ᐄᐸᕒᐆᐗᒃ 12 - Ojibwe Kihcimasina'ikan

Kishemanitoo Kaa'oyoohsimintc

¹ Kiinawint itahsh wiin, e'aayaawaatc ehpaahtiinowaatc awiyak waahkaaya'ii e'onsaapaminankwaa ehkanawaapaminankwaa, taka tahsh wepinantaa kahkina kekoon kaawanishkwe'ikoyank, i'i kaye macitootamowin kaakihciwishkaakoyank. Taka kakweshashiipentantaa o'o kaapimipa'itiyank ehkakwecihkashiweyank, niikaanaya'ii kaaonahtamaakooyank.

² Taka mooshak kanawaapamaataa Ciisahs kaakii'maacihtootc, kaakiihkiishihtootc kaye kitepweyentamowininaanin. Kaawiin itahsh kiihpakiciihsii aanawiin ekiihkihkentank cinihsintc aashiteyaahtikonk, aanciko tahsh kaawiin okiihpapaapisiskentansiin kaakiiwii'ishiakaci'intc, aaniihsh okiihkihkentaan i'i minwentamowin kaakiihpii'ikotc. Inashke tahsh noonkom Kishemanitoon owiitapimaan, okihcinihkiniink inahke e'ishiapitc.

³ Taka naanaakatawentamowaahk aaniin kaa'ahpiihcishashiipentank maawac kaakii'ishishiinkenimikotc omacaatisii', keko tahsh kekiinawaa pakiciiwentankek, keko kaye noonte⁠aanawencikehkek.

⁴ Kiinawaa aaniihsh kaawiin mahshi wiihkaa kitooncipehshwaapantansiim cinihsikooyek i'i kaamiikaatamek macitootamowin.

⁵ Aasha na kikii'waniihkem kaakii'ikooyek, ekiihkanoonikooyek cikakwemashkawentamek, Kishemanitoo e'okosihsiminek, e'ihkitotc: “Ninkosihs, pisintan ahpii kaaTipenciketc kiimaamiinomihk, Keko kaye macentanken ahpii kiikihcinooci'ihk,

⁶ Aaniihsh kaaTipenciketc omaamiinomaan awiyan kaasaaki'aatc, Omaamiinopahshanshe'waan kaye kahkina awiyan kaaotaahpinaatc, ‘Ninkosihs’ ewii'ishinihkaanaatc.”

⁷ Shashiipentamok itahsh i'i kaaishikakwaatakihseyek e'maamiinopahshanshe'okooyek, aaniihsh Kishemanitoo kitootaakowaa taapishkoo e'oyOohsimek. Wiihkaa na ayaa okosihsimaa kemaamiinonikohsik oteten?

⁸ Kiishpin itahsh kiinawaa wiihkaa maamiinopahshanshe'okoohsiwek taapishkoo kaatootawintwaa iki kotak okosihsimaak, kaawiin iinsan tepwe kitookosihsimikoohsiim. Miitahsh taapishkoo pikwatoonshaanink enentaakosiyek.

⁹ Iki tahsh wiin kaakii'oteteyank o'omaa ahkiink kikii'maamiinopahshanshe'okonaanik, kikiihkihtenimaanaanik itahsh kaye. Nawac iitok taaonishihshin cipakitinitisohkantawankipan a'a kitahcaahkonaanink inahke kaashioTeteyank, cipimaatisiyank itahsh.

¹⁰ Iki hsa kaakii'oteteyank o'omaa ahkiink acina hsa ehta kikii'maamiinopahshanshe'okonaanik, wiinawaa kaakii'ishiminwaapantamowaatc. Kishemanitoo tahsh wiin ciminohsewank kaaoncitootawinank, ci‑ishiwiitoohkaasowank kaye i'imaa oKishemanitoowaatisiwinink.

¹¹ I'i hsa kahkina maamiinonikoowin mekwaa e'aapatahk kaawiin minwentaakwahsinoon, wiihsakentaakwan iitok. Shaakooc itahsh iki i'i nahke kaaishikihkino'amawintwaa naanaake kwayahkwaatisiwin okaontinaanaawaa, miitahsh i'imaa wenciik pisaanisiwin.

Kihkino'amaakoowinan, ayaankwaamimikoowinan kaye

¹² Inashke tahsh siitonihkenik kaa‑ayehkonihkeyek, siitokaatehtaak kaye kiinawaa kaaniinamikaateyek.

¹³ Pimohsaatamok ehta ini miihkanawan kaakwayahkomohkin, miitahsh awahshime cini‑ishiayaahsinok kaashimaahkisiteyek, ciniminoayaahcikaatek itahsh.

¹⁴ Weweni tahsh kakwewiicipimaatisiimihkwak kahkina ininiwak, kakwepehkaatisik kaye, aaniihsh kiishpin awiya ayaahsik pehkaatisiwin kaawiin okawaapamaahsiin Kishemanitoon.

¹⁵ Ayaankwaamisik itahsh awiya cinoonteaanawentansik Kishemanitoon okishewaatisiwinini. Keko kaye ta‑ayaahsii awiya keishinaakositc taapishkoo macaahtik kaamoohkikitc keoncimaashihsewaatc awiyak. Tapaahtiinowak iitok keonciwiini'intwaa.

¹⁶ Keko kaye awiya tapihshikwaatisihsii, keko kaye awiya ta‑ayaahsii ci‑ishikakiipaatisitc taapishkoo Iihswaa (Esau). Peshik wiihsiniwinink iitok okii'inataawaaken kekiihtipinawewisihpan wiin nihtam ekii'nihtaawikitc.

¹⁷ Kikihkentaam itahsh naanaake ekii'antawenimaatc oteten cimiinikotc Kishemanitoon oshawencikewinini, kii'aanawentaakosi tahsh. Aaniihsh kaawiin okiihkashkihtoohsiin cikiihtootansikipan, aasha kaakii'ishihciketc, aanawiin ekii'mamawitc weweni ekiihkakweaancihtootc kaakiihtootankipan.

¹⁸ Kaawiin itahsh kiinawaa kipinaasihkansiim i'i kihciwaciw kekiihsaaminikaatekipan, kaaishikishahkwanek kaye ishkote, kaaishikashkiitipihkahk kaye, kaaishikashkiitipihkaanahkwahk, kaaishi kihci kishipaayaanimanohsek kaye.

¹⁹ Kaawiin kaye kipiishaahsiim kihcipootaacikan kaaishinoontaakohcikaatek, i'imaa kaye kaa'ishinoontawintc awiya ehkiikitotc. Iki iitok kaakii'noontawaawaatc ehkiikitonitc, kii'ishipakohsenimowak keyaapi ewii'noontawaahsikwaa.

²⁰ Aaniihsh kaawiin okiihkashkihtoohsiinaawaa cinoontamowaatc kaakii'inintwaa: “Pooshke hsa aya'aawihsh saamishkank i'i kihciwaciw, mii hsa eshinaakwaninik ciniiwana'ikaniwitc ahsinii' ciaapatisinitc.”

²¹ Miitahsh kaa'ahpiihci sekaapihshinowaatc, mii 'i Moosihs (Moses) kaa'ihkitotc: “Wiinke hsa ninininkishkaa ehpiihtaanimisiyaan.”

²² I'imaa tahsh kiinawaa kihciwaciwink Saayan (Zion) kaaishinihkaatek kikii'ishitakohshinim. Mii 'i iitok i'i kihcikiishikoowi Ceroosalam (Jerusalem), okihciootenaam kaapimaatisitc Kishemanitoo, ekii'ishitakohshinek kaaishiayaawaatc mitaahswaahk mitaahswaahk encalak;

²³ ekii'ishitakohshinek kaye kaaishiminwentamonaaniwank kaaishimaamawiinonitc Kishemanitoo nihtam kaaokosihsimaatc, owiinsowinini kaaoshipii'ikaatenikin kihcikiishikonk; ekiihpinaasihkawek kaye Kishemanitoo kaatipaahkonaatc kahkina pemaatisinitc. Kipitakohshinim kaye kaaishiayaanitc otahcaahkowaa' iki kwayahk pemaatisiwaatc aasha kaakiih kiishi ishinaakosi'intwaa.

²⁴ Ekii'naasihkawek kaye Ciisahs kaanaakacihtootc oshkiahshotamaatiwin; ekiihpitakohshinek kaye kaakii'ishi piiwaakamiwepinikaatenik omiskwiim, nawac kaaminwahshotamaakemakahk ahpiihc wiin Epal (Abel) kaakii'ishi pakitinaahsokopanen.

²⁵ Ayaankwaamisik itahsh, pisintawihk a'a kaakakanooninek. Iki hsa kaakiihpisintawaahsikwaa ini kaakiihtashintamaakowaatc i'i tipaacimowin o'omaa ahkiink, kaawiin kiihshaapwiihsiiwak. Nawac itahsh kiinawint kikananiisaanisimin cishaapwiihsiwank kiishpin pisintawaahsiwank a'a kihcikiishikonk kaaonciayaankwaamiminank.

²⁶ Ahpii tahsh ekiihkiikitotc kiihkoshkohseni ahkiini. Noonkom itahsh wiin kii'ishiahshotamaake: “Keyaapi aapitink ninkaishihcike, kaawiin ehta i'i ahki ninkakoshkowepinansiin, i'i hsa kaye kihcikiishik ninka tako koshkowepinaan.”

²⁷ I'i tahsh kaakii'ihkitotc: “Keyaapi aapitink ninkaishihcike,” mii 'imaa eshiwaapantamowank ini kaakii'oshihcikaatekin ewiihkoshkowepinikaatekin, ewii'otaahpinikaatekin kaye. Ini tahsh kekoonan kaakashkihcikaatehsinokin ciwahkawiwepinikaatekin, miiwan hsa ini ehta keayaakin.

²⁸ Taka tahsh, miikwehciwentantaa kekiinawint e'miinikooyank ci‑ishi⁠wiitoohkaasoyank i'i Kishemanitoo kaashitipenciketc, kaakashkihcikaatehsinok ciwahkawiwepinikaatek. Taka kaye miikwehciwenimaataa, ci‑ishianami'ehtawank Kishemanitoo inahke kaaishiminwaapaminank. Taka kaye anami'ewikihci‑inenimaataa, cikohtaanenimank kaye.

²⁹ Aaniihsh kiKishemanitoominaan ishikohtaanentaakosi taapishkoo ishkote kaa‑ankwaahkisikemakahk.