Nikamonan 33 - Ojibwe Kihcimasina'ikan

Miikwehciwinikamon

¹ Ciihkentamok hsa ci⁠nikamoohtawek kaaTipenciketc, kiinawaa kaa⁠kwayahkwaatisiyek; mii iitok nehtaa ishihcikewaatc kweyahkwaatisiwaatc.

² Miikwehciwenimihk kaaTipenciketc kitohcikan matweyaapiikipicikan ci⁠aapaci'ek; kitohcikehtamawihk kaaTipenciketc ci⁠aapaci'ek kaa⁠mitaahsweyaapihkaasotc matweyaapiikipicikan.

³ Oshki nikamon nikamoohtawihk; mamasinwewemohciken ci⁠tako shaakoweyan ehpiihci minwentaman.

⁴ Ehkitotc hsa kaaTipenciketc kwayahkwanini, tepwewanini kaye; tepweyentaakwanini kaye kahkina eshihciketc.

⁵ KaaTipenciketc ohsha osaakihtoon kwayahkohcikewin, weweni kaye inaahkonikewin; ominotootaakewin hsa mooshkine entaakwanini misiwe o'omaa ahkiink.

⁶ KaaTipenciketc ohsha otihkitowinink kii⁠onci oshihcikaate kiishik, eshi saakitanaamotc kii⁠onci oshihcikaniwiwak kahkina wanankohshak.

⁷ Peshikwanonk hsa okii ishi maawantoonaanan kihcikamiin, kaa⁠kiishkayawaanik e⁠ishi na'inank ahtaahsowikamikonk.

⁸ Taka kahkina kekoon eyaanik o'omaa ahkiink oka kohtaanenimikoon kaaTipenciketc; taka kahkina kaye pemaatisinitc o'omaa ahkiink eyaanitc oka anami'e kohtaanenimikoo'!

⁹ Kaakii ihkitotc hsa ko kii‑ishinaakwanini; enanoohkiitc hsa ko kahkina kekoon kii‑ishinaakwanini.

¹⁰ KaaTipenciketc hsa opiikonaan eshi onentaminitc entahswewaanakisinitc pemaatisinitc, owanashkwe'aa' kaye waa⁠ishihcikenitc pemaatisinitc.

¹¹ KaaTipenciketc itahsh wiin eshi onentank nehpic ta⁠pimihseni, waa⁠ishihciketc kaye nehpic tani ayaani.

¹² Ta⁠shawentaakosiwak hsa pemaatisiwaatc weKishemanitoomiwaatc kaaTipencikenitc, pemaatisinitc wiin iko kaaTipenciketc kaakii onaapamaatc ewiih tipinawewisitc.

¹³ Kihcikiishikonk hsa kaaTipenciketc onsaapi eh⁠kanawaapamaatc kahkina pemaatisinitc.

¹⁴ Eshitaatc hsa ko otoosaapamaa' kahkina o'omaa ahkiink pemaatisinitc.

¹⁵ Wiin iitok kaa⁠oshihtootc kahkina enentaminitc, okihkentaan kaye kahkina eshihcikenitc.

¹⁶ Kihciokimaa hsa kaawiin onci shaapwii'aahsii entahshinitc oshimaakanihshiima', shimaakanihsh kaye kaawiin onci shaapwiihsii otahpiihciiwinink.

¹⁷ Kaawiin kekoon inaapatahsinini kii⁠ahpenimonotawintc mihtatim ci⁠shaakoocihtwaatc; aana mashkawisiitc, kaawiin hsa okashkihtoohsiin ci⁠pimaaci'iwetc.

¹⁸ KaaTipenciketc hsa onaanaakasaapamaa' kaa⁠kohtaanenimikotc, i'i ehpenimonotaminitc ominotootaakewin,

¹⁹ ci⁠pimaaci'aatc ci⁠nipohsinik; onaakaci'aa' ci⁠pimaatisinitc mekwaa kii⁠noontehsenik miicim.

²⁰ KaaTipenciketc hsa kipii'aanaan; wiin hsa kaa⁠wiici'inankitc, kaa⁠naatamawinankitc kaye.

²¹ Wiin hsa kaa⁠onci minwentamank kite'inaanink aaniihsh kitepweyentamowaamin kehtentaakwaninik owiinsowin.

²² Oo Tepencikeyan, taka kiminotootaakewin ninka mayaawishkaakomin, mayaa hsa kaashi ahpenimonotaakooyan.