Neham 3 - Ojibwe Kihcimasina'ikan

¹ I'i hsa kihci ootena kaashi mooshkinewaatc okakiinawishkak, onihshiwek kaye ta⁠nihshiwanaacihcikaate. Paahtiinat wenootisiwin ci⁠maaciicikaatek, ci⁠mahkantinaaniwank kaye.

² Inashke antohtamok enihtaakwahk! Pahshashe'ikan kaa⁠cooweyaapiikihsek! Kaa⁠tihtipihsewaatc matweyaapihkihsewak! Mihtatimook matwehkamikipahtoowak! Miikaasowi otaapaanaahkwak pimweweyaapihkihshinook.

³ Shimaakanihshak pemiwanepa'ikowaatc moohkiihcikewak, pashipa'ikewihkomaanan, ciipowepinikanan kaye saasaakaahteyaapihkihsewan. Kaa⁠nihsintwaa manki ohkohshinook. Wiiyawimaan misiwe etatawe paahtiinatinoon. Shimaakanihshak opisoshkaanaawaan eh⁠paapaashita'amowaatc.

⁴ Ninipe kihci ootena pihshikwaacihkwenk enentaakwahk ihsa nihshiwanaacihcikaate. Wiinke misawinaakosi, ominonaakosiwin itahsh nipowinink inentaakwanini. Opihshikwaaci minonaakosiwin, kaye tahsh omanitoohkewin otaapacihtoonan ci⁠mihsawenimikotc entahswewaanakisinitc pemaatisinitc, miihsh kaa⁠onci kashki'aatc ci⁠tipenimaatc.

⁵ Miihsh kaaMaawaci mashkawisiitc kaaTipenciketc ehkitotc, “Ninipe, kiwii nana'ahsin. Kiwiih kiicihkonayepinik pisaan ci⁠waapamihkwaa entahswewaanakisiwaatc pemaatisiwaatc ci⁠akatentaakosiyan.

⁶ Kika ahpakitawin hsa kaa⁠maci wiinetaakwahk ci⁠naakohtooyaan e⁠aanaweniminaan. Pemaatisiwaatc itahsh ke⁠waapamihkwaa kika kakwaanihsakenimikook.

⁷ Kahkina awiyak ke⁠waapamihkwaa ta⁠kwehkiiwak ci⁠kakwaanihsakentamowaatc. Miihsh ke⁠ihkitowaatc, ‘Ninipe hsa nihshiwanaasinaakwan. Awenen itahsh inaa ke⁠koohpaatenimikohpan? Aanti ke⁠ontinakwaapan ke⁠kakwe minwentami'ihkwaapan.’ ”

⁸ Ninipe mii na tahsh enenintisoyan nawac kiin e⁠kihci inentaakosiyan ahpiihc Tiipis (Thebes) kihci ootena kaa⁠niikaanentaakwahk i'imaa Iicipahkiink (Egypt). Kewiin iitok okii ayaan siipiini enaatamaakotc taapishkoo waahkaayaapihkinikan kaashi naatamaakemakahk, Naayal (Nile) siipi ecikaatenik.

⁹ I'i hsa kihci ootena Tiipis okiih tipentaanan Soten (Sudan), i'i kaye Iicipahkiini. Omashkawentaakosiwin kaye kaawiin wiihkaa ta⁠wayehkwaahsehsinini. I'i hsa Lipiya (Libya) ahkiini okii wiiciiwikoon.

¹⁰ Shaakooc itahsh pemaatisiwaatc eyaawaahpan i'imaa Tiipis kihci ootenaank waahsa pahkaan ahkiink kii‑ishi maaciicikaniwiwak taapishkoo tahkonaakanak. Entahso pahpahkemonkin miihkanawan kiih⁠tashi naniiwana'waawak apinoonciishak. Ininiwak kaakii niikaanentaakosiwaahpan kii⁠maaciicikaniwiwak sakaapaaneyaapiin ekii tahkopisowaatc, kii⁠ahpakicikenaaniwanini ke⁠onci kihkentaakwahk keshi mamaata'ohkaanitinaaniwiwaatc.

¹¹ Ninipe, kekiin itahsh kika pankihshin taapishkoo okiiwashkwepii kaashi pankihshink. Kika kakwe maaciipa'iwaanaak kaa⁠shiinkenimihkwaa ehkakwe kaasohtawatwaa.

¹² Kahkina hsa kaa⁠soonkihcikaatekin kitootenaamiwaan ta⁠ishinaakwanoon taapishkoo pik tinowaahtik (fig) kaa⁠kiishatihtekin miinan. E⁠wahkawi wepinintc a'a mihtik, mii 'i eshi pankihsinkin miinan, eh⁠piincihsekin okonewimaank.

¹³ Kishimaakanihshiimak ihsa ihkwenk inentaakosiwak. Kitahkiim kaye kaawiin ta⁠kashkihcikaatehsinoon ci⁠naatamaakaatek ahpii wii⁠miikaanihkwaa kaa⁠shiinkenimihkwaa. Ta⁠caakitewan kaye kaa⁠onci kipaahkohsinkin kikihci ishkwaanteman.

¹⁴ Kiishaac itahsh naata'ipiik ci⁠kiishiiyek ahpii kaa⁠shiinkeniminekwaa waahkaashkamowaatc kitootenaamiwaa. Soonkihtook kiwaahkaayaapihkinikaniwaa. Maamaakoshkawihk kaye waapikan cishi piina'wek mihtikomahkahkonk ci⁠oshi'ekwaa kahkahkeyaapihkahsiniik.

¹⁵ Shaakooc itahsh ishkote kika nihsikoom ci⁠caakisoyek, pashipa'ikewihkomaanink kaye kika onci nihsikoom. Mii hsa 'i ke⁠tootaakooyek taapishkoo kihci pahpahkinek kaa⁠nihshiwanaacihtoowaatc eh⁠kitaawaatc kehtikaatenikin. Kikii ani paahtiinom ihsa taapishkoo kihci pahpahkine kaashi paahtiinowaatc.

¹⁶ Kikii ani paahtiino'aawaak ataawewininiwak taapishkoo kaashi paahtiinowaatc wanankohshak ishpimink. Kaawiin itahsh noonkom ayaahsiiwak, taapishkoo kihci pahpahkine kaashi tehsininkwiinitc e⁠maacihsetc.

¹⁷ Iki hsa kishimaakanihshiimiwaak mii 'i enentaakosiwaatc taapishkoo kihci pahpahkinenk e⁠akoosiwaatc aahsamaahtik kii⁠tahkaayaanik. Ahpii tahsh e⁠ani saakaahtenik mii 'i eshi maacihsewaatc. Kaawiin itahsh ci⁠kihkentaakosiwaatc aanti eyaawaakwen.

¹⁸ Kiin itahsh kehciokimaawiyan i'imaa Ahsiiriya ahkiink, kitaanihkewikimaamak ihsa nipowak. Kaa⁠niikaanentaakosiwaatc pemaatisiwaatc kaye nehpici nipaawak. Kipimaatisiimak ihsa ishi ohswe ayaawak kihci waciihkaank, kaawiin itahsh awiyan ayaahsiiwan ke⁠pikiiwewinikowaahpan.

¹⁹ Kaawiin hsa kekoon ayaamakahsinoon ke⁠naatamaakoyampan i'i kaashi wiihsakentaman. I'i kaye kaashi maahki'ikooyan kaawiin kika mino'ayaahsii. Kahkina hsa awiyak ke⁠noontamowaatc aaniin eshi maanshihseyan ta⁠pahpahsinincii'otisowak ke⁠ahpiihci ciihkentamowaatc. Awiya na tahsh kiih⁠shaapwii kaakii ishi nihtaa kakwaanihsakisiyampan?