ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 4 - Ojibwe Kihcimasina'ikan

Ciisahs ekiihkoci'ikoowisitc

¹ Ciisahs tahsh kiihkiiwe Cwaartan (Jordan) siipiink ekii'onci maacaatc, emooshkineshkaakotc Kishemanitoon otAhcaahkoni. Miiwan itahsh Ahcaahkwan kaakii'ishi niikaaniiwinikotc pikwatahkamik.

² Mii weti kaakiihtashi kakweci'ikotc maciaya'aan niimitana (40) tahsokiishik minihk. Kaawiin kekoon okii'onci miicihsiin i'iwe minihk. Ahpii tahsh kaaishkwaahsenik, wiinke kii'noontehskate.

³ Miitahsh kaa'ikotc maciaya'aan: “Kiishpin Kishemanitoo oKosihsan tenowiwanwen, anoosh a'a ahsin cipahkweshikaniwitc.”

⁴ Miitahsh Ciisahs kaaishi nahkwehtawaatc: “Mii 'owe Kihcimasina'ikan eshipii'ikaatek: ‘Kaawiin awiya pahkweshikanink ehta taonci pimaatisihsi,’ ” okii'inaan.

⁵ Miinawaa tahsh maciaya'aan okii'ishi wiiciiwikoon wakitatin, kiishaatap iko ekii'-waapanta'ikotc kahkina kaakihci okimaawentaakwaninik o'omaa ahkiink kaa'ayaanikin.

⁶ Miitahsh kaa'ikotc: “Kika miinin o'o kahkina kashki'ewisiwin, i'i kaye citipentaman eshi wenootisiimakahk o'o ahki. Niin kahkina ninkii'-miinikoo ono, cikashkihtooyaan awenen iko enenimak cimiinak.

⁷ Miiwan itahsh onoweniwan kahkina ketipinawewisiyan kiishpin niin ociciinkwaniihtawiyan cianami'ehtawiyan,” okii'ikoon.

⁸ Miitahsh Ciisahs kaa'ishinahkwehtawaatc: “Kihcimasina'ikan ishipii'ikaate: ‘KaaTipenciketc kiKishemanitoom kika ociciinkwaniihtaw, wiin ehta kaye kika anohkiihtawaa,’ ” kii'ihkito.

⁹ Miinawaa tahsh maciaya'aan Ceroosalamink (Jerusalem) okii'-ishiwinikoon, ekii'ishi pakitinikotc maawac kaaishi ishpahkitenik Kihcianami'ewikamik. Miitahsh kaa'ikotc: “Kiishpin Kishemanitoo oKosihsan tenowiwanwen, mii 'omaa onci kwaashkwanin.

¹⁰ Aaniihsh Kihcimasina'ikan ishipii'ikaate: ‘Kishemanitoo hsa oka'-anoonaa' otencalima' cinaanaakaci'imihk, cikanawenimimihk aaniin piko keni ishihcikewatc.’

¹¹ Ihkitoomakan kaye: ‘Miiwak itahsh iki keminciminihkwaa ciwiihsakisitehshinowaahsiwatc i'imaa kaashi ahsiniihkaanik,’ ” okii'ikoon.

¹² Ciisahs tahsh okii'ishi nahkwehtawaan: “Ihkitoomakan kaye: ‘Kaawiin kika kotenimaahsii kaaTipenciketc kiKishemanitoom,’ ” okii'inaan.

¹³ Ahpii tahsh Ciisahs kaakii'ishkwaa kakweci'ikotc maciaya'aan misiwe kekoonink, mii 'i pinamaa acina kaaishi nakanikotc.

Ciisahs kiimaatanohkiitc Kaalaliink

¹⁴ Miitahsh Ciisahs kaaishi kiiwetc weti Kaalaliink (Galilee), ekiih kikishkaakotc eshi maskawisiinitc Kishemanitoon otAhcaahkoni. Otipaacimikoowin tahsh misiwehkamik kiimisiteshkaamakanini.

¹⁵ Miitahsh kaakii'-maacihtaatc ekiih kihkino'amaaketc i'imaa Coowa' otanami'ewikamikoniink, kahkina kaye awiya' okiihkihci nanaahkomikoo'.

Ciisahs kiiaanawenimikotc i'i Naasaritink kaa‑ayaanitc

¹⁶ Ciisahs tahsh kiihpitakohshin i'imaa Naasarit (Nazareth) ootenaank, kaakiihtashi ompikitc. Ahpii tahsh e'Anwepiiwi kiishikaninik, peshikwan kaanihtaa ishihciketc, kii'ishaa anami'ewikamikonk. Kiihpasikwii ekii'-ishaatc enaahsamapinitc cianamihtootc Kihcimasina'ikan.

¹⁷ Miihsh kaakii'-miinintc titipiikinoomasina'ikan Aaiseyawan (Isaiah) okanootamaaken kaakii'ishi oshipii'ikenikopanen. Okii'aapinihskwekinaan itahsh i'iweni kaatitipiikinikaatenik masina'ikan. Okii'-mihkaan tahsh i'imaa kaaishipii'ikaatenik:

¹⁸ “Niwiiciiwimik kaaTipenciketc otAhcaahkwan. Niin aaniihsh ninkii'-onenimik cipiitamawakwaa kaakoohpaatisiwaatc minwaacimowinini. Ninkiih piicinisha'ok ciwiintamawakwaa kipa'waakanak cipakitinintwaa, kaye cikiiwe ontinamowaatc owaapiwiniwaan ikiweniwak kaawaapihsikwaa, cipakitinakwaa ikiweniwak kakakwaataki'intwaa,

¹⁹ kaye tahsh ciwiintamaan i'iwe aasha eishihsek ahpii kaaTipenciketc keshawenimaatc opimaatisiima'.”

²⁰ Ciisahs tahsh okiihkiiwe titipiikinaan i'i masina'ikan ekii'-miinaatc ini owiici'iwen i'imaa kaa‑anohkiinitc. Miitahsh i'imaa niikaanaya'ii kaaishi onapitc ewii kihkino'amaaketc. Kahkina awiya' i'imaa kaa ayaanitc anami'ewikamikonk okiih kanawaapamikoo'.

²¹ Miitahsh kaa'inaatc emaacii kakanoonaatc: “Mii 'i noonkom kaakiishikaak o'o kaanoontamek ekii'-ocihcihsek i'i kaaihkitoomakahk kihci oshipii'ikewin.”

²² Kahkina tahsh okii'-minwaapamikoo' ekii'-maamahkaasihtaakotc kaye kaa'ahpiihci minohtaakositc kaakii'-ihkitotc. Miitahsh kaa'ihkitonitc: “Kaawiin ina wiin Coosap (Joseph) ini okosihsan?”

²³ Miitahsh kaa'inaatc: “Kehcinaac iko kika wiintamawihshim i'iwe kakiihtaawi kiishwewin, ‘Haw kiin mashkihkiiwinini, antawi'itison.’ Kaye tahsh kikaishim, ‘Taka o'omaa kaaonciiyan ootenaank ishihciken ini peshikwan kaanoontamaank kekoonan kaaishihcikewanen Kaparniyam (Capernaum) ootenaank.’ ”

²⁴ Miihsh kaa'ani inaatc: “Tepwe o'owe kaawiintamawinakook, kaawiin wiihkaa minwenimaakaniwihsii awiya kaakanootamawaatc Kishemanitoon otootenaamink kaaonciitc.

²⁵ Inashke pisintawihshik: tepwe aahpici kiipaahtiinowak kiiwaacihkwek Isriyalink (Israel) mekwaa ahpii Ilaaica (Elijah) kiiayaatc. Kaawiin kii'onci kiminwansinoon nihsopipoon aapihta minihk. Wiinke ekii'-noontehsek miicim misiwehkamik. Isriyal ahkiink.

²⁶ Kaawin tahsh Ilaaica kii'ishinisha'waahsii kanake peshik cianta wiici'aatc. Mii ehta 'imaa kaakii'-ishinisha'ontc eshiayaanitc peshik kiiwaacihkwen ciawi wiici'aatc Serahpat (Zarephath) ootenaank i'imaa pehsho kihciootenaank Saaitan (Sidon) kaaicikaatek.

²⁷ Aahpici kaye kiipaahtiinowak awiyak wemikiiwaahpinewaatc mekwaa ahpii Kishemanitoo okanootamaaken Ilaaihshahoon (Elisha) kiiayaanitc. Kaawiin tahsh kanake peshik kiionci pehki'aakaniwihsii i'iweni kaakii'-inaahpinetc, mii ehta Neaman (Naaman), Siiriya (Syria) ahkiink kaaonciitc kaakii'-antawi'intc,” kii'ihkito.

²⁸ Ikiweniwak itahsh i'imaa anami'ewikamikonk kaa‑ayaawaatc ahpii e'⁠noontamowaatc o'o, aahpiciko kahkina kii'nishkaatisiwak.

²⁹ Miihsh kaa'ishi pasikoncihsewaatc ekiih saakici wepinaawaatc Ciisahsoon i'imaa ootenaank, ekii'-ishiwinaawaatc wakitatin i'imaa eshiayaanik otootenaamiwaa, ewii piniwepinaawaatc kaashi kiishkatinaanik.

³⁰ Shaakooc itahsh Ciisahs kii'ani shaaposhkaa mekweya'ii awiya' eshi paahtiinonitc, ekii'ani maacaatc.

Kiihsaakicinisha'amawaatc ininiwan kekishkaakonitc maciahcaahkwan

³¹ Miitahsh Ciisahs kii'ishaa weti Kaparniyam (Capernaum) ootenaank, Kaalalii (Galilee) ahkiink, mii weti kaakiihtashi kihkino'amawaatc pemaatisinitc e'Anwepiiwi kiishikaninik.

³² Tepwe hsa kahkina awiya' okii'-maamahkaasihtaakoo' i'iweni eshi kihkino'amawaatc, aaniihsh i'i otihkitowin kii'inihtaakwanini ekii'-miinikotc Kishemanitoon kashki'ewisiwin.

³³ Peshik itahsh inini kii'ayaakopan i'imaa piintikamik anami'ewikamikonk, ekiih kikishkaakotc maciahcaahkwan kaapehkentakosihsinik, enikohk ekii'-noontaakosinitc ehshaakowenitc,

³⁴ o'o e'⁠ihkitonitc: “Aai! Aaniin waahtootawiyaank, Ciisahs Naasarit (Nazareth) kaaonciiyan? Kipianta nihshiwanaaci'inaam ina? Kikihkenimin aweneniwiyan Kiin Kishemanitoo kaakiih piicinisha'waatc Okwayahkwaatisiiman!” okii'ikoon.

³⁵ Ciisahs tahsh okiih kanoonaan iniweniwan maciahcaahkwan: “Kitoompiikihs, onci saaka'an i'imaa a'a inini opimaatisiwinink,” okii'inaan. Miitahsh a'a maciahcaahk kaaishi ahpakinaatc ini ininiwan i'imaa mekwe eshiayaanitc pemaatisinitc, kaye ekii'-nakanaatc. Kaawiin tahsh kekoon okiih tootawaahsiin ini ininiwan.

³⁶ Kahkina tahsh kii'maamahkaatentamook o'o ekii'-ayitiwaatc: “Wekonen tahsh o'o tino kihkino'ikewin, e'⁠ayaatc a'a inini kashki'ewisiwin, tako kaye mashkawisiiwin ekashki'maatc kaapehkisihsinik maciahcaahkwa', cisaaka'aminitc!” kii'ihkitowak.

³⁷ Ciisahs tahsh otinaacimikoowin misiwehkamik kii'ani kihkentaakwanini.

Ciisahs kiiminwaaci'aatc niipiwa' pemaatisinitc

³⁸ Miitahsh Ciisahs kaa'ishisaaka'ank i'imaa anami'ewikamikonk, Saaimanoon (Simon) eshitaanitc ekii'-ishaatc. Saaiman tahsh osikohsan kii'aahkosiwan, aahpici ekiihkihci kishisowaahpinenitc. Ciisahs itahsh kii'wiintamawaa aaniin eshi ayaanitc ini ihkwewan.

³⁹ Miitahsh Ciisahs kaaishianta waapamaatc ihkwewan, ekii'-niipawitc ciiki nipewinink. Miitahsh kaaishi kanootank i'iweni kishisowaahpinewin. Miitahsh a'a ihkwe kaakii'-nakanikotc otaahkosiwin. Miihsh shemaak ekii'-wanishkaatc ekiih pami'aatc Ciisahsoon, i'i kaye kaakii wiiciiwikonitc.

⁴⁰ Ahpii e'⁠ani pankishimotc kiisihs, kahkina awiyak kaakiih kanawenimaawaatc kaa‑aahkosinitc pepahkaani aahkosiwin enaahpinenitc okiih piitamawaawaan Ciisahsoon. Kahkina tahsh okiih saaminaani entahso peshikonitc ekii'-minoayaanitc.

⁴¹ Kiipaahtiinowa' kaye maciahcaahkwa' kaakii'-nakanaanitc pemaatisinitc, “Kiin Kishemanitoo oKosihsan,” ekii'ishi shaakowaanikotc. Ciisahs tahsh okii'-onci'aa' kekoon ci'ihkitohsinik, aaniihsh okiih kihkenimikoo' ekii'-onenimikotc Kishemanitoon ciPimaaci'iwewininiiwitc.

Ciisahs kiihpapaakakiihkwetc anami'ewikamikohkaank

⁴² Ahpii e'⁠ani kiishikaninik Ciisahs i'imaa ootenaank kii'onci maacaa ekii'-ishaatc eshinihshihke ayaanik. Awiya' itahsh okii'maaci nanaantawaapamikoo'. Ahpii tahsh kaa'mihkaakotc otaanakiih kakwe kihciwimikoo' cimaacaahsik.

⁴³ Miitahsh kaa'inaatc: “Ishihse kaye oncita kotak ini ootenawan ciwiintamaakeyaan i'iweni minwaacimowin Kishemanitoo kaawii'ishi oshihsitootc oTipencikewin, mii 'i Kishemanitoo kaakiihonci piicinisha'otc ci'ishihcikeyaan,” kii'ihkito.

⁴⁴ Miitahsh kaa'ishi papaakakiihkwetc anami'ewikamikohkaank i'imaa Cootiiya (Judea) ahkiink.