ᑑᑕᕒᐋᓇᒦ 32 - Ojibwe Kihcimasina'ikan

¹ Kiishik, taka pisintawihshin ewiih kiikitoyaan, Taka kaye ahki aaniin kaawii ihkitowak.

² Ninkihkino'amaakewinan hsa ta⁠inentaakwanoon taapishkoo kaa⁠kimiwank, Nintihkitowinan taapishkoo kaa⁠shahki'ayaak, Taapishkoo kaa⁠papaami piihsa'ank waapikwaniihkaank, Taapishkoo kaa⁠nihshikaaci kimiwank oshki kihtikaanink.

³ Ninka miikwehciwentamowaan hsa kaaTipenciketc owiinsowin, Opimaatisiima' oka tashintamini eshi kihci inentaakositc.

Moosihs Kiiwiintamaaketc Aasha Kekaa Ci'ishkwaapimaatisitc

⁴⁵ Ahpii tahsh Moosihs (Moses) kaa⁠ishkwaa wiintamawaatc i'i kahkina Isriyala' (Israel) Kishemanitoon kaakii ihkitonitc,

⁴⁶ miitahsh o'o kaa'inaatc, “Otaahpinamok tahsh ono kahkina ihkitowinan kite'iwaank kaashi ayaankwaamiminakook noonkom kaa⁠kiishikahk. Wiintamawihkwak itahsh kaye kiniicaanihsiwaak ayaankwaam ci‑ishihcikewaatc, ci⁠tootamowaatc o'o kahkina kaa⁠ihkitoomakaninik onahshowewin.

⁴⁷ Kaawiin hsa anihsha kitikoohsiim i'i kaa⁠ikooyek, mii ohsha i'imaa wenciik kipimaatisiwiniwaa! Na'ihtamok itahsh kinwesh ci⁠tashi pimaatisiyek weti ahkiink kaawii ishi piintikeshkaayek. Akaamink iitok Cwaartan (Jordan) siipink ishi'ayaa ahki kaawiih tipinawewisiyek,” okii inaa'.

⁴⁸ KaaTipencikenitc itahsh Moosihs okii'ikoon i'i ahpii peshikwan eh⁠kiishikaninik,

⁴⁹ “Weti tahsh Moowap ahkiink ishaan eshi'ayaakin kihci waciin Aparim (Abarim) eshinihkaatekin. Kwehkaya'ii nahke kaashi ayaak i'i kihci ootena Cerahko (Jericho). Ahkwaamaciwehkan tahsh i'i kihci waciw Niipo (Nebo) kaa'icikaatek ci⁠waapantaman i'i ahki Kenan (Canaan) kaawii miinakwaa pemaatisiwaatc Isriyalak ci⁠tipinawewisiwaatc.

⁵⁰ I'imaa keshi ahkwaamaciweyan kihci waciink, mii hsa i'imaa keshi ishkwaa pimaatisiyan, ci⁠wiiciiwatwaa iki kaa⁠pimaatisihsikwaa taapishkoo kiicihkiwensi Eran (Aaron) kaakii ishi ishkwaa pimaatisitc weti kihci waciink Hor (Hor) ecikaatenik.

⁵¹ Aaniihsh kaawiin weweni kikiih tepweyenimihsiim mekweya'ii kaakii ishi'ayaawaatc pemaatisiwaatc Isriyalak weti nipi kaa⁠ishi'ayaak Meripa ciikaya'ii Ketesh ootenaank, pikwatahkamik Sin (Zin) kaa⁠ishinihkaatek. Kaawiin iitok kaye kikiih kihtenimihsiim enaahsamiiwaatc pemaatisiwaatc Isriyalak.

⁵² Waahsa tahsh kika onci tepaapantaan i'i ahki; kaawiin tahsh kika ishaahsii weti cikiih piintikeshkaayampan i'i ahkiini kaawii miinakwaa pemaatisiwaatc Isriyalak.”