Esara 6 - Ojibwe Kihcimasina'ikan

Maawac Kihciokimaa Saairahs Kiimihkikaatenik Kaakii'inaahkonikekopanen

¹ Mii 'iwe kaakii onci onaahkoniketc kihciokimaa Taraayahs (Darius), ci⁠kakwe mihkikaatenikin aaniin eshipii'ikaatenikin kehte oshipii'ikanan kaashi kanawencikaatenikin kihci kekoonan shikwa kaa‑akintenikin Paapilan (Babylon) kihci ootenaank.

² Weti tahsh kii‑ishi mihkikaateni kihci ootenaank Ekipahtaana (Ecbatana), Miitiya (Media) ahkiink masina'ikan tetipiikinikaatenik. Miihsh o'o kaa⁠ishipii'ikaatenik,

³ “Nihtam ahpii kaa‑ahkiiwaninik kaa⁠maacii kihciokimaawitc Saairahs (Cyrus), mii hsa kaa⁠inaahkoniketc eh⁠tashintank Kishemanitoon okihci anami'ewikamikoni eyaanik ootenaank Ceroosalamink, ‘Taka kihci anami'ewikamik ta⁠tashi kiiwe oshihcikaate, ci⁠ayaak ke⁠tashi pakitinaahsonk, ci⁠tashi pakitinikaatekin kaye tino kaa‑ankwaahkisikaatekin. Shaankahsimitana (90) tahso misit ci⁠ahpiihtaak, shaankahsimitana (90) tahsh tahso misit ci‑inikohkwateyaak.

⁴ Entahso nihsink ci⁠kishipaa aakwiihtoowaapihkihshinowaatc kihci ahsiniik, shikwa tahsh aapitink kihci mihtikook. Minihk hsa ko ke⁠inakintek ta⁠onci tipa'ikaate i'imaa kihciokimaawi shooniyaank.

⁵ Ini hsa kaye aapacihcikanan wesaawi shooniyaa waapihkowankin, weyaapaapihko shooniyaa waapihkowankin kaye wenci tipentaakwahkin Kishemanitoo okihci anami'ewikamikonk, Nepakanaasar (Nebuchadnezzar) kaakiih piitootc o'omaa Paapilan ahkiink kaakii onci piitookopanen eyaanik Ceroosalamink; mii hsa ini ke⁠kiiwewicikaatenikin, ci⁠kiiwe pakitinikaatenikin Kishemanitoon okihci anami'ewikamikoniink weti Ceroosalamink,’ ” kii‑ishipii'ikaateni.

Maawac Kihciokimaa Taraayahs Kii'anoohkiitc Cipoonanohkiinaaniwansinok

⁶ Miitahsh o'o Maawac kihciokimaa Taraayahs kaa⁠ishi nahkwepii'iketc, “Taka hsa tahsh kiin Tahtiinaai (Tattenai) wekimaahkantaman Eshi ninkaapii'anowank Iyoohparetiis siipi, kaye kiin Shiihtar Posinaai (Shethar Bozenai), iki kaye kiicikimaamiwaak eyaawaatc weti ahkiink, keko weti ishaahkek.

⁷ Keko wanashkwe'aahkekwaanik e⁠anohkaatamowaatc Kishemanitoon owaahkaa'ikanini. Taka pisaan tepenimaawaatc Coowa', iki kaye kaa⁠niikaanisiwaatc Coowa' oka kiiwe oshihtoonaawaa Kishemanitoon owaahkaa'ikanini kaakii ishi patahkitenikipan.

⁸ Miitahsh kaye o'o eni inaahkonikeyaan, o'o ci‑ishi wiici'ekwaapan iki kaa⁠niikaanisiwaatc Coowak kaa⁠kiiwe oshihtoowaatc i'i Kishemanitoon owaahkaa'ikanini, i'imaa kihciokimaawi shooniyaank ci⁠onci tipa'ikaatenikin minihk ke⁠caakinikewaatc, ci⁠kipihcihsehsinok i'i anohkiiwin. A'a shooniyaa ci⁠onciitc taakihs (tax) tepa'ikaaniwank i'imaa Eshi ninkaapii'anowank Iyoohparetiis siipi.

⁹ Wekonen itahsh iko ke⁠noontehsenik ta⁠miinaawak entahso kiishik eshi antotamaakewaatc anami'ewikimaak Ceroosalamink. Ta⁠miinaawak aape pishihkiinhsa', aape maanahcaanihsha', komaa kaye aape maanahcaanihshenhsa', ke⁠ankwaahkisamawaawaatc Kishemanitoon eyaanitc kihcikiishikonk. Komaa kaye noontehsewaatc pahkweshikaniminan, shiiwihtaakan, komaa kaye shoominaapo, komaa kaye aalip pimite, oncita piko ta⁠miinaawak.

¹⁰ Miitahsh tino pakitinaahsowinan menwaapantaminitc ci⁠pakitinamawaawaatc Kishemanitoon eyaanitc kihcikiishikonk, ci⁠anami'ehtamawiwaatc niin e⁠kihciokimaawiwak, ninkosihsa' kaye ci⁠onci minohseyaank.

¹¹ Miitahsh eni inaahkonikeyaan awiya hsa ko ke⁠piikonank o'o inaahkonikewin, mii hsa ci⁠otaahpinikaniwinitc aahswahko'ikanaahtikoon i'imaa owaahkaa'ikanink. Miiwan hsa ini ke⁠ciipohkosonitc, ci⁠aapatisinitc ci⁠pashipoocii'ontc ci⁠ompahkwa'waakaniwitc. Owaahkaa'ikan hsa kaye ta‑ankopicikaateni ta⁠ohkowepa'ikaateni kaye, o'onahke ekii ishi mamaashiitc.

¹² Taka hsa Kishemanitoo kaakii onentank weti Ceroosalamink ci⁠tashi anami'ehtawintc, oka shaakotenimaan awenenan iko tino kihciokimaan, awenena' iko kaye ke⁠tahswewaanakisinitc aapiinciko ke⁠kakwe aancihtoonitc o'o inaahkonikewin, komaa kaye kekakwe nihshiwanaacihtoonitc o'o kihci anami'ewikamik eyaanik Ceroosalamink. Niin ohsha Taraayahs o'o kaa⁠inaahkonikeyaan, shaakooc iko weweni ci⁠toocikaatek,” kii‑ishipii'ike.

Kihci anami'ewikamik Kiihkiishihcikaatek, Kiihkihtentaakohcikaatek Kaye Kishemanitoo Ehtipentank.

¹³ Ahpiihsh e⁠waapantamowaatc eshipii'ikenitc kihciokimaan a'a Tahtiinaai (Tattenai) tepentank Eshi ninkaapii'anowaninik Iyoohparetiis a'a kaye Shiihtar Posiinaai (Shethar Bozenai) eshinihkaasonitc, i'i kaye owiicikimaamiwaa' kii‑ishihcikewak mayaa kaakii inaahkonikenitc maawac kihciokimaan Taraayahsan (Darius).

¹⁴ Iki tahsh kaa⁠niikaanisiwaatc Coowak wiinke kii⁠minohseni e⁠oshihtoowaatc kihci anami'ewikamik. Kii⁠onci mashkawentamook hsa kaakii ishi kakiihkwenitc kenootamawaanitc Kishemanitoon Haakeaai (Haggai) eshinihkaasonitc, Sehkaraayawan (Zechariah) kaye kaakii ontahkaanesinitc Itoonk (Iddo). Miitahsh kaakiih ani kiishihtoowaatc mayaa kaakii ishi antawenimikowaatc Isriyalak oKishemanitoomiwaan, kaakii inaahkonikenitc kaye Saairahsoon (Cyrus), Taraayahsan kaye, ini kaye Aartasarkihsiis (Artaxerxes) kaakii anihke kihciokimaawinitc Persha (Persia) ahkiink.

¹⁵ Mii hsa kaakiih kiishihtoowaatc i'i kihci anami'ewikamik Etar (Adar) kiisihsoon ehpimakinsonitc, nihsin (3) e⁠inakinsonitc, ninkotwaahso pipoon e⁠ani ishihsenik kaa⁠kihciokimaawinitc Taraayahsan.

¹⁶ Miitahsh pemaatisiwaatc Isriyalak, anami'ewikimaak, Liipaai kaa⁠ontahkaanesiwaatc (Levites), iki tahsh kaye kaakii maaciinintwaapan ekiih pikiiwewaatc kii⁠wiihkwantiiwahkamikisiwak ekii ciihkahkamikisiwaatc ekii kihtentaakohcikaatenik kihci anami'ewikamikoni ci⁠tipentaminitc Kishemanitoon.

¹⁷ Ci⁠kihtentaakohtoowaatc hsa Kishemanitoon owaahkaa'ikanini, mii hsa 'o minihk aya'aawihsha' kaah⁠pakitinaahsowaakewaatc; ninkotwaahk (100) aape pishihkiwa', niishwaahk (200) aape maanahcaanihsha', niiwaahk (400) aape maanahcaanihshenhsa'. I'i tahsh mitaahshiniishin (12) aape maanatihkwa' kiih⁠pakitinaahswaawa' ke⁠onci poonentamawimintc kahkina Isriyala', pehpeshik kaashi mitaahshiniishwewaanakisiwaatc.

¹⁸ Miitahsh kaa⁠ishi oninaawaatc anami'ewikimaa' pepahkaanonk, Liipaai kaa⁠ontahkaanesinitc kaye, pepahkaan ke⁠tatananohkiihtawaanitc Kishemanitoon i'imaa Ceroosalamink, ekii ishihcikewaatc eshihsininik masina'ikan eshi oshipii'ikaatenik Moosihs (Moses) otoonahshowewin.

Pimaaci'ikoowi Wiihkwantiwin Kiihkanawencikaatek

¹⁹ Miitahsh iki kaakii maaciinintwaapan ekiih pikiiwewaatc Isriyalak (Israel) kaakii wiihkwantiiwahkamikisiwaatc eh⁠kanawentamowaatc Pimaaci'ikoowi Wiihkwantiwin mitaahshiniiwin (14) e⁠inakinsonitc nihtam kiisihsoon.

²⁰ Kahkina hsa anami'ewikimaak, Liipaai kaa⁠ontahkaanesiwaatc kaye kii⁠anami'e pehki'itisowak ke⁠onci inakimintwaa ci⁠minwaapamikowaatc Kishemanitoon. Miitahsh Liipaai kaa⁠ontahkaanesiwaatc kaakii nihsaawaatc maanahcaanihshenhsa' ke⁠pakitinimintc Pimaaci'ikoowi Wiihkwantink i'i onci Isriyala' kaakii maaciinimintipan, i'i hsa kaye anami'ewikimaa', kewiinawaa tahsh onci.

²¹ Miitahsh iki Isriyalak kaakiih pikiiwewaatc okii amwaawaan kaa⁠pakitinaahsowaakaniwinitc. I'i hsa okii wiitoohpamikowaa' kahkina kaakii miitaakwehtaminitc nehpic kaa⁠wiinentaakwaninikin nehtaa ishihcikenitc kaa⁠Coowiwihsinik ekiih pi anta anami'ehtawaanitc kaaTipencikenitc weKishemanitoomiwaatc Isriyalak.

²² Niishwaahsokiishik (7) hsa kii⁠wiihkwantiiwahkamikisiwak ekiih ciihkentamowaatc ekii amwaawaatc pahkweshikanan wempisikaniwihsinik. Aaniihsh kaaTipencikenitc okiih ciihkentamo'ikowaan, ekii ishi'aanitc Ahsiiriya kihciokimaan ci⁠minwaapamikowaatc. Miiwan iitok ini kaakii wiici'ikowaatc e⁠oshihcikaatenik i'i kihci anami'ewikamik entashi anami'ehtawimintc Kishemanitoon, weKishemanitoomiwaatc Isriyalak.