Ehstar 5 - Ojibwe Kihcimasina'ikan

Ehstar Kii'antomaatc Kihciokimaan, Emanan Kaye Kiiwiihkwanketc

¹ Nihsokiishik itahsh e⁠ishihsenik Ehstar (Esther) okii pisihkaan kihciokimaahkwewi kikishkikan. Miihsh kaa⁠ishi piintiketc i'imaa kihciokimaawikamikonk ekii inaahsamikaapawitc inahke eshi nihtaa apinitc kihciokimaan. Kihciokimaan itahsh kii⁠oncishkawapiwan e⁠apinitc kihciokimaa tehsapiwinink ishkwaantenk inahke ekii inaahsamapinitc.

² Ahpii tahsh kihciokimaa e⁠waapamaatc Ehstaran piintik e⁠niipawinitc, wiinke kaye okii minwaapamaan. Miitahsh kaa⁠ishi niimaahkonank okihciokimaa sahka'onaahkoni. Ehstar ihsa okii naasihkawaan ekiih saaminank kihciokimaa sahka'onaahkoni.

³ Kihciokimaa hsa tahsh okiih kakwecimaan Ehstaran, “Kekoon ina? Wiintamawihshin wekonen entawentaman. Kika miinin ihsa kekoon entawentaman, mihsawaa ko aapihta nintookimaawiwin.”

⁴ Ehstar itahsh kii‑ishi nahkwehtam, “Kiishpin kihciokimaa ishi minwaapantaman, kipakohsenimin, a'a kaye Eman (Haman) ci⁠piishaayek eh⁠kwayaancihtamawinakook ewii wiihkwankeyaan noonkom kaa⁠onaakohshik.”

⁵ Miitahsh kihciokimaa kaa⁠ihkitotc, “Shemaak antomihk Eman ci‑ishihcikeyaank Ehstar eshi antawentank.” Miihsh kihciokimaa, a'a kaye Eman kaakii ishaawaatc ekiih kwayaancihtoonitc Ehstaran wiihkwantiwin.

⁶ Mekwaa tahsh e⁠minihkwewaatc shoominaapo, kihciokimaa okiih kakwecimaan Ehstaran, “Wekonen entawentaman? Wiintamawihshin, kika miinin itahsh entawentaman. Kika miinin ihsa entawentaman, mihsawaa ko aapihta nintookimaawiwin.”

⁷ Miihsh Ehstar kaa⁠ishi nahkomaatc kihciokimaan, “Mii hsa owe eshi kakwetweyaan e⁠ishi mihsawentamaan.

⁸ Kiishpin itahsh kihciokimaa inenimitc e⁠minwaapamitc, kiishpin kaye minwentank ci⁠miishitc eshi kakwetwewak, inentank kaye cishi miishitc eshi mihsawentamowak, miinawaa hsa kipakohsenimin Eman kaye ci⁠piishaayek waapank ewiih kwayaancihtamawinakook wiihkwantiwin. Miihsh i'i ahpii ke⁠wiintamawinaan wekonen entawentamaan.”

Eman Kii'onentank Aaniin Waa'ishinihsaatc Mwaartihkaaiyan

⁹ Ahpii hsa Eman (Haman) kaa‑ani saaka'ank i'i eh⁠kiishikaninik, wiinke hsa kii⁠ciihkentam, ekii minomanci'otc. E⁠waapamaatc itahsh Mwaartihkaaiyan (Mordecai) e⁠ayaanitc eshi ishkwaantemiwaninik kihciokimaawikamikonk ekii waapamaatc e⁠niipawihtaakohsik, kaye tahsh e⁠kihtenimikohsik, wiinke hsa Eman okii kihci nihshki'ikoon Mwaartihkaaiyan.

¹⁰ Okii kashkihtoon itahsh kekoon ci‑ishihcikehsik. Miihsh kaa‑ani kiiwetc ekii antomaatc osaaki wiiciiwaakana', wiiwan kaye Siiresh (Zeresh) eshinihkaasonitc.

¹¹ Wiinke hsa kii⁠maminwaaso ekiih tashintank eshi wenootisitc, ekiih tashimaatc kaye okosihsa', aaniin kaye kihciokimaan kaa⁠ishi ishpakimikotc ahpiihc wiin iko kotak wekimaawentaakosinitc, i'i kaye aanihkewikimaa'.

¹² Miihsh kaa‑ani ihkitotc, “Inashke tahsh kaye, niin ehta ninkii antomik kihciokimaahkwe Ehstar (Esther) ci⁠wiici wiihsiniimimak kihciokimaan kii⁠wiihkwanketc. Miinawaa tahsh nintantomik waapaninik ci⁠anta wiici wiihsiniimimak kihciokimaan.

¹³ Kaawiin itahsh o'o nintoonci ciihkentansii minihk iko ke⁠waapamak a'a Coo Mwaartihkaai e⁠namatapitc kihciokimaa ishkwaantenk,” kii‑ihkito Eman.

¹⁴ Wiiwan itahsh Siireshan, i'i kahkina osaaki wiiciiwaakana' okii'ikoo', “Inashke oshihtoon awiya kaa⁠ishi akoocikaniwitc, niishwaahsimitanashinaanan (75) tahsomisit ci⁠ahpiihtaak. Kakwecimaahken itahsh kihciokimaa kishepaawakaninik i'imaa cishi akoonaatc Mwaartihkaaiyan. Miihsh ishi ishaahkan eshi wiihkwantink ci⁠minwentaman.” Wiinke tahsh Eman okii minohtaan kaakii'inintc. Miihsh kaa⁠ishi anoohkiitc ci⁠oshihcikaatenik akoocikanaahk.