Ehstar 4 - Ojibwe Kihcimasina'ikan

Mwaartihkaai Kiikakwecimaatc Ehstaran Ciwiici'ikotc

¹ Ahpii hsa tahsh Mwaartihkaai (Mordecai) kaa⁠kihkentank kahkina kaa⁠inahkamikaninik, mii hsa 'i kaashi taashkiikipitootc okikishkikanan ekii maanentank. Miihsh kaa⁠ishi pihsihkank ahsapatapiiwekin, pinkwii kaye ekii ahtootc ohtikwaanink ekiih papaamohsetc kihci ootenaank enikohk ekii mawitc, ekii wiihsakamanci'otc kaye.

² Kaawiin itahsh wiin kiih⁠piintikehsii kihciokimaawi ishkwaantenk aaniihsh kaawiin awiya kiih⁠pakitinaahsii ci⁠piintiketc i'imaa awiya kikishkank ahsapatapiiwekin.

³ Misiwe hsa ko ahkiink kaa⁠kihkentaakwaninik kihciokimaa otoonahshowewin, Coowak ihsa kii⁠kihci mawiwak. Kaawiin oncita kii⁠wiihsinihsiiwak, ekii noontaakosiwaatc ekii mawiwaatc. Niipiwa' okiih kikishkaanaawaan ahsapatapiiwekinoon pinkwiink ekii ishi pimihshinowaatc.

⁴ Ahpii tahsh Ehstar (Esther) kaa⁠wiintamaakotc pemi'ikotc ihkwewa', i'i kaye pemiihtaakotc ininiwa' aaniin eshihcikenitc Mwaartihkaaiyan, wiinke hsa kii⁠mikoshkaatentam. Miihsh kaakii ishinisha'ank kikishkikanan ke⁠pihsihkaminitc, ci⁠kikishkansinik ahsapatapiiwekin. Kaawiin itahsh kii‑inentansiiwan.

⁵ Kihciokimaa iitok okii onakimaan Hetak (Hathach) eshinihkaasonitc ci⁠pami'aanitc Ehstaran. Ehstar tahsh okiih kanoonaan Hetakoon ci⁠anta waapamaanitc Mwaartihkaaiyan ci⁠kakwe kihkentaminitc wekonen kaa⁠mikoshkaatentami'ikonitc, wekonen kaye wenci mikoshkaatentaminitc.

⁶ Miihsh Hetak kaakii anta waapamaatc Mwaartihkaaiyan eshi'ayaanitc eshi nihtaa maawaci'itink kihci ootenaank enishi piintikenaaniwaninik kihciokimaawikamikonk.

⁷ Mwaartihkaai ihsa tahsh okii wiintamawaan kahkina kekoon kaa⁠ishihsetc. Kiih⁠tipaacimo kaye aaniin minihk shooniyaan Emanan (Haman) kaah⁠pakitinaanitc i'imaa eshi ahsimintc kihciokimaa oshooniyaaman ci⁠aapatisinitc nihsimintc Coowa'.

⁸ Mwaartihkaai tahsh okii miinaan Hetakoon oshipii'ikan eshi oshipii'ikaatenik kihciokimaan otinaahkonikewinini ci⁠caaki'intwaa Coowak. I'i tahsh oshipii'ikan weti ootenaank Soohsa (Susa) kiih⁠tashi oshipii'ikaateni. Miitahsh kaakii onci miinaatc ci⁠awi waapanta'aanitc, ci⁠wiintamawaanitc kaye Ehstaroon. Okii antawenimaan Ehstaroon ci⁠anta waapamaanitc kihciokimaan ci⁠kakwecimaanitc ci⁠koohpaatenimikowaatc, ci⁠kakwetwehtamawaanitc kaye Coowa' (Jews) ci⁠naatamawimintc.

⁹ Miitahsh Hetak kaakiih pikiiwetc ekii wiintamawaatc Ehstaroon aaniin kaa'ikotc Mwaartihkaaiyan.

¹⁰ Ehstar tahsh o'o kii‑ishi nahkwehtam, ekii'inaatc Hetakoon (Hathach) o'o ci⁠awi'inaanitc Mwaartihkaaiyan,

¹¹ “Kahkina ohsha kihciokimaa otanohkii'aakana', kahkina kaye kaa⁠tipenimaatc pemaatisinitc eyaanitc otahkiimink, okihkentamini eshihsininik inaahkonikewin. Kiishpin inini, komaa kaye ihkwe anta waapamaatc kihciokimaan i'imaa kaashi ayaanitc kihciokimaawapiwinink, antomikohsik kihciokimaan, miihsh ehtako'i eshinaakwaninik ci⁠nihsintipan. Mii ehta ko keshi nihsaahsiwintipan kiishpin kihciokimaan niimaahkonamaakotc kaa⁠osaawaapihko shooniyaa waapihkowaninik sahka'onaahkoni. Mii ohsha 'i aasha nihsimitana (30) tahso kiishik e⁠ishihsek ishkwaac kaakii antomihpan ci⁠waapamak kihciokimaa,” kii‑ihkito.

¹² Ahpii tahsh Mwaartihkaai kaa⁠noontank aaniin kaa⁠pii'ikotc Ehstaroon,

¹³ miihsh Mwaartihkaai o'o kaa⁠ishi nahkwehtawaatc, “Keko inentanken e⁠ayaayan kihciokimaawikamikonk kiin ehta ci⁠onci shaapwiiyan i'i Coowak kaawiih tootawintwaa.

¹⁴ Kiishpin hsa kekoon ihkitohsiwan noonkom o'o kaa⁠ishihsek pahkaan maawiin mihsawaa ta⁠onciimakan ke⁠naatamaakowaatc, ke⁠shaapwii'ikowaatc kaye Coowak. Kiin itahsh wiin, iki kaye kitetehkaank kaa⁠onciiwaatc kahkina hsa kika nihsikoom. Mii mawiin o'o kaa⁠onci kihciokimaahkwewiyan o'o ishiahpii.”

¹⁵ Ehstar tahsh o'o kii‑ishi anoohkii ci⁠awi'inimintc Mwaartihkaaiyan:

¹⁶ “Haw, maacaan awi wiintamaw ci⁠maawaci'itiwaatc kahkina Coowak weti Soohsa ootenaank eyaawaatc, keko tahsh ahpii wiihsinihkek ci⁠anami'ehtamawiyek. Keko wiihsinihkek keko kaye minihkwehkek nihsokiishik, tipihkahk, kiishikahk kaye. Mii hsa 'i keniinawint ke⁠ishihcikeyaank iki ihkwewak kaa⁠wiici'iwaatc ci⁠wiihsinihsiwaank ci⁠minihkwehsiwaank kaye ci⁠anami'aayaank. Miitahsh keshi anta waapamak a'a kihciokimaa ci‑ishihcikeyaan kaa⁠inahtehsinok onahshowewin. Kiishpin hsa o'o onci nipoyaan, mii hsa 'i pisaan ci⁠nipoyaan,” kii‑ihkito.

¹⁷ Miihsh Mwaartihkaai kaa'anishi maacaatc kahkina ekii ishihciketc kaakii ishi anoonikotc Ehstaroon.