Emahs 6 - Ojibwe Kihcimasina'ikan

Kiinihshiwanaaci'intwaa Isriyalak

¹ Wiinke hsa kika kihci ishihsem kiinawaa kaa⁠wentahk kipimaatisiwiniwaa Saayanink (Zion), kekiinawaa kaa⁠inentamek kekoon ci‑ishihsehsiwek weti eyaayek ootenaank Sameriya (Samaria). Kiinawaa maawac kaa⁠niikaanentaakosiyek e⁠niikaanishkawekwaa kaa⁠kihci inentaakosiwaatc Isriyalak, kiinawaa iitok kaa⁠naasihkawinekwaa pemaatisiwaatc Isriyalak ci⁠wiici'ekwaa.

² Inashke ishaak weti ootenaank Kaalne (Calneh) ci⁠awi waapantamek. Weti hsa kaye ani ishaahkek Hemaht (Hamath) kihci ootenaank. Ani ishaahkek itahsh kaye weti ootenaank Kaaht (Gath) ecikaatek kaa‑ayaak Pilistiyawahkiink (Philistia). Kaawiin iitok ono pahkaan ahkiin ahpiihci soonkentaakwahsinoonan, kaawiin kaye ahpiihci mihcaahsinoonan kaa⁠inentaakwahk kitookimaawiwiniwaa Coota (Judah) ahkiink eyaayek, Isriyal ahkiink kaye eyaayek.

³ Kaawiin itahsh kitinentansiim ci⁠otihsaapantamek i'i kaawii kihci ishiwepisiyek. Kitishihcikewiniwaank iitok kitonci pehshwaapantaam i'i kaawii ishi kiishikahk.

⁴ Etatawe hsa kika kihci ishiwepisim kaa⁠maminohshinek nipewinaahkonk kaa⁠mamasinihcikaatekin kakinooshkishiiwaapitan e⁠aapatahkin, e⁠miiciyek maawac wenishihshik maanahcaanihshenhsiwi wiiyaahs, kaa‑aancipoonintwaa kaye pishihkiinhsak.

⁵ Miihsh eshi nikamoyek nikamonan inkotano kaa⁠inaapatahsinokin e⁠matweyaapiikipicikeyek, e⁠oshihtamaasoyek kitohcikanan ke⁠kitohcikaakeyek taapishkoo Tepit (David) kaakii ishihciketc.

⁶ Kihci minihkwaakanan kaye kitaapacihtoom e⁠minihkweyek shoominaapo, maawac wenishihshinkin minaako'onan e⁠aapacihtooyek, kaawiin itahsh wiin kanake ci⁠mawimimek Coosap (Joseph) opiiwesiima' eshi piikonaakosinitc.

⁷ Kiinawaa tahsh nihtam kika maaciinikoom ahpii maaciinitinaaniwank; i'i hsa kaashi nihtaa wiihkwantiiwahkamikisiyek, kaashi nihtaa wiihsiniyek kaye ta⁠poonihse.

⁸ KaaTipenciketc kaaMaawaci mashkawisiitc Kishemanitoo o'o kii‑ishi aayiici ayaankwaamihtaakosi ekii ihkitotc, “Nishiinkentamowaan hsa kaashi kihci inenintisowaatc Isriyalak pemaatisiwaatc, nishiinkentamowaanan kaye okihci waahkaa'ikaniwaan. Ninka pakitinamowaan ci⁠shaakoocihcikaatenik kaa⁠niikaanentaakwahk kihci ootena, kahkina kaye kekoon i'imaa eyaanik.”

⁹ Kiishpin hsa mitaahso ininiwak ishkwiiwaatc peshik waahkaa'ikanink, kewiinawaa hsa ta⁠nipowak.

¹⁰ Awe inini kaa⁠pimaatisihsik otinawemaakanan kaa⁠kanawaapantaminitc na'inikewin pisaakisihtoonitc ini wiyawimaan, miihsh ke⁠ishi shaakowenitc keyaapi awiyan i'imaa ci⁠ayaanikwen piintik waahka'ikanink, “Awiya na kiwiiciiwik?” Oka ishi nahkwehtaakoon, “Kaawiin.” Miihsh ke'inaatc, “Manaa nawintaatin, ci⁠ayaankwaamisiyank ci⁠manaa papaamintamank kaaTipenciketc otishinihkaasowin.”

¹¹ Inashke kaaTipenciketc kii⁠anoohkiitc, mii 'i kihci waahkaa'ikanan, waahkaa'ikanenhsan kaye keshi pikishka'ikaatenikin.

¹² Mihtatimook ina ta⁠pimipa'itiwak kaashi kakiishkaapihkaanik? Awiya na tashi pikishkahkamikipicike kihcikamiink ci⁠aapaci'aahpan pishihkiwa'? Miihsh kaye eshihcikeyek weweni inaahkonikewin e⁠pihcipowentaakohtooyek, kaa⁠kwayahkonaakwahk kaye e⁠macinaakohtooyek.

¹³ Aahpici kaye kikihci maamiihkwaanitisom ekii kaahcicihtooyek Lootipaar (Lodebar) ootena. Kimaamiihkwaanitisom e⁠ihkitoyek, “Niinawint hsa ko nintahpiihciiwininaanink ninkii onci shaakoocihtoomin Kaarnaim (Karnaim)!”

¹⁴ Miitahsh o'o kaaTipenciketc kaa⁠Maawaaci mashkawisiitc Kishemanitoo ehkitotc, “Pemaatisiyek Isriyalak, niwii ishinisha'waak hsa mayaki shimaakanihshak cipi miikaaninekwaa. Keshi wehsaani'inekwaa hsa i'imaa ta⁠onci maacihseni Hemaht (Hamath) wenci piintikeshkaaniwank kiiwetinonk inahke piinihsh weti kaashi siipiiwaninik Aarapa (Arabah).”