Emahs 2 - Ojibwe Kihcimasina'ikan

¹ Miitahsh o'o kaaTipenciketc ehkitotc, “Iki hsa pemaatisiwaatc Moowap (Moab) ahkiink wenciiwaatc, etatawe nihtaa macitootamok, e⁠ani aanihke mooshak macitootamowaatc. Miitahsh i'i kaawii onci nana'ahsakwaa. Onsaam aaniihsh kaawiin okii kihtenimaahsiwaawaan Iitam kihciokimaan ekii ankwaahkisamawaawaatc ohkanini wiinke hsa ko piinihsh ekiih pinkwiiwaninikin.

² Ninka ishihcike hsa ci⁠ankwaahkitek i'i Moowap ahki, ci⁠ankwaahkitekin kaye ini ahpa'iwewikamikoon kaa‑ayaakin weti ootenaank Kiiriaaht (Kerioth) ecikaatek. Iki hsa pemaatisiwaatc Moowap ahkiink eyaawaatc ta⁠nipowak i'imaa kaa⁠tashi miikaatinaaniwaninik mekwaa shimaakanihsha' eshaahshaakowenitc, pootaacikanan kaye noontaakwaninikin.

³ Ninka nihsaa tahsh kaye a'a kaa⁠kihciokimaawitc i'imaa Moowap ahkiink, iki kaye kahkina kaa⁠niikaanisiwaatc i'imaa ahkiink,” ihkito kaaTipenciketc.

⁴ Miihsh o'o kaaTipenciketc eni ihkitotc, “Iki hsa pemaatisiwaatc i'imaa Coota (Judah) ahkiink wenciiwaatc, etatawe nihtaa macitootamok, e⁠ani aanihke mooshak macitootamowaatc. Miitahsh i'i kehcinaac kaawii onci nana'ahsakwaa. Okii aanawentaanaawaan iitok onsaam nintinaahkonikewinan, kaawiin kaye okiih kanawentansiinaawaan nintihkitowinan. Mii hsa kewiinawaa eshi wanimikowaatc i'i peshikwan manitoohkaana' okehteya'aamiwaapanii' kaakii anohkiihtawaanitc.

⁵ Ninka ishihtoon hsa Coota ahki ci⁠sahkitek, ci⁠ankwaahkitekin kaye ini ahpa'iwewikamikoon Ceroosalamink (Jerusalem) eyaakin,” ihkito kaaTipenciketc.

Kishemanitoo Kiitipaahkonaatc Isriyala'

⁶ Mii hsa o'oweni kaaTipenciketc ehkitotc, “Iki hsa pemaatisiwaatc Isriyalak, etatawe nihtaa macitootamok, e⁠ani aanihke mooshak macitootamowaatc. Miitahsh i'i kehcinaac iko kaawii onci nana'ahsakwaa. E'ataawaakewaatc i'i kwayahk kaa⁠ininiiwinitc kaa⁠tetipa'ansinik omasina'ikewinini, kaa⁠kitimaakisinitc kaye kaa⁠tetipa'ansinik peshikwewaan mahkisinan.

⁷ Mihtahkamink hsa otishi tahtahkohkaanaawaa' i'i kaa⁠kitimaakisinitc, kaa⁠kashkihtoohsinik ci⁠naatamaasonitc, kaa⁠koohpaatisinitc okii pahke kaantinaawaa'. Miihsh kaye inini, ini kaye oteten noociko eshi tootawaawaatc ini peshikwan ihkwesenhsan kaa⁠pamiihtaakenitc. Miihsh i'i niwiinsowin kaawiin kihtencikaatehsinoon.

⁸ Miihsh eshi pimihshinowaatc kaashi nihtaa anami'aaniwaninik eh⁠kikishkamowaatc kikishkikanan kaakii mahkamaawaatc ketimaakisinitc kaa‑ahswii tipa'ikaakenitc kaa⁠masina'amaakowaatc. Miihsh kaye i'imaa oKishemanitoomiwaan owaahkaa'ikaniniink entashi minihkwewaatc shoominaapo, e⁠minihkwaanaawaatc shooniyaan kaakii mahkamaawaatc kaa⁠masina'amaakowaatc.”

⁹ “Kiinawaa iitok nimpimaatisiimak, kaakii onci tetako caaki'akwaa Emorii (Amorites) kaatinowiwaatc. Miiwa' iitok i'i ininiwa' kaakii inentaakosinitc taapishkoo e⁠ahkoosiwaatc kiishkaahtikonk, e⁠ahpiihci soonkentaakosiwaatc kaye ohk (oak) tinowaahtikonk. Ninkii nihshiwanaacihtaawaanan hsa kaa⁠nihtaawikihtoowaatc, ociipihkiwaan kaye.

¹⁰ Kikiih saakiciwininim kaye weti Iicipahkiink, kikiih papaa niikaaniihtamawininim kaye pikwatahkamik niimitana (40) tahsopipoon. Kikii miinininim kaye ci⁠tipentamowek otahkiimiwaa iki Emorii kaatinowiwaatc.

¹¹ Ninkii onenimaak kaye aaninta kikosihsiwaak ci⁠kanootamawaawaatc Kishemanitoon, aaninta kaye kitooshkiniikiimiwaak Naasaraayit ci⁠tinowiwaatc. Isriyalak, kaawiin ina nintepwehsii o'o kaa⁠ihkitoyaan?

¹² Shaakooc itahsh kikii kashki'aawaak Naasaraayit tino ininiwak ci⁠minihkwewaatc shoominaapo, kikii'inaawaak kaye kaa⁠kanootamawiwaatc ci⁠wiintamaakehsikwaa nintipaacimowin.

¹³ Miihsh ke⁠tootawinakook ci⁠shikoshkawinakook taapishkoo otaapaanaahk kaashi shikoshkiketc kii⁠mooshkinahcikaatekin kihtikaanan i'imaa otaapaanaahkonk.

¹⁴ Iki hsa kaa⁠kishiipahtoowaatc kaawiin ta⁠shaapwiihsiiwak, iki kaye kaa⁠mashkawisiiwaatc kaawiin ta⁠saapiihsiiwak. Shimaakanihshak kaye kaawiin oka kashkiihtoohsiinaawaa ci⁠naatamaasowaatc.

¹⁵ Iki hsa kaye pimocikewininiwak ta⁠shaakootaanimi'aawak, kaa⁠kishiipahtoowaatc hsa kaye kaawiin ta⁠shaapwiihsiiwak. Ininiwak kaye mihtatimoo' kaa‑aapaci'aawaatc kaawiin ta⁠shaapwiihsiiwak.

¹⁶ Mii hsa 'i ahpii kiishikaninik maawac iko kaa⁠soonkite'ewaatc shimaakanihshak ci⁠pakici wepinamowaatc omiikaasowi aapacihcikaniwaan ci⁠maaciipa'iwewaatc,” ihkito kaaTipenciketc.