Ehstar 3 - Ojibwe Kihcimasina'ikan

Eman Kii'inentank Ewiinihsaatc Coowa'

¹ Naanaake tahsh e⁠ani ishihsek Kihciokimaa Seraksiihs (Xerxes) okii ishpakimaan Eman (Haman) eshinihkaasonitc ekii inakimaatc maawac ci⁠niikaanentaakosinitc ahpiihc wiin i'i kotak wekimaawentaakosinitc. Eman iitok kii⁠otete Ahmitehta (Hammedatha) kaakii ontahkaanesinitc Ekaak (Agag) eshinihkaasonitc.

² Kihciokimaa hsa okii inaa' kahkina wekimaawentaakosinitc ci⁠ociciinkwanapiihtawaanitc, ci animihkohtawaanitc ini Emanan ci⁠naakohtoonitc e⁠kihtentaakosinitc. A'a tahsh Mwaartihkaai (Mordecai) kaawiin okii⁠ociciinkwanapiihtawaahsiin, kaawiin kaye cikii kihtenimaatc.

³ I'i tahsh kotak wekimaawentaakosinitc wekimaawanohkiinitc okiih kakwecimikoo' ekii'ikotc, “Mwaartihkaai, wekonen itahsh wenci shashiipihtamowatc kihciokimaa enahshowetc?”

⁴ Entahso kiishik ihsa kookiih⁠kanoonikoo', kaawiin itahsh kii‑inentansii i'i ci‑ishihciketc. Miihsh kaa⁠ishi wiintamawaatc Coo (Jew) eh⁠tinowitc. Miitahsh kaa⁠ishi wiintamawaanitc Emanan taka ci⁠pihsiskenimaawintipan Mwaartihkaai kaakii ishihciketc.

⁵ Ahpii tahsh Eman kaa⁠kihkentank ewii ociciinkwanapiihtaakohsik, ewii animihkohtaakohsik kaye ci⁠kihtenimikohpan, wiinke hsa kii⁠nishkaatisi.

⁶ Ahpii tahsh kaa⁠kihkentank Mwaartihkaaiyan Coo eh⁠tinowinitc, awahshime tahsh kii‑inentam ewiih tootawaatc. Kii‑inentam ewiih caaki'aatc kahkina enawemaanitc Mwaartihkaaiyan. Kahkina hsa ko ewii nihsaatc Coowa' eyaanitc eshi okimaawinitc ahkiink kihciokimaan Seraksiihsan.

⁷ Mitaahshiniishopipoon (12) kaa⁠kihciokimaawitc Seraksiihs, peshikokiisihsoon eh⁠pimakinsonitc Niihsaan (Nisan) eshinihkaasonitc, mii hsa 'i ahpii kaa‑anta'otaahpinikenk enaahsamiitc Eman. Miitahsh kaakii onci ishihcikenk ewii onahcikaatek kiishikan, kaye tahsh ke⁠pimakinsotc kiisihs. Miihsh kaakii mihkawi otaahpinintc mitaahshiniishokiisihs (12), Etar (Adar).

⁸ Miitahsh Eman kaa'inaatc kihciokimaan Seraksiihsan, “Ayaawak ihsa iki tino pehkaanwewaanakisiwaatc pemaatisiwaatc misiwe e⁠ayaawaatc kitahkiimink kaashi tipencikeyan pahkaan e⁠pahkewenintisowaatc. Pahkaan kaye ishihtwaawak eshihtwaanitc kotak awiya'. Kaawiin kaye opapaamihtansiinaawaa kitoonahshowewinan. Kaawiin ta⁠ishihsehsinoon ci⁠papaa pisiskenimaahsiwintwaapan.

⁹ Kiishpin itahsh kihciokimaa eshi minwaapantank, onahtoon onahshowewin kahkina ci⁠nihsintwaa. Kiishpin itahsh ishihcikeyan, niin ihsa piko ninka pakitinaa niishwaahsimitanashinaanan mitaahswaahk tahso tipaapiishkoocikan 75,000 (lbs) waapaapihko shooniyaa waapihk i'imaa eshi ahsintc kihciokimaa shooniyaa. Miihsh a'a shooniyaa ke⁠aapatisitc o'owe kaawii inahshoweyan.”

¹⁰ Miitahsh kihciokimaa kaa⁠ishi kiihcikoshkawaatc onaapininciipisonan ekii miinaatc Emanan wetetenitc Ahmitehtawan kaakii ontahkaanesinitc Ekaak eshinihkaasonitc. Eman iitok kaakiih shiinkenimaatc Coowa'.

¹¹ Miihsh kihciokimaa kaa'inaatc, “Kanawenim kishooniyaam, pisaan iko tootaw iki pemaatisiwaatc eshi mihsawentaman.”

¹² Mitaahshinihsokiishik (13) itahsh e⁠ishihsenik eh⁠pimakinsonitc peshikokiisihsoon, mii 'i Eman kaakii antomaatc kihciokimaa otoshipii'ikewininiima' ekii wiintamawaatc aaniin ke⁠ishipii'ikenitc, kaye tahsh ci‑ishipii'ikaatenik entahso ishikiishwenitc kahkina awiya'. Kahkina tahsh wekimaawentaakosinitc, kaa⁠niikaanisinitc, i'i kaye tepentaminitc pepahkaan ahkiin kii‑ishinisha'amawaawa' o'o onahshowewin. Kihciokimaa hsa owiinsowin kii⁠aapatanini, kaye ekii masinihshimaatc kihciokimaa onaapininciipisonini.

¹³ Iki tahsh kaakiih pimipahtwaawaatc inaacimowinan misiwe ahkiink okii ishiwitoonaawaa o'o onahshowewin. Miitahsh kaa⁠ishipii'ikaatek kahkina Coowak ci⁠nihsintwaa peshiko kiishik ahpii mitaahshinihsin (13) inakinsonitc Etar kiisihsoon. Kahkina Coo kaatinowiwaatc, oshkaya'aak, kihci aya'aak, ihkwewak, apinoonciishak iko kaye. Kahkina hsa ci⁠nihsintwaa, otaya'iimiwaan kaye ci⁠otaahpinikaatenikin.

¹⁴ I'i hsa eshipii'ikaatek onahshowewin kii‑inaahkonikenaaniwan misiwe ahkiink ayaawaatc awiyak ci⁠kihkentamowaatc, kahkina tahsh awiyak ci⁠kwayaanciiwaatc i'i ahpii ishi kiishikaninik.

¹⁵ I'i hsa tahsh onahshowewin kii⁠kihkentaakohcikaate i'imaa maawac iko kihci ootenaank Soohsa (Susa). Miihsh iki kaakiih pimipahtwaawaatc inaacimowinan kaa⁠ishi maacii aacimowaatc misiwe ahkiink. Kihciokimaa hsa a'a kaye Eman kii⁠nanamatapiwak ekii minihkwewaatc mekwaa piko e⁠wanaayentaakwaninik i'imaa kihci ootenaank Soohsa.