eyaak.

¹³ Nintaa miiciwaan ina owiiyaahsiwaa aape pishihkiwak, ci⁠minihkwewakipan kaye aape maanatihkwak omiskwiimiwaa?

¹⁴ Taka pakitinaahsoohtamawihk Kishemanitoo miikwehc ci'inek, ishihcikewaahk kaye kaakii ahpimonotawekipan Maawac Eshpentaakositc.

¹⁵ Kanooshihshiihkek itahsh ahpii kiishikahk otihsikoyek maanshihsewin, kika naatamawininim itahsh ahpii, miihsh ci⁠kihtenimiyek,” ihkito Kishemanitoo.

¹⁶ O'o tahsh wiin kaaTipenciketc otinaa' mecaatisinitc, “Kitoopapaamisiwiniw ina ci⁠wiintamampan nintoonahshowewinan, ci⁠tashintamampan kaye ahshotamaakewin kaakii oshihtooyaampaan?

¹⁷ Kishiinkentaan iitok kii⁠kihkino'amawinaan ke⁠ishihcikeyampan, kitootaanaamink inahke e⁠ishiwepinaman nintihkitowinan!”

¹⁸ “Kii⁠waapamatc kaye kemoocishkitc kiwiiciiwaak, kinanamaayenimaak kaye peshikwaatisiwaatc.

¹⁹ Noociko kaye kitinaapacihtoon kitoon eh⁠kiiwanimowaakeyan, e⁠nanihciihsiwan ci⁠kiiwanimoyan.

²⁰ Mooshak iko kaye e⁠maci tashimatc tipinawe kiicihkiwensi, noociko e⁠inaacimatc.

²¹ Mii hsa owe eshihcikeyan, kaawiin itahsh kipapaamimihsinoon, miihsh enenimiyan iinsan kaa⁠inaatisiyan e⁠ishi'ayaayaan. Kiwii kihci nooci'in itahsh weweni piko enaahsamiiyan ewii anaamiminaan.”

²² “Naanaakatawentan itahsh o'o kiin weniihkenotawatc Kishemanitoo, komaahsh iko kaye kika piihsipinin, kaawiin itahsh awiya ta‑ayaahsii kenaatamawihk.

²³ Awiya hsa kaa⁠pakitinaahsotc onci e⁠miikwehciwenimitc, mii hsa awe kaa⁠kihtenimitc, miihsh eshi naakohciketc eh⁠kwayaancihtootc ke⁠onci waapanta'ak eshi pimaaci'iwenitc Kishemanitoon.”