ᐅᓈᑯᓂᑫᒃ 13 - Ojibwe Kihcimasina'ikan

Saamihsan Ahpii Kiinihtaawikitc

¹ Isriyalak (Israel) hsa miinawaa kii⁠maci'ishihcikewak enaahsamiinitc kaaTipencikenitc; okiih pakitinikowaan itahsh pisaan iko ci⁠tipenimikonitc Pilistii (Philistines) kaatinowinitc niimitana (40) tahso pipoon.

² I'i hsa ahpii kii⁠ayaa inini Menoowa (Manoah) e⁠ishinihkaasotc, ekii onciitc ootenaank Soorah (Zorah) ecikaatenik Tenink (Dan) ekii ontahkaanesitc. Wiiwan tahsh kaawiin okiih kashkihtoohsiini ci⁠ayaawaanitc apinoonciisha'.

³ KaaTipencikenitc itahsh otencalimini okii naakosiihtaakoon a'a ihkwe ekii'ikotc, “Inashke kaawiin noonkom kikashkihtoohsiin ci⁠ayaawatc apinoonciish, wiipa tahsh kika kikishkawaawahs, ci⁠nihtaawiki'atc kwiiwisenhs.

⁴ Aahpici hsa ayaankwaamisiihkan; keko minihkwehken shoominaapo, kaa⁠mashkawaak kaye minihkwewin, keko kaye miicihken miicim kaa⁠pakitinikohsiwek ci⁠miiciyek.

⁵ Kika kikishkawaawahs itahsh ci⁠nihtaawiki'atc kwiiwisenhs, kaawiin tahsh wiihkaa kashkipaason ci⁠aapataninik ohtikwaanink; aaniihsh a'a kwiiwisenhs ke⁠nihtaawikitc otoonci maacii tipinawewisiimikoon Kishemanitoon Naasaraayit (Nazirite) eh⁠tinowitc. Miitahsh a'a ke⁠pimaaci'aatc Isriyala' kaashi tipenimikonitc Pilistii kaatinowinitc,” okii'ikoon.

⁶ Miitahsh a'a ihkwe kaakiih pi'anta waapamaatc onaapeman ekii'inaatc, “Kishemanitoo otininiiman hsa ninkiih pi'anta waapamimik, ekii ishinaakosinitc taapishkoo kaa⁠ishinaakosinitc Kishemanitoo otencaliman, kii⁠kohtaani naakosiwan. Kaawiin itahsh ninkiih kakwecimaahsii aanti kaah⁠pi onciikwen, kaawiin kaye ninkii wiintamaakohsii owiinsowin.

⁷ Miihsh o'o kaa'ishitc, ‘Inashke kika kikishkawaawahs ci⁠nihtaawiki'atc kwiiwisenhs. Keko minihkwehken shoominaapo, kaa⁠mashkawaak kaye minihkwewin, keko kaye miicihken miicim kaa⁠pakitinikohsiwek ci⁠miiciyek. A'a hsa kwiiwisenhs nihtaawikitc oka onci maacii tipinawewisiimikoon Kishemanitoon Naasaraayit ci⁠tinowitc piinihsh ci‑ishkwaa pimaatisitc,’ ” okii'inaan.

⁸ Miitahsh Menoowa kaakii anami'ehtawaatc kaaTipencikenitc ekii'inaatc, “Oo Tepencikeyan, taka Kishemanitoo otininiiman kaakiih piicinisha'watipan miinawaa ta⁠takohshin ci⁠kihkino'amawiyamintc aaniin keshi ompiki'imankitc ini kwiiwisenhsan ke⁠nihtaawikinitc,” kii‑ihkito.

⁹ Kishemanitoon hsa tahsh okii noontaakoon Menoowa kaakii ishi anami'ehtawaatc. Miitahsh a'a ihkwe e⁠nanamatapitc mihshawahkamik, kaakii naasihkaakotc miinawaa Kishemanitoo otencalimini. Onaapeman itahsh Menoowawan kaawiin i'imaa okii wiiciiwikohsiin.

¹⁰ Weyiip hsa a'a ihkwe kii⁠ahpahtoo ekii awi wiintamawaatc onaapeman ekii'inaatc, “Inashke hsa a'a inini kaakiih piishaahpan otaanaank eh⁠kiishikaninik miinawaa ninkii naakosiihtaak,” kii‑ihkito.

¹¹ Miihsh Menoowa kaakiih pasikwiitc ekiih piminisha'waatc wiiwan. Ahpii tahsh kaa⁠otihtank eshi'ayaanitc ini ininiwan, miihsh kaa'inaatc, “Kiin ina inini kaakiih kanoonaahpan niwiiwan?” “Eya', niin ohsha!” okii'ikoon.

¹² Miihsh o'o Menoowa kaa'inaatc, “Ahpii hsa ishihsek kaa⁠ihkitoyan, aaniin itahsh keshi pimaatisitc a'a kwiiwisenhs, aaniin kaye ke⁠inanohkiitc?” okii'inaan.

¹³ KaaTipencikenitc otencalimini hsa o'o okii'ikoon, “Mii hsa 'i eshinaakwaninik kahkina ci‑ishihciketc kiwiiw kaakii'inak.

¹⁴ Kaawiin hsa oka miicihsiin kekoon wenciimakaninik shoominaahtikonk, kaawiin kaye ta⁠minihkwehsii shoominaapo, meshkawaakamininik kaye minihkwewin. Kaawiin kaye oka miicihsiin kaa⁠manaa miicinaakaatenik kekoon; mii hsa 'i ke⁠ishihciketc kahkina kekoon kaakii inakipan,” okii'ikoon.

¹⁵ Miitahsh Menoowa kaa'inaatc ini encalan, “Taka hsa mii 'omaa ayaan, ci⁠kwayaancihtamaakooyan maanatihkoonhs,” okii'inaan.

¹⁶ Miihsh kaa'ikotc ini encalan, “Mihsawaa hsa ko o'omaa aana kihciwiniyan, kaawiin hsa ninka miicihsiin kimiicimim. Kiishpin itahsh wiin kwayaancihtooyek waah⁠pakitinaahsowaakeyek, kaaTipenciketc hsa pakitinamawaahkek i'iweni,” okii'ikoon. Kaawiin iitok okii kihkenimaahsiin e⁠aawinitc kaaTipencikenitc otencalimini.

¹⁷ Miihsh o'o Menoowa kaa'inaatc ini kaaTipencikenitc otencalimini, “Aaniin itahsh eshinihkaasoyan, ci⁠kihtenimikooyan ahpii tepwe ishihsek kaa⁠ihkitoyan?” okii'inaan.

¹⁸ O'o tahsh okii'ikoon ini kaaTipencikenitc otencalimini, “Wekonen itahsh wenci kakwecimiyan eshinihkaasoyaan, e⁠maamahkaatentaakwahk itahsh?” okii'ikoon.

¹⁹ Miihsh Menoowa kaakii otaahpinaatc oshki maanatihkoonhsan, tako kaye pahkweshikaniminan, ekiih pakitinamawaatc i'imaa ahsiniink kaaTipencikenitc. Miihsh kaakii maamahkaacihcikenitc mekwaa Menoowa, wiiwan kaye eh⁠kanawaapamaawaatc.

²⁰ I'imaa tahsh kaashi pakitinaahsowintc i'i ishkoteni kihci kiishikonk inahke kii‑inahkoneni. Miitahsh i'imaa ishkotenk ini kaaTipencikenitc otencalimini kaa‑ani ishi ishpihshkaanitc. Menoowa tahsh wiiwan kaye o'o e⁠inaapihshinowaatc, mii hsa 'i mihtahkamik kaa⁠ishi animihkopani'owaatc.

²¹ Ahpii tahsh ini kaaTipencikenitc otencalimini miinawaa ekii onci naakosiihtaakohsik mii 'i Menoowa, wiiwini kaye, kaakiih kihkentamowaatc kaaTipencikenitc otencalimini e⁠aawinitc ini.

²² Miihsh Menoowa kaa'inaatc wiiwan, “Mii hsa 'i tepwe ci⁠nipoyank, kikii waapamaanaan iitok Kishemanitoo,” kii‑ihkito.

²³ O'o tahsh wiiwan okii'ikoon, “Kiishpin hsa kaaTipenciketc inentankipan ewii nihsinank, kaawiin iitok otaakii minwaapantansiin kaakiih pakitinamawank kaa‑ankwaahkitenik tino pakitinaahsowin, pahkweshikaniminan kaye, kaawiin kaye kitaakii waapanta'ikohsiinaan kahkina ono, kaawiin kaye kitaakiih pakitinikohsiinaan ci⁠noontamowank ono o'o ishi ahpii,” okii'ikoon.

²⁴ Miitahsh a'a ihkwe kaakii nihtaawikinaawahsotc ekii ayaawaatc kwiiwisenhsan; Saamihsan ekii ishinihkaanaatc. A'a tahsh apinoonciish kii⁠ani ompiki, ekiih shawenimikotc kaye kaaTipencikenitc.

²⁵ KaaTipencikenitc otAhcaahkonini hsa kii⁠maatanohkiiwan opimaatisiwinink kii⁠ayaatc kaakii ishi kapehshinitc Tenink (Dan), i'imaa nahsawaya'ii ootenaank Soorah (Zorah), ootenaank Eshteyol (Eshtaol) kaye.