Esara 5 - Ojibwe Kihcimasina'ikan

Tahtiinaai Kaa'ishipii'amawaatc Taraayahsan

¹ Miitahsh i'iwe ahpii kaakii maacii kakitowaatc ikiweniwak niishin kaa⁠kanootamawaawaatc Kishemanitoon kaa⁠ishinihkaasowaatc Haakeaai (Haggai) shikwa Sehkaraaya (Zechariah) oteten Itoo (Iddo) kaakii ishinihkaasonitc. Kishemanitoon owiinsowininiink okii ishi kakanoonaawaa' Coowa' i'imaa kaakii ishitaanitc Coota ahkiink i'imaa kaye Ceroosalam (Jerusalem) ootenank.

² Kii⁠noontamowaatc Sirapapal (Zerubbabel) shikwa Caahshowaa (Joshua) kaakii otetetc Caasataahkoon (Jozadak) kaakii ishi wiintamawintwaa mii 'i miina kaakii maacii anohkaatamowaatc kihci anami'ewikamik ci⁠kakwe kiishihtoowaatc. Ikiweniwak niishin (2) kaa⁠kanootamawaawaatc Kishemanitoon kii⁠wiici'iwewak kaye.

³ Ketahtawen iko Tahtiinaai (Tattenai) wekimaahkantank eshi ninkaapii'anowank Iyoohparetiis (Euphrates), a'a kaye Shiihtar Posiinaai (Shethar Bozenai), i'i kaye wiicikimaamiwa' kiihpi takohshinok i'imaa Ceroosalamink. Okiih kakwecimaawaan Coowa', “Awenen kaa'ininek ci⁠kiiwenaapaapihkinamek kihci anami'ewikamik kaye ci⁠naapahtooyek ini kaa‑aapatahkin,” okii'inaawaan. Okii oshipii'amawaawaan kaye kihci okimaan Taraayahsan (Darius) eh⁠kakwecimaawaatc ci⁠kakwe kihkentaminitc aaniin mayaa kihciokimaa Saairahs (Cyrus) kaakii inaahkonikekopanen aaniin ke⁠toocikaatenik kihci anami'ewikamik Ceroosalamink (Jerusalem).