ᐅᓈᑯᓂᑫᒃ 9 - Ojibwe Kihcimasina'ikan

Apimelehk Ehtashinsotc

¹ Apimelehk (Abimelech) itahsh kaakii otetetc Cerapeyalwan (Jerub baal) kii‑ishaa Shiihkam (Shechem) ootenaank kaakii ishi'ayaanitc omaamaan otinawemaakanini. Miitahsh kaakiih kakanoonaatc kahkina omaamaan otinawemaakanini ekii ihkitotc,

² “O'o hsa inaahkekwaanik iki kahkina kaa⁠niikaanisiwaatc o'omaa Shiihkam, ‘Aaniin i'i ke⁠ishi onishihshinkipan, komaa niishwaahsimitana (70) ininiwak kahkina Cerapeyal okosihsa' ci⁠tipeniminekwaapan, komaa kaye peshik ehta inini ci⁠tipeniminekipan?’ Maamihkawik itahsh kaye niin eshi omiskwiimiyek, eshi ohkaniyek kaye niin e⁠ishi'ayaayan,” kii‑ihkito.

³ Ahpii tahsh omaamaan otinawemaakanini kaa⁠wiintamawaanitc kahkina kaakii ihkitotc i'i Shiihkam eyaanitc, mii hsa 'i Apimelehk kaa⁠ishi piminisha'okotc o'o ekii ihkitonitc, “Nintinawemaakaninaan iitok a'a,” kii‑ihkitowa'.

⁴ Niishwaahsimitana (70) tahsh waapaapihko shooniyaa' kii⁠onci miinaa eshi anami'ehtawimintc Peyal piirihtan (Baal berith). Miiwan itahsh ini shooniyaan Apimelehk kaa‑aapaci'aatc ekii anohkii'aatc ininiwa' kekoon enentaakosihsinik, kekoon kaye menaacihtoohsinik. Miitahsh kaa⁠ishi piminisha'okotc.

⁵ Miitahsh kaa⁠ishi ishaatc Ohpara (Ophrah) ootenaank otetepaniin kaakii ishitaanihpan. Miitahsh kaa⁠ishi nihsaatc Cerapeyalwan okosihsini niishwaahsimitana (70) kaakiih tahshinitc. Peshikwaya'ii tahsh eshi pihkwaapihkaanik okiih tashi nihsaa'. Ini tahsh maawac wehshiimenshimaawinitc Cerapeyal okosihsan Coohtam (Jotham) eshinihkaasonitc kiih⁠kaasowan, kaawiin itahsh ini kii⁠nihsaahsiiwan.

⁶ Kahkina tahsh i'i ininiwa' Shiihkam wenciinitc, i'i kaye kahkina Pehtmiloo (Bethmillo) kii⁠ohkwiino'itiwa' i'imaa eshi patahkisonitc kehtenimimintc oohk tinowaahtikoon, ekii ishi'aawaatc Apimelehkoon ci⁠kihciokimaawinitc.

⁷ Ahpii tahsh Coohtam (Jotham) kaah⁠pi wiintamawintc enahkamikaninik, kii‑ishaa hsa wakici pihkwatinaank Kiiraaisim (Gerizim) ecikaatenik. Miitahsh o'o kaa⁠ihkitotc aahpici enikohk ekiih kiikitotc, “Pisintawihshik, kiinawaa ininiwak Shiihkam wenciiyek, miihsh Kishemanitoo ci⁠pisintawinek.

⁸ Aapitink hsa mihtikook kii⁠maacaawak ewii onaapamaawaatc ke⁠okimaahkantaakowaatc. Miihsh iinsan o'o kaa'inaawaatc aalip tinowaahtikoon (olive), ‘Taka kiin okimaahkantawihshinaam.’

⁹ O'ohsh iinsan ini aalip tinowaahtikoon okii'ikowaan, ‘Ninka nakataan ina itahsh o'o pimitewaapo wenci kihtenimintwaa manitook, ininiwak kaye, weti tahsh ci⁠awi tashi tipenimakwaapan mihtikook?’

¹⁰ Iki tahsh mihtikook okii'inaawaan iinsan pik tinowaahtikoon (figs), ‘Taka kiin piishaan cipi okimaahkantawiyaank!’

¹¹ O'ohsh iinsan okii ishi nahkwehtaakowaan ini pik tinowaahtikoon, ‘Ci⁠nakatamaan ina tahsh ini shiiwiminan, wenishihshikin, kaa⁠shiiwankin kaye, weti tahsh ci⁠awi tashi tipenimakwaapan mihtikook?’ okii'ikowaan.

¹² Iki tahsh mihtikook okii'inaawaan iinsan shoominaahtikoon, ‘Taka kiin piishaan cipi okimaahkantawiyaank!’

¹³ Miihsh iinsan o'o inahke kaa'ikowaatc shoominaahtikoon, ‘Ci⁠nakatamaan ina itahsh nintooshki shoominaapoom, menomanci'ishkaakowaatc manitook, ininiwak kaye, ci‑ishaayaan itahsh weti ci⁠awi tashi tipenimakwaapan mihtikook?’ okii'ikowaan.

¹⁴ Kekahpii tahsh kahkina mihtikook okii'inaawaan iinsan ini kaawiminakashiiwaahtikoon, ‘Taka kiin piishaan cipi okimaahkantawiyaank!’ okii'inaawaan.

¹⁵ Miihsh iinsan o'o kaa'ikowaatc, ‘Kiishpin hsa tepwe onaapamiyek ci⁠okimaahkantawinakook, piishaak hsa o'o ci⁠akawaahtehshimoonoyek eshi akawaahteshkikeyaan. Kiishpin itahsh wiin i'i ishihcikehsiwek, taka hsa ishkote ta⁠oncihse o'omaa kaawiminakashiiwaahtikonk ci⁠ankwaahkisowaatc kahkina kiishkaahtikook eyaawaatc Lepanan (Lebanon) ahkiink,’ ” okii'ikowaan.

¹⁶ “Tepwe na tahsh kwayahk kikii ishihcikem kii⁠kihciokimaawi'ek Apimelehk? Kaawiin ina kikihtenimaahsiwaawaa Cerapeyal, i'i kaye otaawinink wenciinitc, cikiih tootawekipan aaniin inahke kaakii ishi wiitoohkawinek?

¹⁷ Maamihkawik, nintetepan iitok kikii miikaasohtamaakowaa, okii naniisaanihtoon kaye opimaatisiwin, kikii onci shaapwii'ikowaa kaye onci kaakii nihtaa miikaaniminek Mitiyan kaatinowinitc.

¹⁸ Noonkom itahsh kaa⁠kiishikahk kitishihcikem e⁠miikaatamowek nintetepan otaawin, ekii nihsimek niishwaahsimitana (70) okosihsa' i'imaa peshikwaya'ii eshi pihkwaapihkaak. Apimelehk itahsh wekosihsimikotc pamiihtaakaniwihkwewan, mii 'awe kaa⁠ishi'ek ci⁠okimaahkantawaatc ininiwa' Shiihkam (Shechem) wenciinitc, aaniihsh kitinawemaakaniwaa a'a.

¹⁹ Kiishpin itahsh noonkom kaa⁠kiishikaninik tepwe, kwayahk kaye kaah⁠tootawaawekwen Cerapeyal, i'i kaye otaawinink wenciinitc, na'enimihk itahsh Apimelehk, kewiin itahsh kika na'enimikowaa.

²⁰ Kiishpin itahsh i'i ishihsehsinok, taka hsa ishkote ta⁠oncihse Apimelehkonk ci⁠ankwaahkisokowaatc wenciiwaatc i'imaa Shiihkam ootenaank, i'imaa kaye Pehtmiloo wenciiwatc. I'imaahsh kaye meshkwac ishkote ta⁠oncihse ininiink wenciiwaatc Shiihkamink, kaye i'imaa ininiink wenciiwaatc Pehtmiloo ci⁠ankwaahkisokotc Apimelehk,” kii‑ihkito.

²¹ Miitahsh Coohtam kaa⁠ishi tapasiitc ekii maaciipa'iwetc. Weti tahsh ayaawinink Piiyar ecikaatenik kii‑ishaa, miihsh weti kaa‑ayayaatc aaniihsh okii kohsaan wiicihkiweyan Apimelehkoon.

²² Nihsopipoon itahsh Apimelehk okii okimaahkantaan Isriyalahkiini.