ᐅᓈᑯᓂᑫᒃ 8 - Ojibwe Kihcimasina'ikan

Mitiyan Kaatinowiwaatc Kiishaakooci'intwaa

¹ I'i tahsh ininiwa' Iihpariyam (Ephraim) wenciinitc okiih pi'ikoo' Kiitiyan (Gideon), “Aaniin itahsh kaah⁠tootawiyaank i'i kaakii ishihcikeyan ekiih kanooshihsiwaank kii⁠anta miikaanekwaa Mitiyan (Midianites) kaatinowiwaatc?” Wiinke okii onci mikoshkaasomikoo' o'o onci.

² Miihsh o'o kaa⁠ishi nahkwehtawaatc, “Aaniin itahsh niin awahshime kaa⁠ishihcikeyaan ahpiihc kiinawaa? Kiinawaa ininiwak Iihpariyam wenciiyek, i'i hsa pankii eshihcikeyek nawac niipiwa' inankinte ahpiihc niinawint kaakii ishihcikeyaank.

³ Kishemanitoo iitok kikii miinikowaa oniikaanisii' Orepoon (Oreb), ini kaye Siiepoon (Zeeb) wenciinitc Mitiyan ahkiink ci⁠nihsimek! Aaniin itahsh keshi kashkihtooyaampaan awahshime'i cikii ishihcikeyaampaan?” okii inaa'. Miitahsh kaa⁠ishi pooninawesinitc o'o ekii'inaatc.

⁴ Kiitiyan hsa tahsh, i'i kaye nihswaahk ininiwa' kaakii wiiciiwikotc kiihpi takohshinook Cwaartan (Jordan) siipink ekii aashawishkaawaatc, ekii ayehkosiwaatc, shaakooc itahsh kiih⁠piminisha'ikewak.

⁵ I'imaa tahsh Sahkat (Succoth) ayaawinink kii‑ishi takohshinook. Miitahsh kaa'inaatc i'i ininiwa' i'imaa eyaanitc, “Taka ahshamihkwak nintininiimak pahkweshikanan. Wiinke ohsha caakiiwak. Keyaapi ohsha nimpiminisha'waak Mitiyan onci kihciokimaak Siipa (Zebah) eshinihkaasotc, a'a kaye Saalmiyoona (Zalmunna) eshinihkaasotc.”

⁶ I'i tahsh oniikaanisii' Sahkat (Succoth) ayaanitc o'o okii'ikoo', “Kaawiin iitok mahshi kikaahcitinaahsiwaawaa Siipa, a'a kaye Saalmiyoona, wekonen itahsh ke⁠onci ahshamankitwaapan kishimaakanihshiimak?” okii'ikoo'.

⁷ Miihsh Kiitiyan kaa⁠ishi nahkwehtawaatc, “Haw, ahpii hsa tahsh kaaTipenciketc ishi miishitc ci⁠atimimak Siipawan, Saalmiyoonawan kaye, miitahsh ahpii ci⁠pahpahkihte'onakook kiwiiyawiwaank ci⁠aapacihtooyaan okaawiminakashiiwaahtikoon, kaahshisiin kaye kaa⁠nihtaawikinkin pikwatahkamik,” okii inaa'.

⁸ Miitahsh i'imaa kaa⁠onci maacaatc weti ekii ishaatc Penowel (Penuel) ecikaatenik. Miitahsh peshikwan kaa⁠ihkitotc. I'i tahsh ininiwa' Penowel wenciinitc miipeshikwan kaakii'ikotc taapishkoo kaakii'ikotc ininiwa' Sahkat wenciinitc.

⁹ Miihsh o'o kaa⁠ishi nahkwehtawaatc i'i ininiwa' Penowel wenciinitc, “Ahpii hsa pikiiweyaan kiih⁠shaapwiiyaan, ninka piikopitoon hsa o'o onsaapiwin,” okii inaa'.

¹⁰ Ini tahsh Siipawan, ini kaye Saalmiyoonawan kii⁠ayaawa' weti Kaarkar (Karkor) ayaawinink. Oshimaakanihshiimini hsa mitaahshinaanink mitaahshwaahk 15,000 kaakii ishko'imintc maamawiko kiih⁠tahshiwa' i'i kaye kotak ininiwa' waapanonk kaakii onciinitc. Ninkoci ko maamaw ninkotwaahk niishtana mitaahswaahk 120,000 hsa kii⁠nihsaakaniwiwa' oshimaakanihshiimiwaa' i'i eh⁠kiishikaninik.

¹¹ Kiitiyan itahsh weti nahke kii⁠ani ishaa ciikaahkowiya'ii kaa⁠ishi pashkwataawankaanik waapanonk inahke eshi'ayaanik ayaawinan Noopa (Nopah), i'i kaye Cwaakpiiha (Jogbehah), miitahsh wiinke kaakiih ketahtowinaatc i'i shimaakanihsha' e⁠miikaanaatc.

¹² Ahpii hsa e⁠maaciipa'iwenitc Siipawan, ini kaye Saalmiyoonawan, okiih piminisha'waa'. Miitahsh kaakiih kaahcitinaatc i'i niishin Mitiyan onci kihciokimaa', ekii wawaanentamaanimi'aatc kaye kahkina oshimaakanihshiimini.

¹³ Miitahsh Kiitiyan kaakii otetetc Cooashan (Joash) eh⁠pikiiwetc ekii ishkwaa miikaasotc, weti nahke ishaawinink Herahs (Heres) ecikaatenik kiih⁠pii'ishaa.

¹⁴ Miitahsh kaakiih kaahcitinaatc oshkiniikiwan Sahkat wenciinitc, miihsh kaa⁠ishi kakwecimaatc ci⁠wiintamaakotc kekoonini. Miihsh ini oshkiniikiwan kaa⁠ishi oshipii'aminitc eshinihkaasonitc i'i oniikaanisii' i'imaa Sahkat kaakii ayaanitc niishwaahsimitanashiniishwaahso (77) kaakiih tahshinitc.

¹⁵ Kiitiyan hsa tahsh kii‑ishaa Sahkat, miihsh o'o kaa'inaatc i'i ininiwa', “Inashke waapamihk Siipa a'a kaye Saalmiyoona, mii iitok kaakii'ishiyekipan e⁠maanenimiyek, ‘Kaawiin iitok mahshi kikaahcitinaahsiwaawaa Siipa a'a kaye Saalmiyoona, wekonen itahsh ke⁠onci ahshamankitwaapan kishimaakanihshiimak?’ ” kii‑ihkito.

¹⁶ Miitahsh kaa⁠ishi otaahpinaatc oniikaanisii' i'imaa ootenaank, ekiih pahpahshanshe'waatc e⁠aapacihtootc okaawiminakashiiwaahtikoon, kaahshisiin kaye pikwatahkamik kaakii ontinank.

¹⁷ Okiih piikopitoon itahsh kaye onsaapiwin Penowel (Penuel) kaakii ayaanik, kahkina kaye ininiwa' okii nihsaa' i'imaa ootenaank.

¹⁸ Miihsh Kiitiyan kaakiih kakwecimaatc Siipawan (Zebah) ini kaye Saalmiyoonawan ekii'inaatc, “Awenenak tino ininiwak kaakii nihsekwaa weti Tepor (Tabor) waciink?” okii inaa'. Miihsh kaa'ikotc, “Kiin tino taapishkoo, kii‑ishinaakosiwak kihciokimaan e⁠okosihsimikowaatc,” okii'ikoo'.

¹⁹ Miihsh Kiitiyan kaa⁠ihkitotc, “Miiwak hsa iki niin niicihkiweyak, nimaamaa okosihsa'. Kehcinaac iko eh⁠tepweyaan o'o kaa⁠ihkitoyaan, kiishpin pakitinekwaapan cikiih pimaatisiwaahpan, kaawiin hsa kitaakii nihsihsinooninim,” okii inaa'.

²⁰ Maawac itahsh sesiihkisinitc okosihsan Ciihtar (Jether) eshinihkaasonitc okii'inaan, “Pasikwiin, kiin nihshi,” okii'inaan. Kaawiin itahsh ini oshkiniikiwan okiih kitinasiini pashipa'ikewihkomaan, aaniihsh kiih⁠shaakwenimowan onsaam ekiih kwiiwisenhsiwaatisinitc.

²¹ Miihsh Siipawan ini kaye Saalmiyoonawan kaa'ikotc, “Inashke kiin pasikwiin ci⁠nihshiyaank, inini hsa ishihcike ehpiihtentaakositc,” okii'ikoo'. Miitahsh Kiitiyan kaa⁠ishi pasikwiitc ekii nihsaatc, ekii otaahpinank kaye waweshi'onan kaakii naapishkaminitc ohkwekaniniink opihkwaawikane mihtatimooni.

²² Miitahsh Kiitiyan kaa'ikotc Isriyala' (Israel), “Taka kiin tipenimihshinaam, kikosihs, keni oyooshihsiyan ninkani tipenimikonaan, aaniihsh kiin kaakiih pimaaci'iyaank iki onci Mitiyan kaatinowiwaatc,” okii'ikoo'.

²³ Miihsh Kiitiyan kaa⁠ishi nahkwehtawaatc, “Kaawiin niin kika tipenimihsinooninim, ninkosihs kaye kaawiin kika tipenimikohsiiwaa; kaaTipenciketc hsa wiin kika tipenimikowaa,” okii inaa'.

²⁴ Miihsh o'o kaa‑ani'inaatc, “Peshik itahsh kekoon kiwiih kakwecimininim, kahkina entahshiyek ci⁠miishiyek naapihtepisonak kaakii wiitoohkaasoyek e⁠mahkantweyek,” kii‑ihkito. Ishmeyal kaatinowinitc hsa okii nihtaa kikishkawaani osaawi shooniyaa waapihkowi naapihtepisona'.

²⁵ Miitahsh kaa'ikotc, “Tepwe hsa kika miinikoo.” Miitahsh kaa⁠ishi tashwekihsitoonitc ishiikin, entahso peshikonitc itahsh okii ahpakinaani naapihtepisonan kaakii mahkantwenitc.

²⁶ I'i tahsh kaakii antotamaaketc osaawi shooniyaa waapihkowi naapihtepisona' niimitana (40) tahso tipaapiishkoocikan kii⁠ahpiihtinikwaniniwa'. Kaawiin itahsh kiih⁠takwakincikaatehsinoonan waweshi'onan, naapihkaakanimina' kaye, mahkate miskwekani kikishkikanan kaye kaakiih kikishkaminitc Mitiyan onci kihciokimaa', ini tahsh kaye kaakii naapihkwepisontc i'i pihkwaawikane mihtatimoo'.

²⁷ Miitahsh Kiitiyan kaakii aapaci'aatc ini osaawi shooniyaa waapihk ekii oshi'aatc manitoohkaanan, otootenaamink itahsh Ohpara (Ophrah) eshinihkaatenik okii ishi ahsaan. Kahkina tahsh Isriyala' (Israel) opihshikwaatisii' kii‑inentaakosiwa' ekii anami'ehtawaanitc. Miitahsh o'oweni Kiitiyan kaakii maanshipinikotc, i'i kaye otaawinink kaakii ayaanitc.

²⁸ Mii hsa tahsh o'onahke Isriyalak (Israel) kaa⁠ishi shaakooci'aawaatc Mitiyan kaatinowinitc (Midianites) kaawiin itahsh awahshime okii mikoshkaaci'ikohsiiwaa'. Wiinke tahsh pisaan kii⁠ayaaniwan i'imaa ahkiink niimitana tahso pipoon kii⁠pimaatisitc Kiitiyan (Gideon).

Kiitiyan Kii'ishkwaapimaatisitc

²⁹ Miitahsh Kiitiyan, Cerapeyal (Jerub baal) kaakii ishinihkaanintc kaakii otetetc Cooashan (Joash) kiih⁠kiiwe otaawinink ekii awi ishitaatc.

³⁰ Niishwaahsimitana (70) hsa kii⁠tahshiwa' okosihsa' wiiwink kaakii onciinitc, aaniihsh kiih⁠paahtiinowa' wiiwa'.

³¹ Kii⁠ayaawan itahsh kaye otaanihke wiiwan weti Shiihkam (Shechem) eyaawinink. Okosihsenhsan itahsh okii ayaawaani, Apimelehk (Abimelech) okii ishinihkaanaan.

³² Miihsh Kiitiyan (Gideon) kaakii otetetc Cooashan (Joash) kaakii ishkwaa pimaatisitc ekii ahkiwensiiwitc ekii kihci tahso pipoonwetc. Weti tahsh kii‑ishi na'inaa kaakii ishi na'inimintc otetepaniin Ohpara (Ophrah) ootenaank kaakii onciinitc Epiesar kaatinowinitc (Abiezerites).

³³ Kaawiin tahsh tashi naanaake kii‑ishihsehsinini kaa⁠ishkwaa pimaatisitc Kiitiyanan, Isriyalak (Israel) aasha miinawaa pihshikwaacihkwenk kii‑inentaakosiwak ekii nooci'aawaatc Peyal (Baal) enimintc. Ini hsa Peyal piiriht (Baal berith) okii onahsaawaan ekii omanitoomiwaatc.

³⁴ Kaawiin hsa kii⁠maamihkawihsiiwak kaaTipencikenitc oKishemanitoomiwaan kaakii naatamaakowaatc ekii miikaanaanihpan kaa⁠shiinkenimikowaatc waahkaaya'ii misiwe eyaanitc.

³⁵ Kaawiin awaac miikwehc cikii inenimaanihpan Cerapeyalwan otaawininiink kaakii ayaanitc; Kiitiyan kota kaakii'inimintc. Kaawiin kaye cikiih tepentamowaatc aaniin kahkina kaa⁠ishi minotootawaanitc Isriyala'.