Esara 3 - Ojibwe Kihcimasina'ikan

Isriyalak Ekiimaacihtaawaatc Miinawaa Kaakii'ishinihtaa'anami'aawaahpan

¹ Niishwaahsokiisihsoon (7) ehpimakinsonitc Isriyalak itahsh kaah⁠kapehshiwaatc eshi wa'ootenawaninik, kahkina kii⁠ohko naasihkotaatiwak i'imaa Ceroosalamink (Jerusalem) taapishkoo peshik ininiink ci‑ishi naakatawentamowaatc.

² A'a tahsh Ceshyoowa (Jeshua) kaakii otetetc Caasataahkoon (Jozadak), i'ish kaye wiitanami'ewikimaa', a'a hsa kaye Sirapapal (Zerubbabel) kaakii otetetc Shiiyaltiiyalwan (Shealtiel), i'ihsh kaye wiicihkiweya', miiwak hsa oko kaa⁠onaapihkinikewaatc aanti ke⁠tashi pakitinaahsoohtamawimintc Isriyalak oKishemanitoomiwaan. Mii 'imaa ci⁠pakitinikaatenikin pakitinaahsowinan tino kaa‑ankwaahkisikaatenikin taapishkoo kaakii ishipii'ikaatenik Moosihsoon (Moses) otoonahshowewininiink, Kishemanitoon kaakii otininiimikonitc.

³ Wawiinkehsh kaye aana ekiih kohsaawaatc pemaatisinitc i'imaa kaakii ishitaanitc ahkiink, aanciko tahsh okiih kiiwe naapaapihkinaanaawaan keshi pakitinaahsowintc, kaakii ishi kihtahtenikopanen. Miitahsh miina kaa⁠ishi maacii pakitinamawaawaatc kaaTipencikenitc pakitinaahsowinan tino enkwaahkisikaatenikin entahso kikishep, entahsonaakosh kaye.

⁴ Miihsh kaa⁠ishi wiihkwantiiwahkamikisiwaatc ekii naanaakacihtoowaatc i'i akawaahte'ikani wiihkwantiwin kaakii'itamowaatc ekii ishihcikewaatc eshipii'ikaatenik onahshowewin. Okiih pakitinamawaawaan kaye entahso kiishik minihk iko kaakii inahtamawaawintwaapanen ini tino pakitinaahsowinan wiinke enkwaahkisikaatenikin.

⁵ Miitahsh kaye kaa⁠ishihcikewaatc ekii pakitinaahsowaakewaatc kaa‑ankwaahkisikaatenikin tino. Okiih pakitinaanaawaan kaye tino pakitinaahsowinan kaakii nihtaa ishihcikewaahpan kii⁠oshkakoocininitc tipihki kiisihsoon, ini kaye pakitinikewinan kaakii nihtaa inaawintwaapanen ci⁠pakitinamawaawaatc kaaTipencikenitc ci⁠tipinawewisinitc, inihsh kaye wiinawaa ko kaakii inentamowaatc ci⁠miinaawaatc.

⁶ Niishwaahsokiisihsoon itahsh eh⁠pimakinsonitc, peshik e⁠inakinsonitc, mii hsa 'i ahpii kaakii maacii pakitinamowaatc pakitinaahsowinan enkwaahkisamawimintc kaaTipencikenitc. I'i hsa ahpii kaawiin mahshi okii onaapihkihsitoohsiinaawaa keshi patahkitenik kaaTipencikenitc otanami'ewikamikoni.

Kiimaacii'oshihcikaatek Kihci anami'ewikamik

⁷ Okii miinaawaa' itahsh shooniyaan i'i kaakii onaapihkihshimaanitc ahsinii', i'i kaye mihtikonaape'. I'i tahsh pemaatisinitc kaakii onciinitc ootenaank Saaitan (Sidon), Tayarink (Tyre) kaye okii ishinisha'amawaawaa' miicim, ke⁠minihkwenitc kaye, pimiteni kaye ke⁠kiishisehkwaakenitc, ci⁠piinaanitc kiishkaahtikoo' kihcikamiink inahke, weti tahsh Lepanan (Lebanon) ahkiink ci⁠onciwinaanitc. I'imaa tahsh Caahpa (Joppa) ootenaank inahke kekiih pi ishi piinaanitc aaniihsh mii 'i kaa⁠inaahkonikenitc Persha (Persia) ahkiink kihciokimaan Saairahs (Cyrus) eshinihkaasonitc.

⁸ Niishopipoon (2) itahsh e⁠ani ishihsenik ahpii kaakiih takohshinowaatc weti Ceroosalamink (Jerusalem) kaakii wii oshihtoowaatc i'i kihci anami'ewikamikoni, niishokiisihs hsa e⁠ani ishihsenik, mii hsa 'a Serapapal, a'ahsh kaye Ceshyoowaa (Jeshua), wiicihkiweyiwa' itahsh, okii maaciihkaanaawaa ekii oshihtoowaatc i'i kihci anami'ewikamikoni. Iki kaye anami'ewikimaak, Liipaai kaa⁠ontahkaanesiwaatc kaye, iki kaye kahkina Ceroosalamink kaakiih pionci takohshinowaatc Paapilan (Babylon) ahkiink kaakii pi onciiwaatc kii⁠maatanohkiiwak. Liipaai kaakiih ontahkaanesinitc hsa niishtana, awahshime kaye kaakii tahsopipoonwenitc okii onaapamaawaa' ci⁠naanaakacihtoonitc i'i kaakii oshihcikaatenik kaaTipencikenitc owaahkaa'ikanini.

⁹ A'a tahsh Ceshyoowa okosihsa' kaye, wiicihkiweya' kaye, a'ahsh kaye Katmiiyal (Kadmiel), okosihsa' itahsh kaye kaakii ontahkaanesiwaatc Hotapaaiya (Hodaviah) ini tahsh kaye Henataat (Henadad) okosihsini, wiicihkiweyini kaye, kahkina Liipaai kiih⁠ontahkaanesiwa'. Miihsh kaa⁠ishi maamawi naakaci'aawaatc i'i kaakii oshihtoonitc Kishemanitoon owaahkaa'ikanini.

¹⁰ Ahpii tahsh iki owaahkaa'ikek ekii maacii onaapihkinikewaatc keshi patahkitenik i'i owaahkaa'ikanini kaaTipencikenitc, anami'ewikimaak hsa kii⁠niipawiwak ekiih papiihciwaatc pootaacikanan ekiih tahkonamowaatc. Iki tahsh kaye Liipaai kaatinowiwaatc Esahp (Asaph) wentahkaanesiwaatc kii⁠niipawiwak ekii tahkonamowaatc matweyaapihkisicikanan ewii miikwehciwenimaawaatc kaaTipencikenitc. Kii‑ishihcikewak itahsh kaakii ishi kihkino'ikenikopanen Tepitoon (David) kaakiih kihciokimaahkantawaanitc Isriyala'.

¹¹ Miihsh kaa⁠ishi nikamowaatc ekii anami'ehtawaawaatc, ekii miikwehciwenimaawaatc kaye kaaTipencikenitc. Miihsh o'o kaakii naanahsaapi ina'amowaatc, “Aahpici e⁠minohciketc, kaawiin wiihkaa ta⁠poonihsehsinini i'i kaashi minotootawaatc Isriyala' mooshak.” Kahkina tahsh pemaatisiwaatc kii⁠kihci shashaakowewak ekii miikwehciwenimaawaatc kaaTipencikenitc aaniihsh aasha kii⁠onaapihkinikaateni keshi patahkitenik owaahkaa'ikanini kaaTipencikenitc.

¹² Iki niipiwa' kaa‑ahkiwensiiwiwaatc anami'ewikimaak, Liipaai kaa⁠ontahkaanesiwaatc kaye, kaa⁠niikaanishkamowaatc kaye taawinan, kaakii waapantamowaatc i'i nihtam kihci anami'ewikamikoni, kiih⁠kishiiwewak wiinke ekii mawiwaatc e⁠waapantamowaatc e⁠onaapihkinikaatenik i'i kaaTipencikenitc owaahkaa'ikanini. Aaninta tahsh kii⁠kihci shaakowewak kaa‑ahpiihci ciihkentamowaatc.

¹³ Kaawiin awiya' okii nihsitohtaakohsiiwaa' aaninta kaakii mawiwaatc, i'i kaye kaakiih ciihkentamowaatc, onsaam aaniihsh kii⁠kihci inwehkaasowaak. Aahpici hsa waahsa kii⁠onci tepihtaakosiwak.