Ehstar 7 - Ojibwe Kihcimasina'ikan

¹ Miihsh kihciokimaa a'a kaye Eman (Haman) kaakii ishaawaatc eshi wiihkwankenitc Ehstaran.

² Niishokiishik itahsh e⁠ani ishihsek mekwaa e⁠minihkwewaatc shoominaapooni, mii 'i miinawaa kihciokimaa ekiih kakwecimaatc Ehstaran (Esther) ekii'inaatc, “Kihciokimaahkwe Ehstar, wekonen entawentaman. Wiintamawihshin, miihsh ci⁠miininaan, mihsawaa ko aapihta nintookimaawiwin.”

³ Miihsh o'o Ehstar kihciokimaahkwe kaa⁠ishi nahkwehtank, “Kiishpin itahsh minwaapamiyan, kehciokimaawiyan, taka miitahsh eshi kakweciminaan ci⁠pakitiniyan ci⁠pimaatisiyaan. Miihsh kaye eshi kakweciminaan pisaan ci⁠pimaatisiwaatc niicipimaatisak.

⁴ Iki hsa niicipimaatisak, keniin itahsh ninkii ataawaakaasomin ci⁠nihsikooyaank, wiinke piko ci⁠caaki'ikooyaank. Kiishpin itahsh wiin ehta wii⁠mihci ataawaakaasoyaankipan ci⁠mihtanohkii'ikooyaank, kaawiin kitaakiih papaamimihsinoon.”

⁵ Miitahsh kihciokimaa kaa⁠ishi kakwecimaatc kihciokimaahkwen, “Awenen itahsh a'a kekii ishihcikehpan o'o? Aanti eyaatc?”

⁶ Miihsh o'o Ehstar kaa⁠ihkitotc, “A'a hsa kaawii miikaashiyamintc, kaa⁠shiinkenimiyamintc kaye, mii iitok a'a maci Eman.” Wiinke hsa tahsh Eman kii⁠kihci sekisi enaahsamiinitc kihciokimaan, kihciokimaahkwen kaye.

⁷ Kihciokimaa tahsh kiih⁠pasikwii ekii nakatank ominihkwewin ekii nishkaatisitc ekii ani saaka'ank e⁠ishaatc kihciokimaawi kihtikaanink. Eman itahsh wiin kaawiin kiih⁠saaka'ansii ekii kihkentank aasha ekii onentaminitc kihciokimaan aaniin waah⁠tootaakotc. Piintik kii⁠ayaa ekiih kakwecimaatc Ehstaran kihciokimaahkwen ci⁠koohpaatenimikotc.

⁸ Kihciokimaa tahsh eh⁠pikiiwe piintiketc kihciokimaawi kihtikaanink ekii ishaahpan, okii waapamaan Emanan e⁠ishi kawihtaanitc kihci tehsapiwinink eshi apinitc Ehstaran. Miihsh kihciokimaa kaa⁠ihkitotc, “Mii na i'imaa waah⁠tashiihkawaatc kihciokimaahkwen enaahsamiiwak, nintookihciokimaawikamikonk?” Ehpiihci ishkwaa kaakiikitotc itahsh kihciokimaa, mii 'i aasha kii⁠aakawiinkwe'ikaniwitc Eman.

⁹ Peshik itahsh ini pemiihtaakotc Aarpoona (Harbona) eshinihkaasonitc okii'ikoon, “Eman iitok okii oshihtoon eshitaatc awiya kaashi akoocikaniwitc waa⁠ishi akoonaahpan Mwaartihkaaiyan (Mordecai) kaakiih pimaacihtoonitc kipimaatisiwin. Niishwaahsimitanashinaanan tahsomisit ahpiihtahkiteni.” Miihsh kihciokimaa kaa⁠ihkitotc, “Mii 'imaa ishi akoonihk Eman.”

¹⁰ Miitahsh i'imaa Eman kaa⁠ishi akoonintc awiya kaashi akoocikaniwitc kaawii ishi akoonaahpan Mwaartihkaaiyan. Miihsh kihciokimaa kaa‑ani aahtekitaasotc.