Nikamonan 46 - Ojibwe Kihcimasina'ikan

Kishemanitoo Ewiiciiwinank

¹ Kishemanitoo kaa⁠naacipa'iwaanank, wiin iitok kaa⁠miininank ke⁠onci soonkisiwank, mooshak e⁠kiishiitc ewi wiici'iwetc ahpii maanshihsenaaniwaninik!

² Kaawiin tahsh kika sekisihsiimin mihsawaa ko ahki wahkawihsek, mihsawaa ko kaye kihci waciin ishi shooshkohsekin naawakaam kaashi kiishkayawaanik kihcikamiink;

³ mihsawaa ko kaye kihcikamiin kihci inweweyaakamaashkaakin, kihci waawaahsaashkaakin kaye, mihsawaa ko kaye kihci waciin kihci oncaanimihsekin!

⁴ Ayaa hsa siipi pemiciwank kaa⁠onci minwentaakwahk i'i Kishemanitoo kaa⁠kihtentaakwaninik okihci ootenaam. Mii iitok i'imaa eshitaatc wiin Maawac Kaa⁠ishpentaakositc!

⁵ Kishemanitoo hsa i'imaa ayaa piinci kihci ootenaank; kaawiin tahsh wiihkaa ta⁠nihshiwanaacihcikaatehsinini; Kishemanitoo hsa wiipa kikishep oka naatamawaataan.

⁶ Kaa⁠pepahkaanwewaanakisiwaatc pemaatisiwaatc hsa kihci noontaakosiyaanimisiwak; okimaawiwinan kaye ani nihshiwanaacihcikaatewan; Kishemanitoo hsa kiih⁠kiikitotc mii 'i eshi ninkitek ahki.

⁷ KaaTipenciketc kaaMaawaci mashkawisiitc ohsha kiwiiciiwikonaan; Cekap (Jacob) oKishemanitooman iitok kaa⁠naacipa'iwaanank!

⁸ Inashke ampeyohk, waapantamowaahk aaniin kaaTipenciketc kaapi ishihciketc, aaniin kaye kaa⁠ishi nihshiwanaacihciketc o'omaa ahkiink.

⁹ Okipihtinaanan kaye kahkina kaa⁠miikaatinaaniwaninikin misiwe o'omaa ahkiink; opoohkonaa' mihtikwaapii', ciipowepinikanan kaye onihshiwanaacihtoonan, nakaa'ikanan kaye otankwaahkisaanan.

¹⁰ Miitahsh ehkitotc, “Koshkwaawaaci'ayaak, kihkentamok niin eh⁠Kishemanitoowiyaan. Niin nintishpentaakos mekweya'ii kaashi ayaawaatc kaa⁠paapahkaanwewaanakisiwaatc pemaatisiwaatc, niin kaye nintishpentaakos misiwe ahkiink.”

¹¹ KaaTipenciketc kaaMaawaci mashkawisiitc ohsha kiwiiciiwikonaan; Cekap oKishemanitooman iitok kaa⁠naacipa'iwaanank.