Emahs 3 - Ojibwe Kihcimasina'ikan

¹ Taka noontamowaahk aaniin kaaTipenciketc eninek! Kiinawaa ohsha Isriyalak (Israel) kaa'ikooyek, kahkina kaa⁠peshikwewaanakisiyek Iicipahkiink kaakii onci saakiciwinikooyek.

² Miihsh o'o kaaTipenciketc ehkitotc, “Kiinawaa hsa ehta kaakii onaapaminakook mekweya'ii kaashi paahtiinwewaanakisiwaatc kahkina pemaatisiwaatc o'omaa ahkiink. Mii hsa 'i kimacitootamowiniwaan kaa⁠onci kakwaanihsakinaakwahkin, miitahsh eshinaakwahk ci⁠nana'ahsinakook kimacitootamowiniwaan onci.”

Okanootamaake Otanohkiiwin Ewiintenik

³ Kaawiin iitok niishin awiyak ta⁠niisho'ohsehsiiwak kiishpin peshikwan inentansikwaa.

⁴ Ta⁠noontaakosi na mihshipishiw noohpimiink mihkawaahsik awiyan ke⁠nihsaatc? Oshki mihshipishiw ina ta⁠noontaakosi owaashink kii⁠kaahcitinansik ke⁠miicitc.

⁵ Ta⁠tahsoonaa na pinehshiinsh wanii'ikanink kiishpin okohkeyawihkantehsininik i'i wanii'ikan? Ta⁠nahsaapihkihse na wanii'ikan kiishpin awiya tahkohkaatansink?

⁶ Kiishpin noontaakwahk pootaacikan i'imaa ootenaank, pemaatisiwaatc iitok ta⁠sekisiwak. Kiishpin hsa kihci ootena kihci wahsitaawihsek, kaaTipenciketc iitok i'i otishihcikewin.

⁷ KaaTipenciketc Kishemanitoo hsa kaawiin wiihkaa kekoonini ishihcikehsii kiishpin kota kii⁠kihkentamoonaahsik aaniin wa⁠ishihciketc i'i otanohkii'aakana' kaa⁠kanootamaakotc.

⁸ Mihshipishiw hsa kii⁠noontaakositc, awenen hsa ke⁠kohtaacihsikipan? Ahpii hsa kaaTipencikenitc Kishemanitoon kii⁠kiikitonitc, awenen hsa ke⁠kashkihtoohpan ci⁠manaa wiintamaakehpan i'i otipaacimowinini. Mii hsa 'i Emahs (Amos) kaa⁠ihkitotc.

KaaTipenciketc Kii'itank Sameriya Cinihshiwanaacihcikaatenik

⁹ Maacaak awi wiintamawihkwak iki kaa⁠ishitaawaatc weti okimaawikamikonk Iicipahkiink (Egypt), ootenaank kaye Aashtaat (Ashdod) ecikaatek, “Weti hsa Sameriya (Samaria) kaashi papiihkwatinaak ishi maawaci'itik, ci⁠waapantamek e⁠wawaanentamahkamikahk, e⁠kihci ompwehkamikisinaaniwank kaye.”

¹⁰ Miihsh o'o kaaTipenciketc ehkitotc, “Iki hsa pemaatisiwaatc omooshkinahtoonaawaan kekoon owaahkaa'ikaniwaank kaakii mahkantwewaatc noociko kii‑ishihcikewaatc, kii⁠ompwehkamikisiwaatc kaye. Kaawiin hsa kanake okihkentansiinaawaa weweni cikii ishihcikewaahpan.

¹¹ Miitahsh o'o ke⁠ishihsewaatc, kaa⁠shiinkenimikowaatc hsa oka waahkaashkamini otahkiimiwaa, ke⁠nihshiwanaacihtoonitc kaa⁠onci naatamaasowaatc, ke⁠nihshiwanaacihtoonitc kaye otahpa'iwewikamikowaan,” ihkito kaaTipenciketc.

¹² Miitahsh o'o kaaTipenciketc ehkitotc, “Taapishkoo hsa okanawi maanahcaanihshiwe kaa⁠mahkantwetc niishin ehta omaanahcaanihshi ohkaatiikanan kaa⁠ishkwancikaatenikin, pankii kaye ohtawakimaa mekwaa e⁠amokonitc mihshipishiwan, mii hsa peshikwan aaninta ehta Isriyalak keshi pimaaci'intwaa Sameriya (Samaria) eyaawaatc kaa⁠ishi maminwapiwaatc omino tehsapiwiniwaank.”

¹³ Miihsh o'o ehkitotc kaaTipenciketc Kishemanitoo kaaMaawaci mashkawisiitc, “Pisintamok tahsh, ayaankwaamimihkwak hsa iki Cekapoonk (Jacob) kaa⁠ontahkaanesiwaatc,” ihkito kaaTipenciketc.

¹⁴ Ahpii hsa kiishikaninik nana'ahsakwaa Isriyalak omacitootamowiniwaan onci, mii hsa 'i ci⁠nihshiwanaacihtooyaan kaashi pakitinaahsonaaniwank kaa‑ayaakin weti ootenaank Pehtal (Bethel) kaa'icikaatek. Kaashi kakiihkeyaakin hsa ini kaashi pakitinaahsonk ta⁠piikohsewan, mihtahkamik tashi pankihsinoon.

¹⁵ Ninka nihshiwanaacihtoonan hsa pipooni waahkaa'ikanan, niipini waahkaa'ikanan kaye; ini kaye waahkaa'ikanan kaa⁠mamasinihcikaatekin kaa‑aapatahk kakinooshkishiiwaapitan, ini kaye waahkaa'ikanan kaa‑aahkwakintekin ta⁠nihshiwanaacihcikaatewan.