Ehstar 6 - Ojibwe Kihcimasina'ikan

Kihciokimaa Kiikihtenimaatc Mwaartihkaaiyan

¹ I'i tahsh eh⁠tipihkaninik kihciokimaa kaawiin okii kashkihtoohsiin ci⁠nipaatc. Miihsh kaakii anoohkiitc ci⁠piicikaatenik, kaye ci⁠anamihcikaatenik eshi oshipii'ikaatenik kahkina kekoon kaahpi inahkamikaninik ahpane kaa⁠pi'onci kihciokimaawitc.

² Miitahsh kaakii mihkikaatek e⁠ishipii'ikaatenik aaniin Mwaartihkaaiyan (Mordecai) kaakii ishi tipaacimaanitc Piktenawan (Bigthana), ini kaye Tiirehshan (Teresh) kaakii niishinitc kihciokimaa enohkiihtaakotc kaakiih kanawentaminitc kihciokimaa otishkwaantem. Miiwak iitok oko kaakii wii nihsaawaahpan kihciokimaan Seraksiihs (Xerxes) eshinihkaasonitc.

³ Kihciokimaa tahsh kii‑ishi kakwetwe, “Aaniin itahsh kaa⁠ishi kihtentaakohcikaniwitc Mwaartihkaai, aaniin kaye kaa⁠ishi tipa'amawintc o'oweni?” “Kaawiin kekoon kii‑ishi tipa'amawaahsii,” okii'ikoon kaakiih pami'ikotc.

⁴ Kihciokimaa tahsh kii‑ihkito, “Awenen eyaatc o'omaa okimaawikamikonk?” Eman (Haman) itahsh noonkom kiih⁠pi piintike kihciokimaawikamikonk. Ewiih pi kakwecimaatc kihciokimaan ci⁠akoonaanitc Mwaartihkaaiyan i'imaa akoocikanaahkonk kaakii oshihtootc.

⁵ Kihciokimaa tahsh okii'ikoo' pemiihtaakotc, “Eman akwaciink niipawi ewii waapamihk.” Miihsh kaa⁠ihkitotc, “Pisaan ta⁠piintike.”

⁶ Ahpii tahsh kaah⁠piintikenitc o'o okii'inaan, “Ayaa hsa peshik inini e⁠mihsawentamaan ewii naakohtooyaan ewii kihci inenimak. Aaniin itahsh inahke ke⁠tootawintipan?” Eman ihsa kii‑inentam, awenen itahsh inaa pahkaan kihciokimaa waa⁠kihci inenimaatc. Niin kehcinaac kaa'ishitc.

⁷ Miitahsh Eman kaa'inaatc kihciokimaan, “A'a hsa kaawii kihci inenimatc mii hsa owe ke⁠tootawatc.

⁸ Kika pihsihkamoonaa ihsa kihciokimaa okashkiikiiwin, ta⁠pakitinaa kaye ci⁠pimiwanaanikotc kihciokimaan omihtatimoomini, wiinke tahsh kaye ci⁠waweshihcikaniwinitc ini mihtatimoon.

⁹ Peshik itahsh kitininiim maawac eshpentaakositc oka pihcihkonaye'aan, ci⁠namatapinitc kaye wakici mihtatimonk ini ininiwan kihciokimaa kaawii kihci inenimaatc. Miihsh keshi papaa sakaapiikinaatc ini mihtatimoon shaapwaya'ii miihkanaank kihci ootenaank. Miitahsh o'o ke⁠ihkitotc, ‘Mii hsa owe entootawintc a'a inini kihciokimaan kaawii kihci inenimikotc!’ ”

¹⁰ Miitahsh kihciokimaa kaa'inaatc Emanan, “Haw itahsh, ontinan kihciokimaawi kashkiikiiwin, ontin kaye mihtatim ci⁠tootawatc i'i kaa⁠ihkitoyan a'a Coo Mwaartihkaai kaa⁠namatapitc kihciokimaawishkwaantenk. Mayaa piko ishihciken i'i kaa⁠ihkitoyan.”

¹¹ Miihsh Eman kaakii ontinank kihciokimaawi kashkiikiiwin, ekii pihsihkamoonaatc Mwaartihkaaiyan, ekii ontinaatc kaye mihtatimoon keshi pimiwanaasonitc. Miihsh kaye kaashi papaa sakaapiikinaatc mihtatimoon misiwe ootenaank miihkanaahkaank ekii ihkitotc e⁠ani pimohsetc, “Inahsh kaye waapantamowaahk inahke eshi tipa'amawaatc kihciokimaa ininiwan waa⁠kihci inenimaatc!”

¹² Naanaake tahsh Mwaartihkaai kii⁠anishi kiiwe kihciokimaawi ishkwaantenk. Miihsh kewiin Eman wewiip kaa‑anishi kiiwetc ekii aakawiinkwenintisotc kaa‑ahpiihtakacitc.

¹³ Okii wiintamawaan wiiwan, i'i kaye kahkina osaaki wiiciiwaakana' kahkina kekoon kaakii ishihsetc. Miihsh o'o kaa'ikotc, “Mii'i aasha e⁠ani shaakooci'ihk a'a Coo Mwaartihkaai. Kaawiin kehcinaac kitaa shaakooci'aahsii. Wiinke maawiin kika nihshiwaanaaci'ik!”

Eman Kiinihsintc

¹⁴ Mekwaa tahsh eh⁠kakanoonitiwaatc, mii hsa 'i kihciokimaa pemiihtaakotc kaakiih pitakohshininitc, wewiip ekii ishiwinaanitc eshi wiihkwankenitc Ehstaran aasha kaakiih kwayaancihtoonitc.