ᐅᓈᑯᓂᑫᒃ 14 - Ojibwe Kihcimasina'ikan

Saamihsan Kiiwiiwitc Ihkwewan Wenciinitc Timnah Ootenaank

¹ Saamihsan (Samson) hsa kii‑ishaa Timnah (Timnah) ootenaank, miitahsh kaakii waapamaatc ihkwewan i'imaa wenciinitc. Pilistiiwininiwan (Philistines) hsa kii⁠otetewan.

² Kaah⁠pikiiwetc itahsh okii wiintamawaan oteten, omaamaan kaye o'o ekii'inaatc, “Ninkii waapamaa hsa ihkwe Timnah wenciitc, Pilistiiwihkwe tino, taka noonkom naasihkamawihshik ci⁠wiiwiyaan,” ekii'inaatc.

³ Miihsh o'o kaa'ikotc oteten, omaamaan kaye, “Kaawiin ina ayaahsii ihkwe ci⁠onciitc kitinawemaakanihkaank, komaa kaye o'omaa eshi'ayaawaatc kiwiitaatisiimaakaninaanik? Mii na 'i eshinaakwahk memwehc ci⁠ontinihkweweyampan weti eshi'ayaawaatc kehkinawaatashakeshwaahsiwintwaa Pilistii kaatinowiwaatc,” okii'ikoo'. Miihsh o'o kaa'inaatc oteten, “Maacaan naasihkaw, etatawe ohsha niminonawaa,” okii'inaan.

⁴ Oniiki'ikoo' itahsh kaawiin okii kihkentansiini kaaTipencikenitc inankwana i'iweni otishihcikewinini, aaniihsh okii nanaantohko'aani Pilistii kaatinowinitc. Mii iitok i'i ahpii Pilistii kaatinowiwaatc kaakiih tipenimaawaatc Isriyala'.

⁵ Saamihsan itahsh okii maacii wiiciiwaan oteten, omaamaan kaye ekii maamawi ishaawaatc Timnah ootenaank. E⁠ani takohshinowaatc itahsh eshi'ayaanitc eshi kihtikaasonitc shoomina' i'imaa Timnah, okii waapamaan hsa oshki mihshipishiwan eh⁠piicipahtoonitc e⁠noontaakosinitc.

⁶ Miitahsh kaaTipencikenitc otAhcaahkoni kaakii otihsikotc ekii mashkawisiishkaakotc. Miitahsh mihcininc iko kaa⁠ishi piihsipinaatc ekiih tootawaatc kaa⁠tootawimintc maanatihkoonhsan. Kaawiin itahsh okii wiintamawaahsii' oniiki'ikoo' aaniin kaa⁠ishihciketc.

⁷ Miitahsh kaa⁠ishi ishaatc ekii awi kakanoonaatc ini ihkwewan; wiinke hsa piko okii minwenimaan.

⁸ Ahpii tahsh naanaake e⁠ishihsenik e⁠naasihkawaatc ini ihkwewan, kiih⁠pahke hsa ewii waapamaatc mihshipishiwan kaakii nihsaahpan. Miitahsh kaakii waapamaatc e⁠paahtiinonitc aamoo', aamoowi siinsipaahkwat kaye e⁠ayaanik i'imaa mihshipishiwiiyawink.

⁹ Okiih kwaapipitoon hsa tahsh i'i aamoowi siinsipaahkwat ekii ani maacaatc, okii ani miicin itahsh e⁠ani papimohsetc. Wetihsaatc itahsh oteten, omaamaan kaye, okii ahshamaa', miihsh kaa⁠ishi miicinitc. Kaawiin itahsh okii wiintamawaahsii' mihshipishiwiiyawink ekii ontinank i'i aamoowi siinsipaahkwat.

¹⁰ Oteten tahsh okii anta waapamaani ini ihkwewan. Miitahsh Saamihsan weti kaah⁠tashi wiihkwanketc, mii hsa 'i kaa⁠nihtaa ishihcikewaatc oshkiniikiwak kii⁠wiitikewaatc.

¹¹ Ahpii hsa tahsh kaa⁠waapamintc, kiih⁠piitamawaa nihsimitana (30) ininiwa' ci⁠wiiciiwikotc.

¹² Miitahsh Saamihsan kaa'inaatc i'i ininiwa', “Taka kiwii wiintamawininim mayaki ihkitowin kekoon kaa⁠ihkitoomakahk. Kiishpin itahsh wiintamawiyek aaniin ehkitoomakahk cipwaa ishkwaahsek o'o niishwaahsokiishik kaa⁠wiihkwantiiwahkamikahk, kika miinininim hsa nihsimitana (30) kaa⁠soonkahkin nihtamishkikanan, nihsimitana (30) kaye kikishkikanan ke⁠meshkosihkamek.

¹³ Kiishpin itahsh wiin kashkihtoohsiwek ci⁠wiintamawiyek, miitahsh eshinaakwahk kiinawaa ci⁠miishiyek nihsimitana (30) kaa⁠soonkahkin nihtamishkikanan, nihsimitana (30) kaye kikishkikanan ke⁠meshkosihkamaan,” okii inaa'. Miihsh o'o kaa'ikotc, “Awihsa, wiintamawihshinaam i'i mayaki ihkitowin kekoon kaa⁠ihkitoomakahk, ci⁠noontamaank,” okii'ikoo'.

¹⁴ Miitahsh Saamihsan kaa⁠ihkitotc, “A'a hsa kaa‑amowetc, kekoon i'imaa kii⁠onciini ke⁠miicinaakaatenik. A'a hsa kaa⁠soonkisitc, kekoon kaa⁠shiiwaninik i'imaa kii⁠onciini,” kii‑ihkito. Nihsokiishik itahsh e⁠ishihsenik, kaawiin okii kashkihtoohsiini ci⁠wiintamaakotc i'i mayaki ihkitowin kekoon kaa⁠ihkitoomakaninik.

¹⁵ Niiwikiishik itahsh e⁠ani ishihsenik, okii anta waapamaani Saamihsan wiiwan ekii'inaanitc, “Kakwe kashkim kinaapem ci⁠wiintamawiyamintc ehkitoomakaninik i'i mayaki ihkitowin kekoon kaa⁠ihkitoomakaninik. Kiishpin itahsh i'i ishihcikehsiwan, kika sahka'okoo, kitete kaye owaahkaa'ikan. Mii na 'i kaa⁠onci antomiyaank ewii wayeshi'iyaank,” okii'inaani.

¹⁶ Kii⁠mawiwan itahsh Saamihsan wiiwan ehpi naasihkaakotc ekii'ikotc, “Kishiinkenimish iinsan, kaawiin kisaaki'ihsii. Kikii miinaak niicipimaatisiik mayaki ihkitowin kekoon kaa⁠ihkitoomakaninik, kaawiin itahsh niin mahshi kiwiintamawihsii aaniin ehkitoomakahk,” okii'ikoon. Miihsh o'o kaa'inaatc, “Inashke, kaawiin ohsha awaac nintete, nimaamaa kaye ninkii wiintamawaahsiik, wekonen itahsh ke⁠onci wiintamawinaampaan,” okii'inaan.

¹⁷ Miitahsh kaa⁠ishi mawinitc kape niishwaahsokiishik (7) minihk iko kaakii wiihkwantiiwahkamikaninik. Kekahpii tahsh niishwaahsokiishik e⁠ishihsenik, okii wiintamawaan aaniin ehkitoomakaninik i'i mayaki ihkitowin kekoon kaa⁠ihkitoomakaninik, aaniihsh onsaam okii mikoshkaasomikoon. Miitahsh kaa⁠ishi wiintamawaanitc i'i ininiwa' owiici pimaatisiini ehkitoomakaninik i'i mayaki'ihkitowin kekoon itahsh kaa⁠ihkitoomakaninik.

¹⁸ Miitahsh i'i ininiwa' i'imaa ootenaank wenciinitc o'o kaa'ikotc cipwaa pankihshimonitc kiisihsoon, “Wekonen nawac kaa⁠shiiwank ahpiihc wiin i'i aamoowi siinsipaahkwat? Wekonen nawac meshkawisiimakahk ahpiihc wiin mihshipishiw?” okii'ikoo'. Miihsh Saamihsan kaa'inaatc, “Kiihshpin hsa nimpishihkiim aapaci'aahsiwekipan kiih⁠piikohkamikipicikeyek, kaawiin hsa kitaakii kihkentansiim ehkitoomakahk mayaki ihkitowin kekoon kaa⁠ihkitoomakahk,” kii‑ihkito.

¹⁹ Miitahsh kaaTipencikenitc otAhcaahkoni kaakii mashkawi naasihkaakotc. Weti tahsh kii‑ishaa ootenaank Ashkelan (Ashkelon) ekii awi nihsaatc nihsimitana (30) ininiwa' ekii mamashishkoonamawaatc kaa⁠kikishkaminitc. Miihsh kaa⁠ishi miinaatc i'i ininiwa' ke⁠meshkocihkonayaataminitc kaakii wiintamaakotc ehkitoomakaninik mayaki ihkitowin. Wiinke tahsh kii⁠nishkaatisi. Miitahsh kaa⁠ishi kiiwetc oteten otaawininiink.

²⁰ Saamihsan itahsh wiiwan kii⁠miikiwaakaniwiwan, ekii miinimintc seyaaki wiiciiwaatc kaakii wiicikaapawihtaakotc kii⁠kihci wiitikehpan.