Emahs 9 - Ojibwe Kihcimasina'ikan

KaaTipenciketc Otipaahkoniwewin Ehtashintenik

¹ Ninkii waapamaa tahsh kaaTipenciketc e⁠niipawitc kaa⁠ishi pakitinaahsowintc o'o ekii ihkitotc, “Wakicaya'ii hsa ishi pahkihte'o ahsiniik kaa⁠patahkisowaatc kaa⁠onci siitwahkitek kihci anami'ewikamik, miihsh i'i ci⁠koshkohsek kaashi patahkitek kihci anami'ewikamik. Ishpimink weti cishi piikohsewaatc iki ahsiniik ci⁠tahsoosowaatc ohtikwaaniwaank iki pemaatisiwaatc. Iki hsa ke⁠ishkwaahpinewaatc kaa⁠tashi miikaatiwintc tashi nihcikaniwiwak, kaawiin hsa awiya aapiinciko ta⁠shaapwiihsii.

² Mihsawaa hsa ko aana otihtaanihkewaatc waahsa anaamihk kaashi ayaanitc kaa⁠niponitc, mii hsa weti keshi kaahcitinakwaa cipi wakiciwinakwaa. Mihsawaa hsa ko ishpimink kiishikonk otihtamowaatc, mii hsa weti ke⁠pionci naashipinakwaa.

³ Mihsawaa hsa ko kaye ishi kaasowaatc weti wakicaya'ii waciink Kaarmal (Carmel) ecikaatenik, ninka antone'waak hsa, miihsh weti keshi kaahcitinakwaa. Mihsawaa ko kaye ishi kaasoohtawiwaatc ahshiciintim kihcikamiink, ninka anoonimaan hsa mihshikinepikoon ci⁠maakwamikowaatc.

⁴ Mihsawaa hsa ko kaye kaa⁠shiinkenimikowaatc maaciinikowaatc, ninka anoohkiiwaan hsa pashipa'ikewihkomaanink ci⁠onci nihsintwaa. Aasha ohsha ninkii onentam ewii maanshi tootawakwaa, kaawiin tahsh niwii minotootawaahsiik.”

⁵ KaaTipenciketc Kishemanitoo kaaMaawaci mashkawisiitc kiih⁠saaminank o'o ahkiini, mii 'i eshi koshkohsenik, iki tahsh i'imaa kaa⁠taawaatc ta⁠mawiwak. Misiwe hsa ahki kaa⁠koshkohsek ta⁠inentaakwan taapishkoo Naayal siipi Iicipahkiink kaa‑ayaak kaa⁠maamooshka'ank, kaa‑ayiskahtek kaye.

⁶ Wiin ohsha kaa⁠oshihtootc ke⁠ishitaatc weti ishpimink kiishikonk, wiin kaye kaa‑akwana'ank ahkiini aahsamikiishikoni e⁠akwana'ikaaketc. Wiin kaye kaa⁠kanootank nipiini kihcikamiink kaa‑ayaanik miitahsh eshi siikinank o'omaa misiwe ahkiink. KaaTipenciketc ihsa ishinihkaaso!

⁷ Miitahsh o'o kaaTipenciketc kaa⁠ihkitotc, “Kiinawaa pemaatisiyek Isriyalak kaatinowiyek, mii hsa peshikwan eneniminakook kaa⁠inenimakwaa pemaatisiwaatc Soten (Sudan) wenciiwaatc. Pilistii kaatinowiwaatc iitok Kariiht (Crete) ahkiink ninkii onci saakiciwinaak, ikihsh kaye Siiriya (Syrians) kaa⁠onciiwaatc Ker (Kir) ahkiink ninkii onci saakiciwinaak, taapishkoo kaakiih tootawinakook Iicipahkiink (Egypt) kii⁠onci saakiciwininakook.

⁸ Niin hsa kaaTipencikeyaan kaa⁠Kishemanitoowiyaan ninkanawaapantaan e⁠macinaakwaninik Isriyalak inahke kaashi okimaawiwaatc. Miitahsh kaawii onci nihshiwanaacihtaawak kaashi okimaawiwaatc. Cekap (Jacob) tahsh wiin opiiwesiima' kaawiin niwiih caaki'imaahsii'.”

⁹ “Ninka anoohkii hsa ci⁠wahkawi wepinintwaa pemaatisiwaatc Isriyalak taapishkoo mihtahkamik kaa⁠toocikaatek kii⁠nenaawinikaatek. Niwii wahkawiwepinaak hsa mekweya'ii e⁠ayaawaatc eshi'ayaanitc pemaatisinitc ewiih kakiikinakwaa awiya' kekoonini kaa‑ahpiihtentaakosihsinik.

¹⁰ Kahkina hsa omacitootamook eyaawaatc i'imaa mekweya'ii kaashi ayaanitc nimpimaatisiima', pashipa'ikewihkomaanink ta⁠onci nipowak. Mihsawaa ko iki kaye kaa⁠ihkitowaatc, ‘Nihshiwanaatisiwin hsa niinawint kaawiin ninka pakamishkaakohsiimin.’ ”

KaaTipenciketc Piciinak Ewiihkiiweminohse'aatc Isriyala'

¹¹ Miihsh kaaTipenciketc ehkitotc, “Piciinak ohsha ta⁠ocihcihse ci⁠kiishikahk ahpii kaawiih kiiwe oshihtaawak Tepit (David) kaakii ishi kihciokimaawihpan kaa⁠piikonaakwaninik ewiih kiiwe naapinaakwahk. Niwiih kiiwe oshihtoon waahkaayaapihkinikan, ewii ishihtooyaan kaakii ishinaakwahkipan otaanaank.

¹² Miihsh pemaatisiwaatc Isriyalak ci⁠shaakoocihtwaawaatc ci⁠mahkantwewaatc Iitam (Edom) ahkiink kaakii ishkohsenik, i'i kaye kahkina kaa⁠pepahkaanwewaanakisinitc pemaatisinitc kaakiih tipenimimakipan aapitink.” Mii hsa 'i ehkitotc kaaTipenciketc kaawii ishihtootc o'o ci‑ishihsenik.

¹³ Miitahsh o'o kaaTipenciketc ehkitotc, “Aasha ohsha ocihcihse e⁠ishi kiishikahk ahpii pahkweshikan nawac ci⁠kitaahtapikitc, kaawiin ta‑aacinaahcikaniwihsii ci⁠manishontc. Shoominak kaye nawac ta⁠kitaahtapikiwak ahpiihc wiin minihk kaa⁠tashiihkikaatek shoominaapo kii⁠oshihcikaatek. Shoominaapo hsa kaa⁠shiiwaakamihk kihci waciink ta⁠onci papaahpankikawin, kaashi pihkwatinaak hsa kaye ta⁠onciciwan.

¹⁴ Niwiih pikiiwewinaak hsa nimpimaatisiimak otahkiimiwaank. Oka kiiwe oshihtoonaawaan hsa ootenawan kaa⁠naniskohsininikin, miihsh i'imaa ke⁠ishitaawaatc. Oka oshihtoonaawaa hsa keshi kihtikaasonitc shoomina', ke⁠onci minihkwewaatc shoominaapooni. Oka oshihtoonaawaan kaye keshi kihtikewaatc, ci⁠miiciwaatc kaa⁠kihtikaatamowaatc.

¹⁵ Mii hsa 'i ke⁠tootawakwaa Isriyalak otahkiiwaank ewiih kiihtikaanakwaa, kaawiin tahsh miinawaa wiihkaa ta⁠onci pahkwatahkiipicikaniwihsiiwak i'imaa ahkiink kaa⁠miinakwaa,” mii 'i ehkitotc kaaTipenciketc kiKishemanitoomiwaa.