Emahs 7 - Ojibwe Kihcimasina'ikan

Emahs Kiihpawaanaatc Pahpahkine'

¹ Miitahsh o'o kaaTipenciketc kaa⁠Maawaci Tipenciketc kaa⁠ishinamo'itc. Ninkii waapamaa hsa e⁠oshi'aatc niipiwa' pahpahkine' ahpii kihciokimaan kii‑ishkwaa kiishkishamawimintc mashkohsiwan omihtatimoomini ke⁠miicinitc. Mii hsa kaye i'i ahpii miinawaahsh mashkohsiwan kii⁠ani maacii nihtaawikininikin.

² Ahpii tahsh iki pahpahkinek kii‑ishkwaa kitaawaatc mashkohsiin i'imaa ahkiink, miihsh kaa'inak kaaTipenciketc, “Kiin Tepencikeyan Kishemanitoo, taka kikakwecimin ci⁠poonentamawatwaa pemaatisiwaatc, aaniin tahsh inaa Cekaponk (Jacob) kaa⁠ontahkaanesiwaatc keshi pimaatisiwaahpan? Aahpici iitok akaahsiinowak.”

³ Miihsh kaaTipenciketc kaakii aantentank i'i kaawii ishihcikehpan o'o ekii ihkitotc, “Kaawiin hsa 'i ta⁠ishiwepahsinoon.”

Emahs Kiipawaatank Ishkote

⁴ Miitahsh o'o kaaTipenciketc Kishemanitoo kaa⁠ishinamo'itc. Ninkii waapamaa hsa Kishemanitoo ekii aapacihtootc ishkote ewii nana'ahsaatc pemaatisinitc. Miitahsh i'imaa ishkotenk kaa⁠ishi ankwahkitek i'i kihcikam, i'i kaye ahki.

⁵ Miihsh o'o kaa⁠ihkitoyaan, “Kiin Tepencikeyan Kishemanitoo, taka kikakwecimin i'i ci‑ishihcikehsiwan. Aaniin tahsh inaa Cekaponk (Jacob) kaa⁠ontahkaanesiwaatc Isriyalak keshi pimaatisiwaahpan?”

⁶ Miihsh o'o kaaTipenciketc miinawaa kaa⁠ishi nahkwehtank kaawii ishihcikehpan, “Kaawiin hsa kaye'i ta⁠ishiwepahsinoon.”

Emahs Kiipawaatank Kosikwaapiikishkoocikan

⁷ Miitahsh o'o kaaTipenciketc Kishemanitoo kaa⁠ishinamo'itc. Ekii waapamak e⁠niipawitc aahsamaya'ii waahkaayaapihkinikanink kaakii aapataninikopanen kosikwaapiikishkoocikan eh⁠kwayahkohcikaatenik; okiih tahkonaan hsa kosikwaapiikishkoocikan.

⁸ Miihsh o'o kaa'ishitc, “Emahs (Amos) wekonen weyaapantaman?” O'o tahsh ninkii inaa, “Kosikwaapiikishkoocikan.” Miihsh o'o kaa'ishitc, “Mii hsa 'iwe waa‑aapacihtooyan ewii anta kihkenimakwa Isriyalak eh⁠kwayahkonaakosihsikwaa taapishkoo o'o waahkaayaapihkinikan kaa⁠piimaak. Kaawiin itahsh awahshime niwii aantentansii cikii manaaci'akwaapan.

⁹ I'imaa hsa Aaisik (Isaac) opiiwesiima' kaakii nihtaa tashi anami'aanitc kaashi papiihkwatinaanik ta⁠nihshiwanaacihcikaateniwan. I'imaa ahkiink Isriyalak kaa⁠kihkentamowaatc nehta tashi anami'aawaatc ta⁠nihshiwanaacihcikaateniwan. Ninka miikaanaa kaye a'a kihciokimaa Ceroopooam (Jeroboam) piinihsh ci‑ishkwaa'ak.”

Amahsaaya Kiikishiikanoonaatc Emahsoon

¹⁰ Amahsaaya (Amaziah) kaakiih kihci anami'ewikimaawitc ootenaank Pehtal (Bethel) ecikaatenik, okii ishinisha'waan awiyan o'o ci⁠awi'inaanitc Isriyali kihciokimaan Ceroopooam kaakii ishinihkaasonitc, “Emahs hsa kekoon kikakwe tootaak i'imaa kaa‑ayaawatc kaashi ayaanitc pemaatisinitc. Pemaatisiwaatc hsa onsaam onoontawaawaan aaniin ehkitonitc, miihsh ke⁠onci nihshiwanaatahk o'o ahki.

¹¹ Mii iinsan o'o ehkitotc, ‘Ceroopooam hsa pashipa'ikewihkomaanink ta⁠onci nipo, Isriyalak hsa kehcinaac otahkiimiwaank ta⁠maaciicikaniwiwak ci⁠awi tahkonintwaa.’ ”

¹² Miihsh o'o Amahsaaya kaa'inaatc Emahsoon, “Emahs kaa⁠kanootamawatc Kishemanitoo, mii 'i teminihk, maacaan kitahkiink Coota (Judah) ishi kiiwen. Mii weti awi tashi kakiihkwen. Mii kaye weti awi tashi kashkihciken ke⁠ontaatisiyan.

¹³ Keko wiin o'omaa ootenaank Pehtal tashi kakiihkwehken. Kihciokimaa iitok wiin o'omaa nihtaa tashi anami'aa, kaa⁠nihtaa tashi anami'aanaaniwank.”

¹⁴ Miitahsh o'o Emahs kaa⁠ishi nahkwehtawaatc Amahsaayawan, “Kaawiin ohsha nintookosihsimikohsii kaa⁠kanootamawaatc Kishemanitoon, kaawiin a'a tino nintinowihsii. Mii hsa 'i enanohkiiyaan e⁠naanaakaci'akwaa awahkaanak, mihtikook kaye pik (fig) tinowaahtikook e⁠naanaakaci'akwaa.

¹⁵ Miihsh o'o kaaTipenciketc kaa⁠ishihpan mekwaa e⁠naanaakaci'imak awahkaana', ‘Maacaan awi wiintamaw aaniin keni ishiwepisiwaatc Isriyalak kaa⁠tipenimakwaa.’

¹⁶ Taka hsa tahsh pisintamow aaniin ehkitotc kaaTipenciketc, shaakooc itahsh o'o kitish, ‘Keko inaahken Isriyalak ci⁠macihsewaatc, mii 'i ishi poonimim Cekap (Jacob) opiiwesiima'.’

¹⁷ Miitahsh wiin o'o kiin enihk kaaTipenciketc, ‘Kiwiiw hsa piinihsh tani pihshikwaacihkwewi i'imaa ootenaank. Kikosihsak, kitaanihsak kaye pashipa'ikewihkomaanink ta⁠onci nihsaawak. Kitahkiim kaye kaa⁠tipinawewisiyan ta⁠nenaawinikaate kotak awiyak ci⁠miinintwaa; kiin itahsh iko mayaki ahkiink kika tashi nip. Isriyalak hsa pahkaan ahkiink kekeht ta⁠ishiwicikaniwiwak, otahkiiwaank ci⁠onci maaciinintwaa.’ ”