ᐅᓈᑯᓂᑫᒃ 15 - Ojibwe Kihcimasina'ikan

¹ Naanaake tahsh e⁠ani ishihsenik ahpii kii⁠manishikenaaniwaninik, Saamihsan (Samson) okii mawatihsaan wiiwan ekiih tako ishiwinaatc maanatihkoonhsan ekii ihkitotc, “Ninka piintikewaan hsa kaashi nipaatc niwiiw,” kii‑ihkito. Oteteni tahsh kaawiin okiih pakitinikohsin ci⁠piintiketc.

² Miitahsh kaa'ikotc oteteni, “Mii hsa kaa⁠ineniminaan wiinke eh⁠shiinkenimatc, miihsh kaakii onci miikiwaanak, ekii miinak kisaaki wiiciiwaakan. Nawac iitok ohshiimenshan minonaakosiwan, inashke mii 'awe meshkwac ayaaw,” ekii'ikotc.

³ Miihsh Saamihsan kaa'inaatc, “Kaawiin tahsh niin kekoon ninkashi anaamentaakosihsii o'o noonkom aaniin kaawiih tootawakwaa Pilistii kaatinowiwaatc (Philistines),” kii‑ihkito.

⁴ Miitahsh Saamihsan kaa⁠ishi maacaatc ekii awi kaahcitinaatc nihswaahk (300) waakohsha'; miitahsh kaa⁠ishi neniishwaanowehpinaatc ekiih takwaahpitootc waahsahkonencikanaahkoon osowiniink.

⁵ Ahpii tahsh kaa⁠sahka'ank ini waahsahkonencikanaahkoon mii hsa 'i kaa⁠ishi pakitinaatc waakohsha' ci⁠papaamipa'itinitc kaakii ishi'ayaanikin okihtikaanini Pilistii kaatinowinitc. Miihsh kaakii ankwaahkisamawaatc okihtikaanini mahshi kaakii manishikaatehsininikin, ini kaye kaakii ayohkohsininikin kaakii manishikaatenikin. Kiih⁠tako ankwaahkiteniwan kaye kaakii ishi kihtikaatenikin aalip tinowiminan (olive) shoominak kaye.

⁶ Miitahsh o'o Pilistii kaatinowinitc kaa⁠ihkitonitc, “Awenen tahsh o'o kaa⁠ishihciketc?” Miitahsh kaa'inintwaa, “Saamihsan ohsha iinsan a'a kaa⁠ishihciketc. Oshihshenshan iitok Timnah ootenaank wenciinitc okii miikiwaanaani Saamihsan wiiwan ci⁠wiitikemaanitc kaa⁠saaki wiiciiwaatc,” kii'inaawak. Pilistii kaatinowiwaatc itahsh kiih⁠piishaawak ekiih sahka'waawaatc ini ihkwewan, oteteni kaye.

⁷ Miitahsh Saamihsan kaa'inaatc, “O'o tahsh ekii ishihcikeyek, keniin hsa kehcinaac kika nana'ahsininim; miitahsh ahpii payesh ci⁠poonihcikeyaan,” okii inaa'.

⁸ Kaawiin tahsh okii manaaci'aahsii' e⁠miikaanaatc, niipiwa' hsa okii nihsaa'. Weti tahsh kii‑ishaa Iitam (Etam) ootenaank ekii awi ayaatc eshi wiimpaapihkaanik.

Saamihsan Kiishaakooci'aatc Pilistii Kaatinowinitc

⁹ Pilistii kaatinowinitc itahsh kiih⁠piishaawa' ekiih kapehshinitc i'imaa Coota (Judah) ahkiink, ekii misihteyiinonitc i'imaa ootenaank Liihaai (Lehi) ecikaatenik.

¹⁰ Miitahsh ininiwak Coota wenciiwaatc kaa'inaawaatc Pilistii (Philistines) kaatinowinitc, “Wekonen tahsh wenci naasihkawiyaank, ewii miikaashiyaank ina?” Miitahsh kaa⁠ishi nahkwehtaakowaatc, “Saamihsan ohsha ewii mamaancikwahpinankitc kaa⁠onci piishaayaank, ewiih tootawankitc aaniin kaah⁠tootawinankitc,” okii'ikowaa'.

¹¹ Nihsink mitaahswaahk (3,000) itahsh Cootawininiwak kii‑ishaawak eshi wiimpaapihkaanik Iitam (Etam) ootenaank ekii'inaawaatc Saamihsanoon, “Kaawiin ina kikihkentansiin eh⁠tipenimiyamintwaa Pilistii kaatinowiwaatc? Etatawe ohsha kikihci mamishi'inaam,” okii'inaawaan. Saamihsanoon itahsh okii'ikowaan, “Kaakiih tootawiwaatc hsa piko keniin ninkiih tootawaak,” okii matwe ikowaan.

¹² Miitahsh kaa'inaawaatc, “Mii hsa wenci piishaayaank ewii mamaancikwahpinikooyan, ewii ishi pakitinikooyaan itahsh eshi'ayaawaatc Pilistii kaatinowiwaatc,” okii'inaawaan. Miihsh kaa'ikowaatc, “Kehcinaac hsa ayiici ahsotamawihshik kiinawaa ci⁠nishihsiwek,” okii'ikowaan.

¹³ Miihsh o'o kaa'inaawaatc, “Kaawiin kika papaamenimikohsii, shaakooc tahsh kiwii mamaancikwahpinikoo ewii ishiwinikooyan eshi'ayaawaatc Pilistii kaatinowiwaatc.” Miihsh kaa⁠ishi mamaancikwahpinaawaatc niishin oshki shinootaakanan ekii aapacihtoowaatc, mii kaye kaa⁠ishi saakisi'aawaatc i'imaa eshi wiimpaapihkaanik.

¹⁴ Ahpii tahsh eh⁠pakamiwicikaniwinitc Liihaai ootenaank, Pilistii kaatinowinitc kiih⁠shaahshaakowewa' ehpi anta nakishkaakotc. KaaTipencikenitc otAhcaahkoni tahsh Saamihsan okii otihsikoon ekii mashkawisiishkaakotc, i'iweni hsa shinootaakan kaakii mamaancikwahpisotc onihkink, oninciink kaye okii inentaan taapishkoo kashkikwaacikaneyaap kaa⁠caakisotc, miitahsh kaa⁠ishi shashenihketc.

¹⁵ Miihsh Saamihsan kaakii mihkank oshki maanshimihtatimoowi otaamihkanikekan. Mii 'iweni kaah⁠tepinak ekii aapacihtootc ekii niiwana'waatc mitaahswaahk (1,000) ininiwa'.

¹⁶ Miitahsh kaa⁠ihkitotc, “O'owe hsa maanshimihtatimoowi otaamihkanikekan, nintishi'ayaakwiihtooshimaak, o'owe hsa maanshimihtatimoowi otaamihkanikekan, mitaahswaahk (1,000) ininiwak nintoonci nihsaak,” kii⁠ayihkito.

¹⁷ Ahpii tahsh i'i kaa⁠ishkwaa ihkitotc, ninkoci okii ahpakitoon i'i otaamihkanikekan. Miitahsh kaa⁠ishi wiintank kaakii ishi'ayaatc Otaamihkanikekaniwi pihkwatinaank ekii ishinihkaatank.

¹⁸ Wiinke tahsh Saamihsan kii⁠noonteyaapaakwe, miihsh kaa⁠ishi kanoonaatc kaaTipencikenitc ekii'inaatc, “Ekii ishi'atc itahsh kitanohkii'aakan ci⁠kihci shaakoocihtwaatc, kiwiih pakitinihsh ina ci⁠kawaapaakweyaan, ci⁠shaakooci'iwaatc itahsh iki kaa⁠kihkinawaatashakeshwaahsiwintwaa?” kii‑ihkito.

¹⁹ Miitahsh Kishemanitoon kaakii ishihtoonitc eshi wiimpahkamikaanik ci⁠taashkahkamikihsenik i'imaa Liihaaink, miihsh i'imaa nipiini kaa⁠onciciwaninik. Ahpii tahsh kaa⁠minihkwetc kii⁠mashkawamanci'o, ekiih kiiwe mashkawaatisitc. Shaakowaani moohkiciwan (En Hakkore) okii ishinihkaataan i'imaa kaakii oncihsenik nipi, keyaapi tahsh noonkom kaa⁠kiishikaninik ayaani weti Liihaaink ayaawinink.

²⁰ Niishtana tahso pipoon hsa okii onaahkonaa' Isriyala' mekwaa Pilistii kaatinowinitc kii⁠tipenimikonitc.