Nikamonan 37 - Ojibwe Kihcimasina'ikan

Ke'ishihsewaatc Meci'ishiwepisiwaatc, Kaye Menwaatisiwaatc

Mii 'oweni Peshik Tepit Onikamon

¹ Keko onci mikoshkaatentanken i'i meci'ishiwepisiwaatc, keko ayeshenimaahkekwaanik anoociko eshihcikewaatc.

² Taapishkoo ohsha kaashi paahtek mashkohsi, wiipa ta⁠ishinaakosiwak, ta⁠nipowak taapishkoo kaashi nipoomakahkin nehtaawikinkin.

³ Tepweyenim kaaTipenciketc, minotootan kaye, ishitaan i'imaa ahkiink weweni pisaan ci⁠maminotaayan.

⁴ Nanaantone'an ci⁠onci mocihkentaman i'imaa kaaTipenciketc eshi'ayaatc, kika miinik itahsh eshi mihsawentamowatc kite'ink.

⁵ Ishi pakitinamaw kitishihtwaawin kaaTipenciketc; tepweyenim miitahsh o'o ke⁠isihciketc,

⁶ oka ishihtoon hsa kikwayahkwaatisiwin taapishkoo kiih⁠piitaapahk shikwa kwayahk kitootaakewin cishi saakaahtenaakwaninik taapishkoo kaa⁠ishinaakositc kiisihs kii⁠naawahkwek.

⁷ Koshkwaawaaci'ayaan enaahsamiitc kaaTipenciketc, shashiipentan ci⁠pii'atc; keko onci mikoshkaatentanken kii⁠minohsetc macaatisitc, ahpii kii‑ishihcikewaatc eshi maci'inentamowaatc.

⁸ Keko nishkaatisihken, keko kaye mikoshkaatentanken, meci kekoonink iitok i'i ishiwishiwemakan.

⁹ Mecaatisiwaatc hsa ta⁠pooni ayaawak, iki tahsh wiin ehpenimonotawaawaatc kaaTipencikenitc ta⁠tipinawewisiwak i'i ahki.

¹⁰ Aahpici hsa wiipa ta⁠ishihseni ci⁠kihkentaakosihsikwaa mecaatisiwaatc, aana weweni nanaantone'watwaa kaawiin kika mihkawaahsiik.

¹¹ A'a hsa wiin tepahsenimotc ta⁠tipinawewisi ahkiini, ci⁠kihci caciihkentank pisaan ci⁠ayintaatc.

¹² Mecaatisitc hsa inentam kekoon ewiih tootawaatc kweyahkwaatisinitc, e⁠matwentank wiipitan e⁠nishkenimaatc.

¹³ KaaTipencikenitc itahsh omihci paahpi'ikoon, aaniihsh okihkentamini aasha kekaa e⁠ocihcihsenik ci⁠nana'ahsikotc.

¹⁴ Mecaatisiwaatc itahsh okitinaanaawaan opashipa'ikewihkomaaniwaan, otooninaawaa' kaye omihtikwaapiiwaa' ewiih pimocikewaatc ewii nihsaawaatc kaa⁠koohpaatisinitc, ketimaakisinitc kaye, ewii nihsaawaatc i'i kwayahk enaatisinitc.

¹⁵ Wiinawaa piko opashipa'ikewihkomaaniwaan ci⁠shapohsenikin ote'iwaank. Ta⁠poohkohsewa' kaye omihtikwaapiiwaa'.

¹⁶ Nawac hsa niipiwa' inentaakwanini pankii kekoon kaa‑ayaatc kweyahkwaatisitc, ahpiihc wiin eshi kihci wenootisitc mecaatisitc;

¹⁷ ta⁠piikonikaateni hsa eshi mashkawisiiwaatc mecaatisiwaatc; kaaTipenciketc itahsh wiin oka kanawenimaan kweyahkwaatisinitc.

¹⁸ KaaTipenciketc hsa okihkentaan eshi kiishikanihshinitc kekoon eshi anaamentaakosihsinik, ke⁠tipinawewisinitc kaye ci⁠nehpici ayaanik.

¹⁹ Kaawiin hsa ta⁠maanshihsehsiiwak ahpii kihci ishiwepaninik; ta⁠wenoocihsewak kaye ahpii noontehsenik miicim.

²⁰ Meci'ishiwepisiwaatc itahsh wiin ta⁠nihshiwanaatisiwak; kaaTipenciketc kaa⁠shiinkenimikotc hsa mii 'i eshi minonaakosinitc taapishkoo waapikwaniin, miihsh eshi ankonaakwaninikin taapishkoo kaa⁠paashkinek.

²¹ Macaatisitc hsa kii⁠masina'amaaketc kaawiin kiiwe tipa'ikehsii, kweyahkwaatisitc itahsh wiin kaawiin manaaci miikiwehsii.

²² I'i hsa kaaTipenciketc shewenimaatc ta⁠tipinawewisiwa' ahkiini, i'i tahsh mecakimaatc ta⁠pooni ayaawa'.

²³ KaaTipenciketc hsa okihkinowinaan ininiwan aanti nahke ke⁠ishaanitc, okanawenimaa' kaye i'i menwaapamaatc.

²⁴ Mihsawaa ko pisokehshininitc, kaawiin ta⁠pankihshinsiwan, aaniihsh kaaTipenciketc otaahsonaan.

²⁵ Ninkii oshkaatis ihsa keniin, noonkom itahsh aasha nintahkiwensiiw; shaakooc itahsh kaawiin nimpimi waapamaahsiik kweyahkwaatisitc inini ci⁠wepinintc, oniicaanihsa' kaye ci⁠pakohshi'iwenitc pahkweshikan.

²⁶ Miiwak ihsa oko tino pemaatisiwaatc pisaan kaa⁠mihci awi'iwewaatc kekoon; oniicaanihsiwaa' kaye ta⁠shawentaakosiwa'.

²⁷ Nakatan macikekoon, wenishihshik ci⁠noocihtooyan; miitahsh kipiiwesiimak mooshak iko ta⁠ishitaawak i'imaa ahkiink.

²⁸ KaaTipenciketc hsa osaakihtoon kweyahkwentaakwaninik, kaawiin kaye owepinaahsii' pemaatisinitc tepinawewisitc; nehpic hsa ko okanawenimaa'. Oniicaanihsini itahsh i'i mecaatisinitc ta⁠pooni ayaawa'.

²⁹ Kweyahkwaatisiwaatc hsa ta⁠tipinawewisiwak ahkiini, nehpic iko ci⁠taanotamowaatc.

³⁰ Kweyahkwaatisitc hsa wiinke kakiihtaawikiishwe kiih⁠kiikitotc, weweni kaye ishikiishwe.

³¹ Ote'ink hsa ayaani Kishemanitoon otinaahkonikewinini; kaawiin ta⁠pihshikwiihsii.

³² A'a tahsh kweyahkwaatisitc otahkamaakoon mecaatisinitc ewiih kakwe nihsikotc.

³³ Kaawiin itahsh oka pakitinikohsiin kaaTipencikenitc ci⁠tepinikotc ini meshkawisiinitc kaa⁠shiinkenimikotc, kaawiin kaye oka pakitinikohsiin ci⁠shaakootaahkonintc ahpii tipaahkonintc.

³⁴ Pii' kaaTipenciketc, kanawentamow otishihtwaawin; kika miinik hsa ci⁠tipinawewisiwatc ahkiini ci⁠naakohtootc ekihtenimihk, kika waapamaak itahsh meci'ishiwepisiwaatc ninkoci ci‑inaamohkaanintwaa.

³⁵ Ninkiih pimi waapamaa hsa meci ayaatc kekwaanihsakisitc kaye inini e⁠ani misihtekitc taapishkoo mihtik otahkiimink kaashi minokitc.

³⁶ Wiipa tahsh tani poonihse, kaawiin ta⁠kihkentaakosihsii; aanakii nanaantawaapamak, kaawiin ninkii mihkawaahsii.

³⁷ Inashke kihkinawaasaapamihk inini kekoon eshi anaamentaakosihsik, a'a kaye kweyahkwaatisitc; pisaan hsa a'a tino inini tani pimaatisi.

³⁸ Mecaatisiwaatc itahsh wiin kahkina ta⁠nihshiwanaacihcikaniwiwak; ta⁠poonihsehcikaateni hsa kekii ani ishi pimaatisiwaahpan.

³⁹ KaaTipenciketc hsa kaa⁠pimaaci'aatc kweyahkwaatisinitc, wiin kaye kaa⁠naatamawaatc ahpii kii⁠otihsikonitc maanshihsewin.

⁴⁰ KaaTipenciketc kaa⁠wiici'aatc, wiin kaye kaa⁠naatamawaatc; aaniihsh onaacipa'iwaanikoo', miihsh kaa⁠onci naatamawaatc, wenci shaapwii'aatc kaye ci⁠papaamenimikohsinik mecaatisinitc.