Maarhk 1 - Ojibwe Kihcimasina'ikan

Cwaan Siika'antaakewinini ekii'ishi wiintamaaketc Kishemanitoo otIhkitowin

¹ Mii 'iwe minwaacimowin kaaishi tipaacimintc a'awe Ciisahs Christ weKosihsimikotc Kishemanitoon. Mii'iwe kaaishi maacihsek i'i tipaacimowin,

² mayaa kaa⁠inahtenik otooshipi'ikewin Aaiseya (Isaiah) otipaacimo weshkac kaakiih kanootamawaatc Kishemanitoon. “Niin Kishemanitoo niniikaaninisha'waa niwiintamaakewininiim. Nahkawe kika kwayaancihtamaak miihkana keshi takwihshinan,” ishipii'ikaate.

³ Shikwa kii'‑ihkito Aaiseya: “Matweayaa awiya pikwatahkamikaank eh⁠shaahshaakowetc: ‘Kwayaancihtamawihk omiihkanaam a'a Tepenciketc, ci⁠kwayahkwamoninik keishi pimiayaatc,’ ” ihkitoomakan.

⁴ Paanimaa tahsh a'a Cwaan (John) Siika'antaakewinini kii'⁠naanaakosi i'imaa pikwatahkamikaank. Kii'ishi wiintamaake tahsh e'⁠ihkitotc: “Kwehkipimaatisik, siika'antaasok, Kishemanitoo kika poonentamaakowaa kimacitootamowiniwaan,” kii'‑ihkito.

⁵ Misiwe ko kiihpi onciiwak awiyak i'imaa Cootiiyaawi-ahkiink (Judea) kaye ko i'imaa Ceroosalamiiwi-ootenaank (Jerusalem), ekiih pinaasihtawaawaac ini Cwaanan. Shikwa ekiihpi tatipaatotamowaatc omacitootamowiniwaan, okiih siika'antaakowaan ini Cwaanan i'imaa Cwaartanawi-siipiink (Jordan).

⁶ Shikwa otaakoo'on a'a Cwaan, pihkwaawikanewimihtatim opiiwayink kii'⁠onciimakanini tinowekin kaah⁠kikishkank, ekiih kitimaakinaakositc ekii'-ishi'otc. Shikwa kaye kiih⁠kihcihpiso i'i pashkwekinooni. Shikwa tahsh kii'ishi omiicimimi kihcipahpahkine' ekii'-amwaatc kaye pikwaci aamoowi siinsipaahkwat.

⁷ Shikwa kii'ishi wiintamaake o'owe: “Piayaahpiihtenti hsa piciinak ke⁠pitakwihshink inini, nawac ke⁠ishpentaakositc ahpiihc itahsh niin. A'awe hsa ko kaapi piminisha'otc, inashke ko kaawiin niin kanake ninteahpiihtentaakosihsii ci⁠nawakiiyaampaan ci⁠aapa'amowak omahkisineyaapiin.

⁸ Kitishi siika'antawininim niin nipiink. Wiin itahsh wiin kika kikishkamoonikowaa Kishemanitoon otAhcaahkoni. Mii 'owe kaawii'ishi siika'antawinek,” kii'‑ihkito a'a Cwaan.

Ekiih siika'antaasotc a'awe Ciisahs, i'iwe tahsh ekii'ani kakweci'ikotc ini Setanan

⁹ Kii'‑ishihse tahsh i'i ahpii, ekiih takwihshink a'awe Ciisahs, ekiihpi onciitc weti ootenawenhsink Naasarit (Nazareth) e'⁠ishinihkaatenik, i'imaa Kaalaliiwi ahkiink (Galilee) e'⁠ayaanik ootenawenhs. Okiih pinaasihkawaan tahsh ini Cwaanan (John), ekiih siika'antaakotc i'imaa Cwaartanawi siipiink (Jordan).

¹⁰ Piciinak itahsh e'⁠akwaasiitc a'a Ciisahs, okii'-waapantaan i'i kiishik eh⁠paahkihsenik. Shikwa okii'-waapamaan ini Kishemanitoon otAhcaahkoni eh⁠pinaashiinitc, omiimiinhsink e'⁠ishinaakosinitc ehpi pooniihsantaakotc ehpi piincishkaakotc ini Ahcaahkwan.

¹¹ Shikwa kiih⁠tepihtaakwan inwewin kiishikonk: “Kiin ihsa ninKosihs siyaaki'inaan, kiin kaa⁠na'entami'iyan.”

¹² Shemaak tahsh weti okii'ishi wiihkoshkaa'ikoon Ciisahs ini Ahcaahkwan, pikwatahkamikaank ekii'ishi maacaatc.

¹³ Miitahsh i'imaa kaa'ishi niimitana tahsokonitc pikwatahkamikaank. Amiitahsh i'imaa Setan (Satan) okiih kakwe kashki'aan Ciisahsoon ci⁠macitootaminitc. Pikwaci aya'aawihshak kaye kii'⁠ayaawak weti kaakii'ishi ayaanitc. I'imaa tahsh encalak okiihpi kanawenimaawaan Ciisahsoon.

Ekii'-antomaatc Ciisahs i'iwe opakita'we' e'⁠niiwinitc

¹⁴ Paanimaa tahsh kaah⁠kipa'ontc a'a Cwaan (John) Siika'antaakewinini, kii'ani takwihshin a'a Ciisahs i'imaa Kaalaliiwi ahkiink (Galilee) e'⁠wiintamaaketc i'i Kishemanitoo ominwaacimowin,

¹⁵ o'owe e'⁠ihkitotc: “Mii aasha e'⁠ocihcihsek! Aasha pehshonaakwanini 'i Kishemanitoo ci⁠okimaahkantaaketc! Kwehkipimaatisik, tepwehtamohk o'o minwaacimowin!” kii'‑ihkito.

¹⁶ Mekwaa tahsh ekiihpi pimaashakaametc Ciisahs Kaalaliiwi Saaka'ikaniink okii'ani waapamaa' Saaimanan (Simon) kaye Saayiman wiicihkiweyan Entaroon (Andrew), mekwaa eh⁠pahkopii'waanitc ahsapiin. Aaniihsh i'i mii 'owe otanohkiiwiniwaa i'i pakita'wewin.

¹⁷ Okiih kanoonaa' itahsh: “Haw ampeyohk, piwiiciiwihshik,” okii'-inaa'. “Inashke hsa kaapi inanohkiiyek eh⁠pakita'waayek, noonkom itahsh kika maaciikihkino'amawininim ci⁠piitamawiyek pemaatisiwaatc,” okii'-inaa'.

¹⁸ Miitahsh shemaak kaa'ishi nakanaawaatc otahsapiiwaa', ekii'ani wiiciiwaawaatc ini Ciisahsoon.

¹⁹ Miinawaa tahsh iko naakewaahsa e'ani takwihshink Ciisahs, okii'-waapamaa' ini Ciimisan (James) kaye Cwaanan (John), e'⁠wiicihkiweyintinitc, okosihsa' a'a Sepatii (Zebedee). I'imaa kii'⁠ayaawa' piintoonak, mekwaa eh⁠kwayaanci'aanitc otahsapiini.

²⁰ Shemaak itahsh Ciisahs okii'-antomaa'. Miitahsh kaa'ishi nakanaawaatc otetewaan Sepatiin, i'imaa ciimaanink e'⁠ayaanitc, i'iweniwa' kaye anohkii'akana'. Miitahsh kaa'ani ishi wiiciiwaawaatc ini Ciisahsoon.

Ekiih saakicinisha'amawaatc Ciisahs ini maciahcaahkwan iniwe ininiwan

²¹ Miitahsh weti kaani ishi takwihshinowaatc ootenaank, Kaparniyam (Capernaum) e'⁠ishinihkaatenik. Miitahsh piciinak e'⁠ishikiishikahk kaaotAnwepiiwi kiishikanoomiwaatc iki Coowak, mii'imaa kaa'ishi piintiketc a'a Ciisahs i'imaa Coowa' otanami'ewikamikoniink, ekii'-maaciikihkino'amaaketc.

²² Okii'-maamahkaasihtaakoo' itahsh i'i pemaatisinitc eshi kihkino'amaaketc. Wiin aaniihsh okii'ishi kihkino'amawaa' taapishkoo mii wa'awe e'⁠okimaawentaakositc. Kaawiin wiin taapishkoo kii'ishi ayaahsii oko kaa⁠kihkino'amaakewaatc i'i Coowa' otOonahshowewinini.

²³ Mii'i ahpii kiih⁠piintike 'imaa anami'ewikamikonk a'a peshik inini eh⁠kikishkawaatc maciahcaahkwan, ekii'ishi shaakowetc:

²⁴ “Kiin Ciisahs Naasaritink (Nazareth) wenciiyan! Wekonehsh wenci papaamenimiyaank? Kipionci ishaa na ci⁠nihshiwanaaci'iyaank? Kikihkenimin kiin aweneniwiyan, kiin a'a KaaPehkisitc Kishemanitoonk kaa⁠onciitc!” kii'‑ishikishiiwe.

²⁵ Ciisahs itahsh okiih kishiikanoonaan: “Pisaan! Keko kekoon ihkitohken! Nakash a'a inini!” okii'-inaan ini maciahcaahkwan.

²⁶ Miitahsh ekii'-ocipinikoshkawaatc ini ininiwan a'a maciahcaahk, ekiih kihcinoontaakositc, mii'i kaa'ishi nakanaatc.

²⁷ Kiih⁠kihcikoshkwentamook itahsh kahkina iki pemaatisiwaatc, kaa'onci kakwecintiwaatc: “Wekonehsh o'owe? Mii hsa 'owe oshkikihkino'amaakewin! Taapishkoo e'⁠okimaawentaakositc otishikanoonaa' i'i maciahcaahkwa', kaye ona'ihtaakoo'!” kii'‑ihkitowak.

²⁸ Miitahsh i'i weyiip ekiih papaatipaacimintc misiwe i'imaa Kaalaliiwi ahkiink (Galilee).

Eh⁠pimaaci'aatc Ciisahs niipiwa' awiya'

²⁹ Miitahsh i'i e'anionci maacaawaatc i'imaa Coowa' otanami'ewikamikoniink, weyiip iko kii'ani ishi piintikewak i'imaa eshitaanitc Saaiman (Simon) kaye Entaroo (Andrew), ekii'ani wiiciiwikowaatc Ciimisan (James) kaye Cwaanan (John).

³⁰ Ini tahsh Saaiman osikohsan kiih⁠kishisowaahpinewan ekiih pimihshininitc. Miitahsh i'i shemaak kaa'ishi wiintamawintc a'a Ciisahs e'ishi ayaanitc.

³¹ Miitahsh kaa'ishi naasihkawaatc ekiih sakinihkenaatc ekii'ishi wanishkaapinaatc. Miitahsh shemaak kaa'ishi nakanikonitc i'i kishisowaahpinewin. Miitahsh kaa'ishi maaciipami'ikowaatc ini ihkwewan.

³² Ahpii tahsh wenaakohshininik, aasha ekiih pankihshimonitc kiisihsoon, kiih⁠paapiitamawaa Ciisahs kahkina kaa‑aahkosinitc kaye awiya' kaa⁠kikishkawaanitc maciahcaahkwa'.

³³ Piinihsh iko kahkina minihk eyaawaatc i'imaa ootenawenhsink kiihpi maawaci'itiwak i'imaa akwaci ishkwaantenk.

³⁴ Niipiwa' itahsh okiih pimaaci'aa' Ciisahs i'i aaniin iko enaahpinenitc. Kaye niipiwa' okiih saakicinisha'amawaa' maciahcaahkwa' kaa⁠kikishkawaanihpan awiya'. Kaawiin itahsh okiih pakitinamawaahsii' ci⁠kiikitonitc i'i maciahcaahkwa', aaniihsh okiih kihkenimikoo' e'⁠oKosihsimikotc Kishemanitoon.

Ekiih papaakakiihkwetc Kaalaliiwi ahkiink

³⁵ Wiipa tahsh eh⁠kishepaawakaninik cipwaa piitaapaninik, kii'⁠wanishkaa, ekii'ani saaka'ank, ekii'-nihshihkeishaatc inkoci. Miitahsh i'imaa kaa'ishi anami'aatc.

³⁶ Paanimaa tahsh a'a Saaiman (Simon) kaye iniweniwa' kaa⁠wiiciiwikotc okiih pima'anaawaan ini Ciisahsoon ekii'-nanaantone'waawaatc.

³⁷ Miitahsh e'⁠mihkawaawaatc okiih kanoonaawaan: “Kahkina awiya kinaanaantonaak,” okii'-inaawaan.

³⁸ Ciisahs itahsh okii'-inaa': “Taka weti ishi maacaataa ciikaya'ii eyaakin ayaawinan, i'imaa kaye ci⁠tashi wiintamaakeyaan Kishemanitoo otihkitowin. Aaniish mii'iwe kaaonci piishaayaan,” kii'‑ihkito.

³⁹ Miitahsh i'i kaa'ishi papaamiayaatc i'imaa Kaalaliiwi ahkiink (Galilee) misiwe, ekiih papaakakiihkwetc i'imaa Coowa' otanami'ewikamikoniink. Shikwa tahsh kaye okiih saakicinisha'amawaa' maciahcaahkwa' awiya'.

Ekiih pimaaci'aatc Ciisahs ininiwan ekii'-omikiiwaahpinenitc

⁴⁰ Aapitink itahsh eh⁠kiishikaninik okiihpi otihsikoon Ciisahs peshik ininiwan ekii'-omikiiwaahpinenitc, ehpi pakohsenimikotc kaye ko e'⁠ociciinkwanapiihtaakotc, e'⁠ikotc: “Kiishpin inentaman kitaa kashkihtoon ci⁠pehki'iyan,” kii'‑ihkitowan.

⁴¹ Ciisahs itahsh wiinke ekiih kitimaakenimaatc, okiih shiipinihkehtawaan ekiih saaminaatc. Shikwahsh ekii'-inaatc: “Eha', nintinentam. Kika pehki'ikoowis,” okii'-inaan.

⁴² Miitahsh i'i shemaak kaa'ishi nakanikonitc i'i otinaahpinewinini ini ininiwan. Kii'⁠minoayaawan e'⁠naapinaakosinitc.

⁴³ Shemaak itahsh okii'-maaciinisha'waan a'a Ciisahs ini ininiwan. Ahkawe tahsh wiinke okii'-ayaankwaamimaan o'o:

⁴⁴ “Ayaankwaamisin,” okii'-inaan. “Keko kekoon awiya wiintamawaahken. Ishaan itahsh anami'ewikimaa ci⁠waapamihk. Moosihs (Moses) kii'‑inaahkonike i'i pakitinikewin ci⁠miikiwetc awiya ahpii kii⁠minoayaa'intc. Mii'iwe miikiwen ci⁠kihkenimihkwaa pemaatisiwaatc e'⁠minoayaayan,” okii'-inaan.

⁴⁵ Wiin itahsh a'a inini kaakii'-minoayaa'intc, aanciko kii'ani tipaacimohtaake misiwe ekiih kihkentamooshiwetc. Miitahsh o'o onci, kaawiin kii'⁠mihcicehkishkaahsii ootenawenhsink a'a Ciisahs, ekaa ci⁠kihkenimaahsiwintc. Miitahsh intawaac i'imaa pikwacaya'ii ekaa kaa⁠ishitaaniwansininik kii'⁠ayayaa. Misiwe tahsh okiihpi ayonciotihsikoo' awiya'.