Nikamonan 24 - Ojibwe Kihcimasina'ikan

KaaTipenciketc Ehtipentank Kahkina Kekoon

Mii 'oweni Peshik Tepit Onikamon

¹ KaaTipenciketc hsa otipentaan ahkiini, kahkina kaye kekoonan i'imaa kaa‑ayaanikin. Otipentaan kaye misiwe o'o ahkiini, kahkina kaye o'omaa kaa⁠tashi pimaatisinitc.

² Kihcikamiink iitok okii ishi oshihtoon, nipiihkaank hsa okii ishi aayiitahkitoon ahkiini.

³ Awenen tahsh ke⁠ishaapan kaashi pihkwatinaanik, eshi'ayaanitc kaaTipencikenitc? Awenen itahsh kaye ke⁠niipawihpan weti otanami'ewikamikoniink kaaTipencikenitc?

⁴ A'awe hsa ehta kaa⁠pehkentaakwaninik otishihcikewin kaye kaa⁠pehkentank kaa‑anami'ehtawaahsik manitoohkaana', anihshaa kaye kaashi ahshotamaakehsik.

⁵ Mii hsa awe ke⁠shawenimikotc kaaTipencikenitc, mii kaye a'awe ke'ikotc Kishemanitoon kekoon eshi anaamentaakosihsik.

⁶ Miiwak hsa iki tino pemaatisiwaatc kaapi naasihkawaawaatc Kishemanitoon, kaa⁠pishaawaatc eshi'ayaanitc Cekapoon (Jacob) oKishemanitoomini.

⁷ Taka kihci ishkwaanteman ta⁠mankate paahkinikaatewan, ini kaye kehte ishkwaanteman ta⁠paahkinikaatewan, ci⁠piintiketc kaa⁠kihci inentaakositc kihciokimaa.

⁸ Awenen tahsh a'a kaa⁠kihci inentaakositc kihciokimaa? Mii hsa awe kaaTipenciketc kaa⁠soonkisitc, kaa⁠maskawentaakositc kaye, kaaTipenciketc hsa kaa⁠mashkawentaakositc kii⁠miikaasotc.

⁹ Taka kihci ishkwaanteman ta⁠mankate paahkinikaatewan, ini kaye kehte ishkwaanteman ta⁠paahkinikaatewan, ci⁠piintiketc kaa⁠kihci inentaakositc kihciokimaa.

¹⁰ Awenen tahsh a'a kaa⁠kihci inentaakositc kihciokimaa? Mii hsa awe kaaMaawaci mashkawisiitc kaaTipenciketc; mii ohsha'a kaa⁠kihci inentaakositc kihciokimaa.