Emahs 8 - Ojibwe Kihcimasina'ikan

Emahs Kiihpawaatank Peshikomashkohsiiwash Miicim

¹ Miitahsh o'o kaaTipenciketc Kishemanitoo kaa⁠ishinamo'itc, ekii waapanta'itc miicimimashkohsiiwashoni e⁠mooshkinenik kaakii atihtenik shiiwimiicim.

² Miihsh o'o kaa'ishitc, “Emahs (Amos) wekonen weyaapantaman?” Miihsh o'o kaa'inak, “Miicimimashkohsiiwash e⁠mooshkinek kaa‑atihtek shiiwimiicim.” Miitahsh kaaTipenciketc kaa⁠ishi nahkwehtawitc, “Mii ohsha 'i e⁠ocihcihsenik nimpimaatisiimak Isriyalak awahshime cikii ayaahsikwaapan. Kaawiin miinawaa niwii aantentansii ewii nana'ahsakwaa.

³ I'i hsa ahpii kiishikaninik, ini hsa nikamonan kaa⁠nihtaa ina'amowaatc i'imaa kihci anami'ewikamikonk, meshkwac hsa ta⁠mawihtaakwaniniwan. Misiwe hsa ta⁠piiwihshinook ke⁠nipowaatc. Kaawiin hsa awiya ta⁠noontawaahsii.”

Isriyalak Keshinihshiwanaatisiwaatc

⁴ Noontamok o'o kiinawaa kaa⁠wehsaani'ekwaa kaa⁠noontehsewaatc, kekwe nihshiwanaaci'ekwaa kaye ketimaakisiwaatc o'omaa ahkiink,

⁵ o'o e⁠ihkitoyek, “Ampehsh inaa weyiip poonihsek kaa⁠nihtaa wiihkwantiiwahkamikisink kii⁠oshkakoocink tipihkikiisihs, miinawaa ci⁠ataawaakeyank pahkweshikan. Pooni Anwepiiwi kiishikahk kaye miinawaa ci⁠paahkihsitooyank kitataahsoowikamikonaanin. Miihsh keshi kaantakincikeyank, ci⁠kakayeshi tipaapiishkoocikeyank ci⁠aapacihtooyank kaa⁠wayeshimiwemakahkin tipaapiishkoocikanan.

⁶ Kika atawaakemin kaye kekoon ehpiihtentaakwahsinokin pahkweshikaniminan ci⁠aahkwakintamank. Ketimaakisiwaatc hsa kika ataawemin ci⁠mihtanohkiihtawinankwaa kaa⁠tetipa'ansikwaa omasina'ikewiniwaan, aana kota minihk ehta e⁠masina'ikewaatc kaa⁠inakintenikin peshikwewaan mahkisinan.”

⁷ KaaTipenciketc itahsh Isriyalak weKishemanitoomiwaatc o'o ishi aayiici ahshotam, “Kaawiin hsa wiihkaa ninka waniihkenotamowaahsiinan omacitootamowiniwaan.

⁸ Miitahsh ahki ci⁠koshkohsek, kahkina awiya eyaatc o'omaa ahkiink ta⁠sekentam. Misiwe hsa ko o'o ahki ta⁠koshkohse ci‑inentaakwahk taapishkoo Naayal (Nile) siipi eyaak Iicipahkiink kii⁠wahkawaakamihsek kii⁠maamooshka'ank, kii⁠ayihskahtek kaye.

⁹ Miihsh o'o ehkitoyaan niin kaa⁠Maawaci Tipencikeyaan, mii ohsha 'i aasha e⁠ocihcihsek ci‑ishihcikeyaan ci⁠pankihshimotc kiisihs naawahkwenik, ci⁠kashkiitipihkahk kaye mekwaa kiishikahk.

¹⁰ Ninka kwehkinaanan hsa kaashi wiihkwantiiwahkamikisiyek ci⁠ani maanentamonaaniwank, kahkina kaye kinikamoniwaan kaa⁠ciihkihtaakwahkin ci⁠ani mawiwihtaakwahkin. Kika tootawininim kaye ci⁠kaashkipaatooyek kihtikwaaniwaan, ci⁠pihsihkamek kaye ahsapatapiiwekinoon. Miihsh ke⁠inentaakosiyek taapishkoo oniiki'ikomaak kaa⁠mawimaawaatc mehcipeshikonitc okosihsiwaan. I'ihsh ahpii ishi kiishikahk, mii 'i kahkina kekoon ci‑ishkwaahsek.”

¹¹ “Piciinak hsa ta⁠ocihcihse ci‑ishihcikeyaan o'omaa ahkiink ci⁠ayaahsinok miicim. Pemaatisiwaatc hsa ta⁠noonteskatewak, kaawiin itahsh wiin pahkweshikanan oka noonteskatenotawaahsiwaawaan, noontayaapaakwewaatc kaye kaawiin wiin nipiini ke⁠antawentamowaatc. Aya'iini ohsha ke⁠noonteskatenotamowaatc, ke⁠noonteyaapaakwenotamowaatc kaye ewii noontamowaatc ehkitonitc kaaTipencikenitc.

¹² Pemaatisiwaatc hsa ta⁠pimi ayonciiwak kihcikamiihkaank kiiwetinonk inahke, waapanonk kaye inahke; misiwe hsa ta⁠papaa ishaawak ci⁠kakwe mihkamowaatc aaniin ehkitonitc kaaTipencikenitc, kaawiin itahsh oka mihkansiinaawaa.

¹³ I'i hsa ahpii kiishikaninik wenishihshiwaatc ihkwewak, kaa⁠mashkawaatisiwaatc kaye oshkiniikiwak ta⁠waniihkewak ke⁠ahpiihci noontayaapaakwewaatc.

¹⁴ Iki tahsh kaa‑ahpimowaatc manitoohkaana' eyaanitc Sameriya (Samaria) o'o kaa⁠ihkitowaatc, ‘Tepwe hsa kaashi pimaatisitc kimanitoomiwaa, Ten (Dan) eyaayek,’ komaa kaye 'o, ‘Tepwe hsa kaashi pimaatisitc manitoohkaan eyaatc Piiarshiipa (Beersheba),’ oko hsa o'o kaa⁠ihkitowaatc, miiwak hsa iki ke⁠nihsintwaa, kaawiin ta⁠kiiwe pimaatisihsiiwak.”