Neham 2 - Ojibwe Kihcimasina'ikan

Kiihshaakoocihcikaatek Ninipe

¹ Ninipe eyaayek, aasha kipi anta mawine'okoom meshkawisiiwaatc ke⁠shaakooci'inekwaa aasha pi⁠takohshinook. Ahsho naatamaasok ci⁠niipawiwaatc shimaakanihshak wakicaya'ii waahkaayaapihkinikanink. Miihkanaank kaye ishi ahshawaapik. Ahshwiik ci⁠miikaasoyek.

² KaaTipenciketc ohsha owiih tootawaa' Isriyala' ci⁠kiiwe kihci inentaakosinitc kaakii ishinaakosinihpan cipwaa mahkamimintc kahkina kekoon kaakiih tipinawewisinihpan, kahkina kaye kaashi kihtikewaahpan ekii⁠nihshiwanaacihcikaatenikin.

³ Iki shimaakanihshak kaapi anta miikaasowaatc miskwaaniwan onakaa'ikaniwaan, miskohkonayewak kaye. Aasha kiishiiwak. Omiikaasowi otaapaanaahkowaa' wawaahseyaapihkihsewa'. Omihtatimoomiwaa' kaye ocaanimipani'owa'.

⁴ Miikaasowi otaapaanaahkwak hsa papaa kiiwashkwe ayaashawihsewak miihkanaahkaank, e⁠ayaashawihsewaatc i'imaa eshi tawaanik ootenaank. Mii hsa 'i eshinaakosiwaatc taapishkoo ishkotenk, wiinke eh⁠papaakishiihsewaatc taapishkoo kaa⁠waawaahtehsek.

⁵ Miikaasowikimaak aasha kanoocikaniwiwak ci⁠miikaasowaatc, pisokehshinowak eh⁠kaancishkaawaatc. Kaye kishiipa'itiwak e⁠ahpahtoowaatc waahkaayaapihkinikanink miihsh kaye ci⁠oshihtoowaatc keshi aakoohshimoonowaatc ahpii wii⁠aapaci'aawaatc kihci mihtikoon wiih⁠piikowepa'amowaatc waahkaayaapihkinikan.

⁶ Ini hsa kihci ishkwaanteman siipink inahke eyaakin paahkihsewan, kihciokimaawikamik ihsa nihshiwanaacihcikaate.

⁷ Aasha ekii onahcikaatek i'imaa ootenaank kaa‑ayaawaatc ci⁠maaciicikaniwiwaatc. Kaa⁠pamiihtaakewaatc kaa⁠ihkwewiwaatc hsa omiimiihsiink inihtaakosiwak e⁠moohkwentamowaatc, e⁠pahpahkihte'ahkikane'otisowaatc ehminciinawesiwaatc.

⁸ Taapishkoo hsa nipi kaa⁠maaciiciwanihsek kii⁠piikohsek kipa'ikan, mii hsa 'i eshinaakosiwaatc pemaatisiwaatc eyaawaatc Ninipe kihci ootenaank e⁠maaciipa'iwewaatc. Kipihciik! Kipihciik! Ishi shaahshaakowenaaniwan, kaawiin itahsh awiya ciwiih kipihciitc.

⁹ Mahkantwek waapaapihko shooniyaa waapihk! Mahkantwek osaawi shooniyaa waapihk! Kaawiin ta⁠caakihsehsinoon eh⁠paahtiinatink, e⁠mooshkinek kaye wenootisiwin i'imaa kihci ootenaank.

¹⁰ Mii hsa 'i Ninipe e⁠nihshiwanaacihcikaatek, e⁠manshashkonikaatek, aapiinc kekoon e⁠ayaahsinok. Ehpiihci sekisinaaniwank ote'iwaank ishi kawaanimisiwak, okitikowaa' kaye nininkipisowa', keyaapi eh⁠mashkawisiihsikwaa kaye tahsh waapinewisiwak ehpiihtaanimisiwaatc.

¹¹ Aaniinti tahsh i'i noonkom Ninipe kihci ootena mihshipishiw owaashink enentaakwahkipan? Nehtaa ishi tashi ahshamintwaapan mihshipishiwenhsak? Mihshipishiw, noonshe mihshipishiw kaye nehtaa ishaawaahpan, oniicaanihsiwaa' kaye ekii naniisaanisihsinik?

¹² Mihshipishiw hsa onihsaan aya'aawihshan, miihsh eshi piihsipinaatc, e⁠awi ahshamaatc owiiciiwaakanan, oniicaanihsa' kaye; omooshkinahtoon owaash wiiyaahsini kaakiih piihsipitootc.

¹³ Miitahsh o'o kaaMaawaci mashkawisiitc kaaTipenciketc, ehkitotc, “Niin iitok kitaanwaapamininim! Ninka caakiswaak kimiikaasowi otaapaanaahkowaak ci⁠paashkinewaatc. Kishimaakanihshiimiwaak kaye ta⁠nihsaawak entashi miikaatiwintc. Niin kaye kika mahkamininim kahkina kekoon kaakii mahkamekwaa awiyak. Pepaa ihkitowaatc omaaciiyaacimook hsa kaawiin ta⁠noontawaahsiiwak.”