Nikamonan 31 - Ojibwe Kihcimasina'ikan

Keshi'anami'aank Wiihtepweyenimintc Kishemanitoo

Mii 'oweni Peshik Tepit Onikamon

¹ Oo Tepencikeyan kiin hsa kaa⁠naacipa'iwaaninaan; keko pakitinishihken ci⁠akaci shaakooci'ikooyaan. Kikwayahkwaatisiwinink hsa ishi naatamawihshin.

² Noontawihshin hsa, weyiip piishaan cipi naatamawiyan. Ahsin kaa⁠naacipa'iwaanak iitok kitinow, kaa⁠soonkihcikaatek ahpa'iwewikamik ci⁠naatamawiyan.

³ Kiin iitok ahsiniink kitinenimin eh⁠tepweyeniminaan, nintahpa'iwewikamik kitinenimin kaye, kiwiinsowinink hsa onci niikaaniihtamawihshin, onci kihkinowinihshin kaye.

⁴ Kanawenimihshin hsa ci‑ishaahsiwaan kaakii onahcikaatek waa⁠onci kaahcitinikooyaan, kiin iitok kaa⁠naacipa'iwaaninaan.

⁵ Kininciink hsa nintishi pakitinaa nintahcaahk; oo Tepencikeyan tepwe eshi Manitoowiyan, pimaaci'ihshin!

⁶ Kaawiin hsa niminwenimaahsiik kehciwenimaawaatc kekoon enentaakosihsinik manitoohkaana'; niin itahsh kaaTipenciketc ninka tepweyenimaa.

⁷ Ninka minwentaan hsa, ninka ciihkentam kaye eh⁠saaki'iyan, kiwaapantaan iitok eshi kakwaatakihseyaan, kikihkentaan kaye eshi kakwaatakentamaan nintahcaahkonk.

⁸ Kaawiin hsa kaye mahshi kitishi pakitinihsii eshi'ayaawaatc kaa⁠shiinkenimiwaatc; kiin hsa ko kitishi pakitinihsh eshi mankitawaak aanti piko waa⁠ishaayaan ci‑ishaayaan.

⁹ Oo Tepencikeyan, koohpaatenimihshin, etatawe ohsha niwahsitaawihse; Wiinke ohsha nintishkicaap ehpiihci mooshak mawiyaan; wiinke kaye aasha nincaakii.

¹⁰ Maanentamowin hsa aasha nincaakaahpinanikon, eh⁠moohkoneyaan hsa wenci tahkwaak nimpimaatisiwin; miitahsh kaye wenci niinamisiyaan onsaam eh⁠kakwaatakihtooyaan, nihkanan kaye kaani onci niinamahkin.

¹¹ E⁠ayaawaatc hsa kahkina kaa⁠shiinkenimiwaatc, mii hsa 'i wenci maanenimikooyaan, memintake ko niwiicitaamaakanak; eh⁠koshiwaatc seyaaki'iwaatc, eh⁠maaciipa'iwaashiwaatc iki kaa⁠waapamiwaatc miihkanaahkaank.

¹² Miihsh eshi waniihkenotaakooyaan taapishkoo kaa⁠nipotc kaa⁠tootawintc, e⁠inenimikooyaan taapishkoo kaa⁠piikoshkaak waapikani aapacihcikan.

¹³ Ninoontam ohsha eshi'ayaanomiwaatc kaa⁠paahtiinowaatc, misiwe waahkaaya'ii inahke e⁠ishi naniisaanentamaan. Maamaw ohsha inentamotokenak kekoon ewii onci nihshiwaatc.

¹⁴ Oo Tepencikeyan, shaakooc itahsh niin kitepweyenimin, e⁠ihkitoyaan, “Kiin hsa ninKishemanitoom!”

¹⁵ Kiin hsa mooshak kikanawentaan nimpimaatisiwin; shaapwii'ihshin onci kaa⁠shiinkenimiwaatc, iki kaye kaa⁠kakwaataki'iwaatc.

¹⁶ Taka minwaapamihshin kiih⁠kanawaapamiyan kitanohkii'aakan tenowiyaan; kiminotootaakewinink inahke ishi pimaaci'ihshin.

¹⁷ Oo Tepencikeyan, kikanoonin, keko pakitinishihken ci⁠akaci shaakooci'ikooyaan; taka iki kaa⁠macaatisiwaatc ta‑akaci shaakooci'aawak, ci⁠noontaatihsikwaa ci⁠ayaawaatc eshi'ayaanitc neponitc.

¹⁸ Taka tootaw kaa⁠kakiinawishkiwaatc ci⁠noontaatihsikwaa, kahkina kehci inenintisowaatc, kaa⁠miihkinsomaawaatc kweyahkwaatisinitc sesik e⁠inaahsikwaa.

¹⁹ Etatawe hsa maamahkaatentaakwan kiminohcikewin, kaa⁠kanawentamawatwaa kwehtaanenimihkwaa! Kahkina hsa entahshiwaatc awiyak oka waapantaanaawaa eshi kanawenimimatc i'i kaa⁠naacipa'iwaanimihk.

²⁰ Kiin hsa piko eshi'ayaayan kitishi aakooshkawaak ci⁠tepinikohsikwaa waah⁠tootaakowaatc pemaatisinitc; eshitaayan hsa kitishi aakooshkawaak ci⁠tepimaahsiwintwaa enaahpinemikowaatc kaa⁠shiinkenimikowaatc.

²¹ Taka ta⁠miikwehciwentaakosi kaaTipenciketc, wiin ohsha kaakii waapanta'itc kaa⁠maamahkaatentaakwaninik osaaki'iwewin kii‑inentaakosiyaampaan taapishkoo kihci ootena kaa⁠waahkaashkikaatek.

²² Miitahsh kaa⁠ihkitoyaampaan eh⁠koshkwentamaan, “Mii hsa 'i kaawiin awahshime kinaanaakaci'ihsii ci⁠kanawenimiyampan!” Shaakooc itahsh kikii noontaw eh⁠shaakowaaninaan ci⁠koohpaatenimiyan, ci⁠wiici'iyan kaye.

²³ Saaki'ihk kaaTipenciketc, kiinawaa kahkina kaa⁠tipinawewisiiminek! KaaTipenciketc ohsha okanawenimaa' kaa⁠tepweyentaakosinitc, otashe wepinaa' itahsh wiin kaa⁠kihci inenintisonitc.

²⁴ Mashkawi'ayaak, mashkawentamok kaye kite'iwaank, kiinawaa kahkina ehpenimonotawek kaaTipenciketc!