Emahs 5 - Ojibwe Kihcimasina'ikan

Kiikanoonintwaa Cikwehkaatisiwaatc

¹ Pemaatisiyek Isriyalak taka pisintamok o'o na'initiiwi nikamon kaawii nikamoohtawinakook:

² Isriyalak enentaakosiwaatc pehki oshkiniikihkwenk hsa kiih⁠shaakooci'aawak, wiihkaa miinawaa ci⁠kiiwe ayaahsikwaa. Otahkiimiwaank kii‑ishi wepinikaniwiwak, kaawiin awiyan oka kiiwe pasikwii'ikohsiiwaan.

³ Mii hsa o'oweni kaaTipenciketc ehkitotc, “Mitaahswaahk (1,000) shimaakanihshak hsa Isriyali ootenaank onci maacaawaatc, ninkotwaahk (100) hsa ehta ta⁠pikiiwewak. Miinawaa tahsh kotak ootenaank ninkotwaahk onci maacaawaatc, mitaahso (10) ehta ta⁠pikiiwewak.”

⁴ Miitahsh o'o kaaTipenciketc eni'inaatc pemaatisinitc Isriyala', “Niin pi⁠naasihkawihshik, miihsh ci⁠pimaatisiyek;

⁵ keko kaye Pehtalhkaank (Bethel) ishi antone'ohshihkek, keko wiin ishaahkek Kilkal (Gilgal), keko kaye Piiarshiipa (Beersheba) inahke ishaahkek. Kilkal eyaawaatc iitok pahkaan ahkiink wii‑ishiwinaawak, Pehtal kaye kaawiin kekoon tani inentaakwahsinoon,” ihkito kaaTipenciketc.

⁶ Pi⁠naasihkawik kaaTipenciketc ci⁠pimaatisiyek. Kiishpin hsa 'i ishihcikehsiwek, ishkotenk ohsha ta⁠inentaakosi ci⁠pinaashiitc eshi'ayaanitc pemaatisinitc Isriyala'. Miihsh ci⁠caakaahkiswaatc i'imaa Pehtal ootenaank eyaanitc. Kaawiin hsa awiyan oka aahtawe'ansiini.

⁷ Kaawiin hsa kika manaaci'ikoohsiim kiinawaa kaa⁠nahpaacihsitooyek weweni inaahkonikewin, kaa⁠onci wayeshimekwaa kaye pemaatisiwaatc aaniin kekii ishihcikewaahpan!

⁸ KaaTipenciketc okii oshi'aa' wanankohsha', ninkotwaahso wanankohsha' kaa‑ayohkwakoocininitc Palii'atiis shikwa kaa‑antawencikenitc Oriiyan enimintc. Wiin kaa⁠kashkihtootc kaa⁠kashkiitipihkaninik cini waahseyaanik, kaa⁠kiishikaninik kaye cini tipihkaninik. Wiin kaye kaa⁠kanootank kihcikamiini miihsh eshi siikinank eshi ayahkiiwaninik. KaaTipenciketc ohsha ishinihkaaso.

⁹ Wiin hsa kaa⁠nihshiwanaaci'aatc kaa⁠soonkentaakosinitc, kaa⁠nihshiwanaacihtootc kaye kaa⁠soonkaninikin otahpa'iwewikamikoni.

¹⁰ Kishiinkenimaawaa kaye awiya weweni kaa⁠kakwe inaahkoniketc, wiinke kaye kaa⁠tepwetc i'imaa kaa⁠tashi tipaahkonitiwintc.

¹¹ Wiinke kaye kiwehsaani'aawaak ketimaakisiwaatc, e⁠mahkamekwaa opahkweshikanimiwaan. Aanawiin e⁠oshihtamaasoyek wewaanishihshinkin ahsinii waahkaa'ikanan, kaawiin itahsh kika taanotansiim. E⁠minohtooyek kaye kaashi kihtikaanekwaa shoominak, kaawiin itahsh i'imaa kika onci minihkwaatansiim shoominaapo.

¹² Ninkihkentaanan ohsha eh⁠paahtiinatinkin kimamaashiiwiniwaan, kimacitootamowiniwaan kaye wiinke eh⁠paahtiinatinkin. Kiwehsaani'aawaak kaye kwayahk pemaatisiwaatc, shooniyaa kii⁠tipa'amaakooyek mii 'i eshi onentamek aaniin ke⁠inaahkonikeyek. Wiinke kaye kikoohpaaci wayeshimaawaak ketimaakisiwaatc kaashi tipaahkonitiwintc.

¹³ Miitahsh eshi onishihshink ci⁠noontaatihsiinaaniwankinpan o'o ahpii kahkina kekoon kaa⁠maci'ishiwepahk.

¹⁴ Maano hsa kakwe ishihcikek ci⁠tootamek kaa⁠onishihshik, keko wiin tootankek macikekoon, miitahsh i'i ci⁠pimaatisiyek. KaaTipenciketc Kishemanitoo kaaMaawaci mashkawisiitc hsa tepwe kika wiiciiwikowaa taapishkoo kaakii ihkitoyekipan.

¹⁵ Shiinkentamok macikekoon, saakihtook i'i kaa⁠onishihshik. Kehcinaac kaye onahtook weweni inaahkonikewin ci⁠ayaak i'imaa kaashi onaahkonikenk. KaaTipenciketc Kishemanitoo kaaMaawaci mashkawisiitc hsa tahsh iitok oka koohpaasinawaa' pemaatisinitc Isriyala' Coosaponk (Joseph) kaa⁠ontahkaanesinitc kaa⁠ishko pimaatisinitc.

¹⁶ Miitahsh o'o kaaTipenciketc Kishemanitoo Kaa⁠Maawaci mashkawisiitc kaa⁠onci ihkitotc, “Ta⁠naanoontaakosinaaniwan hsa ci⁠kihci mawinaaniwank ci⁠maanentamonaaniwank i'imaa kaashi mamiihkanaawank kihci ootena. Iki hsa kaye kihtikewininiwak ta⁠kanoonaawak ci⁠wiici mawimaawaatc i'i kaa⁠tipa'amawimintc kaa⁠nihtaa mawihkaasonitc.

¹⁷ Misiwe hsa shoomina' kaashi kihtikaasonitc ta⁠papaa tashi mawiwak aaniihsh kiwii otihsininim eshi'ayaayek ewii nana'ahsinakook,” ihkito kaaTipenciketc.

¹⁸ Aahpici hsa kika kihci koohpaasinaakosim kiinawaa kaa‑antawentamek ci⁠ocihcihsek kiishikahk ahpii kaaTipenciketc kaawii naakositc! Aaniin tahsh inaa keshi minohseyekipan i'i ahpii kiishikahk? Kiinawaa hsa wiin kaa⁠kiishikahk eh⁠kashkiitipihkahk kika inentaam, kaawiin waahseyaa kika inentansiim.

¹⁹ Mii hsa ke⁠inentaakwahk taapishkoo inini kaa⁠maaciipa'iwaanaatc mihshipishiwan, mahkwan itahsh kaa⁠nakishkawaatc. Taapishkoo kaye inini kaa‑ayaahpataahkwiitc otaawinink kinepikoon itahsh kaa⁠maakwamikotc.

²⁰ I'i hsa ahpii kiishikahk kaaTipenciketc kaawii naakositc ta⁠kashkiitipihkan iitok, kaawiin ta⁠waahseyaahsinoon. Wiinke hsa piko ta⁠kashkiitipihkan, kaawiin awaac pankii ko ta⁠waahseyaahsinoon.

²¹ “Nishiinkentaan ihsa nintaanawentaanan kaye ini kitanami'ewiihkwantiwiniwaan. Kaawiin kaye niminwaapantansiinan i'i kaashi nihtaa maawaaci'itiyek.

²² Aana hsa piitamawiyek ini tino kaa‑ankwaahkitekin pakitinaahsowinan, pahkweshikan kaye tino pakitinaahsowinan, kaawiin hsa ninka otaahpinasiinan. Kaawiin kaye niwii otaahpinaahsiik pakitinamawiyek iki kaa‑aancipoonintwaa aya'aawihshak, pakitinaahsowinan tino kaa⁠onci mino wiiciintink.

²³ Taka mii 'i ishi poonihtook i'i kaa⁠ompiikisiyek e⁠nikamoyek. Kaawiin niwiih pisintansiin aaniin enwewemohcikeyek.

²⁴ Tekwac tahsh o'o ishihcikek, taapishkoo siipi kaa⁠pimiciwank ci‑ishi naakohtooyek weweni eshi minotootaakeyek, kwayahkwaatisiwin kaye ci‑ishinaakwahk taapishkoo siipi wiihkaa kaa⁠paahtehsinok.”

²⁵ “Isriyalak, kikiih piitamawim ina pakitinaahsowinan, pakitinikewinan kaye mekwaa kii⁠ayaayekipan niimitana (40) tahsopipoon weti pikwatahkamik?

²⁶ E⁠anami'ehtawek itahsh a'a oshihcikan okimaawi manitoohkaan Sakooht (Sakkuth) kaa'inintc, a'a kaye wanankohshiiwi manitoohkaan Kaiwan kaa'inintc, miiwak hsa iki iinsan ke⁠maaciinekwaa,

²⁷ ahpii ishiwininakook weti pahkaan ahkiink ci⁠awi tashi kipa'okooyek weti awahsinahke Timaaskahs (Damascus) ootenaank,” ihkito kaaTipenciketc. Mii iitok a'a kaaMaawaci mashkawisiitc Kishemanitoo kaa⁠ishinihkaasotc.