Haakeaai 1 - Ojibwe Kihcimasina'ikan

KaaTipenciketc Kii'anoohkiitc Cikiiwe'oshihcikaatenik Kihci anami'ewikamik

¹ Niishopipoon hsa kaa⁠kihciokimaawitc a'a Taraayahs (Darius) i'imaa Persha (Persia) ahkiink, peshik e⁠inakinsonitc ninkotwaahsokiisihsoon, mii hsa 'i ahpii kaaTipenciketc kaakiih kanoonaatc Haakeaaiwan (Haggai) ci⁠kanoonaanitc wekimaahkantaminitc Coota ahki, Sirapapal (Zerubbabel) eshinihkaasonitc wetetenitc Shiiyaltiiyalwan (Shealtiel) ci⁠kanoonaanitc kaye kihci anami'ewikimaan Caahshowaa (Joshua) eshinihkaasonitc wetetenitc Ciihosatahkoon (Jehozadak).

² Miitahsh o'o kaaTipenciketc kaaMaawaci mashkawisiitc kaa'inaatc Haakeaaiwan, “O'o hsa ihkitowak pemaatisiwaatc, ‘Kaawiin iitok mahshi ocihcihsehsinoon kaaTipenciketc okihci anami'ewikamik ci⁠kiiwe oshihcikaatenikipan.’ ”

³ Miitahsh o'o kaaTipenciketc kaa'inaatc Haakeaaiwan ci‑ihkitoohtamaakotc,

⁴ “Nimpimaatisiimak, mii na 'i aasha e⁠ishihsek kiinawaa ci⁠taanotamek menohcikaatekin waahkaa'ikanan niin tahsh wiin ninkihci anami'ewikamik e⁠nihshiwanaasinaakwahk.

⁵ Miitahsh o'o eninek kaaTipenciketc kaaMaawaci mashkawisiitc, Inashke, naanaakatawentamok eshihcikeyek.

⁶ Niipiwa' ihsa kikii kihtikem, aahpici tahsh pankii ehta kikii manishaam kaakiih kihtikaatamek. E⁠wiihsiniyek kaye, kaawiin itahsh kite wiihsinihsiim. E⁠minihkweyek kaye, kaawiin itahsh kite minihkwehsiim. E⁠pihcihkonayeyek kaye, kaawiin itahsh kite kiishoosihsiim. Kii⁠anohkiiyek kaye, kaawiin kite kashkihcikehsiim ke⁠ontaatisiyek.

⁷ Miitahsh o'o eninek kaaTipenciketc kaaMaawaci mashkawisiitc, inashke naanaakatawentamok eshihcikeyek.

⁸ Maacaak ishaak weti kaashi kihci pihkwatinaak, ci⁠naasihkawekwaa mihtikook ke⁠aapaci'ekwaa ci⁠kiiwe oshihtooyek kihci anami'ewikamik. Mii hsa i'iwe ke⁠minwaapantamaan, miitahsh kaye i'imaa kwayahk ke⁠tashi kihci inentaako'ikooyaan.”

⁹ “Niipiwa' hsa kikiih tanentaam kekoonan cikii manishamekipan, aahpici tahsh pankii ehta kekoon kikii ontinaam. Ahpii tahsh eh⁠pikiiwewitooyek ninkoci hsa ninkii ishi pootaataanan ci⁠caaki wepaahsinkin. Wekonen tahsh i'i kaakii onci ishihcikeyaan? Onsaam iitok ninkihci anami'ewikamikom e⁠nihshiwanaasinaakwahk, e⁠ontamiihkamek kiinawaa kiwaahkaa'ikaniwaan.

¹⁰ Kiinawaa hsa 'i kaa⁠onci shahki ayaahsinok, kekoon kaye kaa⁠onci nihtaawikihsinok.

¹¹ Niin hsa 'i kaa⁠ishihcikeyaan kaa⁠onci paahtek i'i kihtikewahki kaa⁠ishi papiihkwatinaak kaye. Mii kaye 'i kaa⁠onci paahtekin kaashi kihtikaatekin pahkweshikaniminan kaye kaashi kihtikaasowaatc shoominak, ini kaye kaashi kihtikaatekin aalip (olive) tinowiminan, misiwe kaye mihtahkamik kekoonan kaashi nihtaawikinkin. Ininiwak, aya'aawihshak kaye kaashi ayaawaatc, wekonen hsa piko kekoon kaa⁠kakwe nihtaawikihtooyek, mii hsa 'i kaa⁠onci paahtek.”

Pemaatisiwaatc Kiina'ihtawaawaatc KaaTipencikenitc

¹² Miitahsh a'a Sirapapal eshinihkaasotc wetetetc Shiiyaltiiyalwan (Shealtiel) a'a kaye kihci anami'ewikimaa Caahshowaa (Joshua) eshinihkaasotc wetetetc Ciihosatahkoon (Jehozadak), iki tahsh kaye kahkina pemaatisiwaatc kaakiih pikiiwewaatc, Paapilan (Babylon) ahkiink kaakii ishiwinintwaapan kii‑ishihcikewak Kishemanitoon kaaTipencikenitc kaakii'ikowaatc. Okiih tepwehtawaawaan Haakeaaiwan (Haggai) ehkitonitc ehkanootamawaanitc kaaTipencikenitc. Okii kohsaawaan kaaTipencikenitc.

¹³ Miitahsh Haakeaai kenootamawaatc kaaTipencikenitc kaakii wiintamawaatc pemaatisinitc aaniin ehkitonitc kaaTipencikenitc, “Niin ihsa kiwiiciiwininim,” kitikowaa kaaTipenciketc.

¹⁴ Miitahsh kaaTipenciketc kaa⁠ishi ompi'aatc otaahcaahkoniink kahkina awiyan ci⁠anohkaataminitc kihci anami'ewikamik. Miiwak itahsh oko, a'a wekimaahkantank Coota ahki, Sirapapal eshinihkaasotc wetetetc Shiiyaltiiyalwan. A'a kaye kihci anami'ewikimaa Caahshowaa (Joshua) eshinihkaasotc wetetetc Ciihosatahkoon, iki tahsh kaye pemaatisiwaatc Paapilan ahkiink kaakiih pionci takohshinowaatc. Miitahsh oko kaakii⁠maatanohkaatamowaatc okihci anami'ewikamikoni kaaTipencikenitc kaaMaawaci mashkawisiinitc oKishemanitoomiwaan,

¹⁵ o'o ishi ahpii niihshtanashiniiwin kii‑inakinsonitc ninkotwaahsokiisihsoon e⁠ani niishopipoonakaanik kii⁠kihci okimaawitc a'a Taraayahs (Darius) i'imaa Persha (Persia) ahkiink.