Nikamonan 148 - Ojibwe Kihcimasina'ikan

Kahkina Kekoon Eyaak Kaye Awiyak Kiihkanoonaawak Cimiikwehciwenimaawaatc KaaTipencikenitc

¹ Nanaahkomihk kaaTipenciketc! Kiishikonk inahke onci nanaahkomihk, kiinawaa weti kaa⁠ishi ishpentaakwahk e⁠ayaayek, nanaahkomihk!

² Kiinawaa kahkina otencalima' nanaahkomihk, kiinawaa kahkina kaa⁠paahtiinoyek kiishikowi shimaakanihshak.

³ Kiin kiisihs, tipihkikiisihs kaye, nanaahkomihk Tepenciketc kekiinawaa wanankohshak kaa⁠waahsahkoneyek nanaahkomihk kaaTipenciketc!

⁴ I'i hsa ishpikiishik, nipiini kaye eyaanik weti aakwiihtawi ishpimink oka nanaahkomikon kaaTipenciketc.

⁵ Taka miiwan ono ke⁠miikwehciwentaminitc kaaTipenciketc owiinsowin! Wiin iitok kaakii anoohkiitc, miihsh kaa⁠ishi oshi'imintc.

⁶ Okii nehpici onahsaa' hsa keshi ayapinitc; kaakii inaahkoniketc kaawiin wiihkaa ta⁠poonihsehsinini.

⁷ Ahkiink hsa onci nanaahkomihk kaaTipenciketc. Taka kaye kihci aya'aawihsha' eyaanitc anaamiintim, kahkina kaye kaa⁠kishkayawaanik oka nanaahkomikon.

⁸ Kaa⁠waawaahtehsenik, mihkwaminaanan, koonan, wahkwiin kaye, kihci nootin kaye kaa⁠ishihcikemakaninikin ehkitotc,

⁹ kihci waciin, kahkina kaye pehkwatinaanikin, kahkina mihtikoo' nehtaawikihtoonitc miicim, kiishkaahtikoo' kaye,

¹⁰ pikwaci aya'aawisha', kahkina kaye pishihkiwa', kahkina kaye kekoon kaa⁠pimootemakaninik o'omaa ahkiink, kaa⁠pimihsenitc kaye pinehshiinsha'.

¹¹ Kaa⁠kihciokimaawinitc kaye ahkiink, kahkina hsa ko pemaatisinitc; wekimaawentaakosinitc kaye, kahkina kaye otipaahkonike' o'omaa ahkiink;

¹² oshkiniikiwa', oshkiniikihkwewa' kaye, ahkiwensiwa', apinoonciisha' kaye.

¹³ Taka miiwa' o'o ke⁠miikwehciwentaminitc kaaTipenciketc owiinsowin, aaniihsh wiin ehta owiinsowin ishpentaakohcikaateni. Okihci inentaakosiwin nawac e⁠ishpentaakwaninik ahpiihc wiin ahkiini, kiishik kaye.

¹⁴ Wiin iitok okii ontinamawaa' opimaatisiima' ke⁠kihci otookimaaminitc, ci⁠miikwehciwenimikotc kahkina tepinawewisitc pemaatisinitc, Isriyala' (Israel) kaa⁠shawenimaatc ote'ink. Taka ta⁠nanaahkomaa kaaTipenciketc!