Ehstar 8 - Ojibwe Kihcimasina'ikan

Coowak Kiikanoonintwaa Cinanaahkonamaasowaatc

¹ I'i tahsh peshikwan eh⁠kiishikaninik, kihciokimaa Seraksiihs (Xerxes) okii miinaan kihciokimaahkwen kahkina kekoon kaa⁠tipentaminitc Emanan (Haman) kaakiih shiinkenimaanitc Coowa'. Ehstar (Esther) itahsh okii wiintamawaan kihciokimaan e⁠inawemaatc Mwaartihkaaiyan (Mordecai). Miihsh i'i ishi ahpii kaah⁠pakitinintc Mwaartihkaai pisaan ci⁠piintiketc eshi'ayaanitc kihciokimaan.

² Kihciokimaa hsa tahsh okiih kiihcikoshkawaan okihciokimaawi naapininciipisonan kaakiih kiiwe otaahpinaatc ekii miinaahpan Emanan, okii miinaan itahsh Mwaartihkaaiyan. Miihsh Ehstar kaakii ishi inakimaatc ci⁠naanaakacihtoonitc Emanan otaya'iimini.

³ Miitahsh miinawaa Ehstar kaa⁠ishi kakwecimaatc kihciokimaan ekii animihkohtaatc eshisitepinitc ekii mawitc. Ekiih kakwecimaatc ci⁠kipihtinaminitc waa⁠ishi macitootaminihpan Emanan Ekaakonk (Agag) wentahkaanesinitc, i'i kaye waa⁠ishi macitootawaanihpan Coowa'.

⁴ Miihsh kihciokimaa kaa⁠ishi niimaahkonank okihciokimaa sahka'onaahk inahke eshi'ayaanitc Ehstaran, miihsh kaa⁠ishi pasikwiinitc.

⁵ Miihsh Ehstar kaa⁠ihkitotc, “Kiishpin kihciokimaa ishi minwentank, minwaapamitc kaye, inentank eh⁠kwayahkonaakwaninik o'o ci‑ishihcikenk, kiishpin kaye minwaapamitc, taka onahtoon ke⁠onci kipihtinikaatenik kaawii ishihciketc Eman wetetetc Ahmitehtawan (Hammedatha) wentahkaanesitc Ekaakonk. Mii iitok a'a kaawiih caaki'aahpan kahkina Coowa' eyaanitc misiwe kihciokimaa eshi tipentaminitc ahkiin.

⁶ Aaniin itahsh inaa keshi kashkihtooyaampaan ci⁠pimaatisiyaan kiishpin maanshihsewin otihsikowaatc niwiicipimaatisiimak, iki kaye nintinawemaakanak nihsintwaa.”

⁷ Miitahsh kihciokimaa Seraksiihs kaa⁠ishi nahkwehtawaatc kihciokimaahkwen Ehstar, ini kaye Mwaartihkaaiyan Coowan, “Miihsh kaakii onci akoonak Eman aaniihsh onsaam okii miikaanaa' Coowa', miihsh kaye kaakii onci miinak Ehstar otaya'iimini Emanan.

⁸ Inashke itahsh kihciokimaa kii⁠onahshowetc ehta tako aapataninik owiinsowin, onaapininciipisonan kaye kii⁠masinihshimimintc, kaawiin iitok ta⁠kashkihcikaatehsinoon onahshowewin ci⁠aancihcikaatek. Shaakooc itahsh oshipii'an kotak onahshowewin kihciokimaa owiinsowinink, onci Coowak aaniin iko eshi antawentaman ci‑inahtek,” kii‑ishi nahkwehtam.

⁹ Niishtanashinihsin (23) e⁠inakinsonitc nihsokiisihsoon Sipan (Sivan) eh⁠pimakinsonitc mii 'i ahpii okimaawi oshipii'ikewininiwak kaakiih kanoonintwaa ci⁠ohkwapiwaatc. Miiwak itahsh iki kaa⁠oshipii'amowaatc ehkitonitc Mwaartihkaaiyan ekii oshipii'amawintwaa Coowak, wekimaawentaakosiwaatc tepentamowaatc ahkiin, kaye iki kaa⁠niikaanisiihkantamowaatc ini ninkotwaahk niishtanashiniishwaahso (127) ahkiin Iintiya (India) ahkiink ekii onci maacihsenik, piinihsh weti Soten (Sudan) ahkiink. Ono tahsh oshipii'ikanan kii‑ishinisha'ikaatewan entahsinkin ahkiin. E⁠ayishikiishwewaatc pepahkaan ahkiink ihsa kaye ishipii'ikaate, nehtaa ishipii'ikewaatc inahke kii‑ishipii'ikaateni ikiweniwak kaye Coowak kaa⁠ishikiishwewaatc kaye kaa⁠ishipii'ikewaatc.

¹⁰ Mwaartihkaai itahsh kii'anoohkii cioshipii'ikaatenik kihciokimaan Seraksiihsan owiinsowinini i'imaa oshipii'ikanink. Miihsh kaye kaa⁠ishi masinihshimaatc kihciokimaawi naapininciipisonan ci⁠okimaawinaakwaninik i'i oshipii'ikan. Miihsh kaa⁠ishi anoonintwaa iki pemiwitoowaatc oshipii'ikanan ekii aapaci'aawaatc keshiipahtoonitc mihtatimoo'. I'i hsa mihtatimoo' kii⁠ontinikaniwiwa' kihciokimaank.

¹¹ Miitahsh kaakii ishipii'ikaatek i'i oshipii'ikan pisaan iko Coowak ci⁠naatamaasowaatc eshi ayayaawaatc kaa⁠tahso ootenawank. Pisaan iko ci⁠nanaahkwiiwaatc Coowak miikaanikowaatc aaniin iko entinowinitc shimaakanihsha' aanti piko eshi ayayaawaatc Coowak pepahkaan ahkiink. Pisaan iko ci⁠naatamawaawaatc otihkwemiwa', oniicaanihsiwaa' kaye. Pisaan iko ci⁠caaki'aawaatc i'i kaa⁠miikaanikowaatc, kaye tahsh ci⁠otaahpinamowaatc otaya'iimini.

¹² O'o tahsh oshipii'ikan kii‑inahte ci⁠maacihsek kiishikahk misiwe Persha (Persia) okimaawiwinink ahpii kaakii inahcikaatekipan Coowak ci⁠nihsintwaapan. Mitaahshinihsin e⁠inakinsotc a'a Etar (Adar) mitaahshiniishokiisihs.

¹³ I'i tahsh oshipii'ikan kii‑inahcikaate onahshowewinink ci‑inakintek, kaye misiwe ci⁠kihkentaakohcikaatek kaye entahso ishikiishwenk. Ahpii'i ishi kiishikaninik Coowak kaawii nihsintwaa ci⁠ehpemiiwaatc pisaan iko ci⁠naatamaasowaatc.

¹⁴ Kihciokimaa tahsh okii anoona' pemiwitoonitc oshipii'ikanan ci⁠maacaanitc ci⁠aapaci'aanitc maawac keshiipahtoonitc kihciokimaawi mihtatimoo'. I'i tahsh onahshowewin kii⁠wiincikaate kaye i'imaa maawaci kihci ootenaank Soohsa (Susa).

¹⁵ Miihsh Mwaartihkaai kaakii ani saaka'ank kihciokimaawikamikonk ekiih kikishkank kihciokimaawi kikishkikanan osaawashkwekin, waapishkwekin kaye, ekii kashkiikiitc kaye mahkate miskwekiniwi kashkiikiiwin, okiih kikishkaan kaye maawac iko e⁠onishihshininik kihciokimaawaanohkwaan. Misiwe hsa eshi mamiihkanawank kihci ootena Soohsa kii⁠kihci shaahshaakowaaniwan ekiih ciihkentamonaaniwank.

¹⁶ Wiinke tahsh Coowak kii⁠minwentamook, ekii na'entamowaatc, ekiih ciihkentamowaatc kaye. Kaye tahsh ekii mooshihtoowaatc kehcinaac ci⁠shaakoocihtwaawaatc.

¹⁷ Misiwe tahsh ahkiink, kihci ootenaahkaank kaye kaa⁠ishi anamihcikaatenik kihciokimaa otooshipii'ikan, wiinke hsa kiih⁠ciihkentamonaaniwan eshi ayayaawaatc Coowak. Kiih⁠kipihciinaaniwan kaye, kii⁠wiihsininaaniwan kaye kaa‑ahpiihci minwentamonaaniwank. Kotak itahsh kaye awiyak kaa⁠coowiwihsikwaa kii‑inentamook ci⁠Coowiwaatc ekiih ani kohsaawaatc i'i Coowa'.