ᑑᑕᕒᐋᓇᒦ 31 - Ojibwe Kihcimasina'ikan

Caahshowaa Kiinaapishkawaatc Moosihsoon

¹ Moosihs (Moses) itahsh kii‑ishaa ekii awi kanoonaatc kahkina Isriyala' (Israel).

² Miitahsh o'o kaa⁠ihkitotc, “Aasha ohsha ninkotwaahk niishtana (120) nintahso pipoonwe, kaawiin hsa awahshime nintaa kashkihtoohsiin ci⁠niikaaniihtamawinakook. Aaniihsh kaaTipenciketc ninkii'ik, ‘Kaawiin hsa kiin kika aashawishkaahsii i'i Cwaartan (Jordan).’

³ Wiin hsa piko kaaTipenciketc kiKishemanitoomiwaa kika niikaaniihtamaakowaa aashawishkaayek. Wiin hsa ke⁠shaakooci'aatc kaa⁠pepahkaanwewaanakisinitc pemaatisinitc keni ishaayek, oka mahkamaa' kaye otahkiimini. Caahshowaa (Joshua) hsa kika niikaaniihtamaakowaa aashawishkaayek, ci‑ishihsenik kaaTipenciketc kaa⁠ihkitotc.

⁴ Mii hsa kaaTipenciketc ke⁠tootawaatc i'i pemaatisinitc taapishkoo kaakiih tootawaatc Saaihaanan (Sihon), shikwa Aakan (Og) kaakiih kihci okimaawinitc Emorii kaatinowinitc (Amorites), otahkiimini kaye kaakii nihshiwanaacihtamawaatc.

⁵ KaaTipenciketc hsa oka ishi'aa' ci⁠shaakooci'imek, mii hsa 'i eshinaakwahk ci⁠tootawekwaa kahkina kaakii ishi anooninakook.

⁶ Mashkawi ayaak, mashkawentamok kaye, keko nininkaanimisihkek ci⁠kohsekwaa, aaniihsh kaaTipenciketc kiKishemanitoomiwaa kika wiiciiwikowaa. Kaawiin hsa kika nakanikohsiiwaa, kaawiin kaye kika wepinikohsiiwaa.”

⁷ Miitahsh Moosihs kaakii antomaatc Caahshowaan o'o ekii'inaatc enaahsamiinitc kahkina Isriyala' (Israel), “Mashkawi ayaan, mashkawentan, kiin hsa kika ishi wiiciiwaak oko pemaatisiwaatc weti ahkiink kaaTipenciketc kaakii aayiici ahshotamawaakopanen okehteya'aamiwaapanii' ewii miinaatc, kiin hsa tahsh kika oshi miinaak ci⁠tipinawewisiwaatc.

⁸ Wiin hsa piko kaaTipenciketc kika niikaaniihtamaak, kika wiiciiwik kaye. Kaawiin hsa kika nakanikohsii, kaawiin kika wepinikohsii. Keko sekisihken, keko mikoshkaatentanken,” okii'inaan.

Onahshowewin Entahsoniishwaahso pipoon Ci'anamihcikaatekipan

⁹ Miitahsh Moosihs (Moses) kaakii oshipii'ank o'o onahshowewin ekii miinaatc i'i kaa⁠niikaanisinitc i'imaa Isriyala', i'i kaye anami'ewikimaa' Liipaaink (Levites) wentahkaanesinitc kaakiih pimiwitoonitc kaaTipenciketc Otahshotamaakemahkahkoni.

¹⁰ Miihsh o'o Moosihs kaa'inaatc Isriyala', “Eni ayishkwaahsekin hsa neniishwaahso (7) pipoon ahpii kiih⁠kaahsi'ikaatekin masina'ikewinan, ahpii kii⁠akawaahte'ikani wiihkwantiiwahkamikisink.

¹¹ Ahpii kahkina Isriyalak (Israel) piishaawaatc eshi'ayaanitc kaaTipencikenitc kiKishemanitoomiwaan keshi onaapantaminitc, mii hsa 'owe onahshowewin ke⁠anamihtooyan ci⁠noontamowaatc kahkina Isriyalak.

¹² Maamawi antom pemaatisiwaatc, ininiwak, ihkwewak, apinoonciishak kaye, meyakisiwaatc kitootenaamiwaank eyaawaatc ci⁠noontamowaatc, ci⁠kihkentamowaatc kaye, ci⁠kohtaanenimaawaatc itahsh kaaTipencikenitc kiKishemanitoomiwaan. Weweni kaye ci‑ishihcikewaatc kahkina ehkitoomakaninik o'o onahshowewin.

¹³ Oniicaanihsiwaa' kaye kehkentansinik o'o onahshowewin oka noontamini ci⁠kihkentaminitc ci⁠kohtaanenimaanitc kaaTipencikenitc kiKishemanitoomiwaan, minihk iko ke⁠taanotamek i'i ahki aasha kekaa kaawii awi tipinawewisiyek awi aashawishkaayek Cwaartan (Jordan),” okii inaa'.

Moosihs Ishkwaac Kaakii'ikotc KaaTipencikenitc

¹⁴ KaaTipencikenitc itahsh Moosihs (Moses) okii'ikoon, “Inashke, mii ohsha 'i aasha kekaa ci‑ishkwaa pimaatisiyan; antom itahsh Caahshowaa (Joshua), ci⁠piishaayek kaashi maawaci'itink pakwaanekamikonk, miitahsh ci⁠onakimak,” okii'ikoon. Moosihs, a'a tahsh kaye Caahshowaa kii‑ishaawak eshi maawaci'itink pakwaanekamikonk.

¹⁵ Miihsh kaaTipencikenitc wahkwiink kaakiih patahkaanahkwaninik kaakii onci naakosiihtaakowaatc i'imaa eshi ishkwaantemiwaninik eshi maawaci'itink pakwaanekamik.

¹⁶ Miihsh o'o Moosihs kaakii'ikotc kaaTipencikenitc, “Aasha kekaa ci‑ishkwaa pimaatisiyan. Oko tahsh wiin pemaatisiwaatc ta⁠pihshikwaatentaakosiwak ci⁠nooci'aawaatc mayaki manitoo' eyaanitc ahkiink kaawii ishi piintikeshkaawaatc. Ninka wepinikook ci⁠piikonamowaatc ahshotamaakewin kaakii oshihtamawakwaapan.

¹⁷ Miihsh i'i ahpii kiishikaninik ninishkaatisiwin oka pakamishkaakonaawaa. Ninka wepinaak itahsh, ninka kaasoohtawaak kaye. Ta⁠nihshiwanaatisiwak itahsh, ta⁠paahtiinatinini hsa macikekoon ke⁠otihsikowaatc, wahsitaawihsewinan kaye oka otihsikonaawaa. I'i tahsh ahpii kiishikaninik ta⁠ihkitowak, ‘Miina'o wenci otihsikoyaank ono macikekoonan Kishemanitoo e⁠wiiciiwihsiyamintc?’

¹⁸ Tepwe hsa ninka kaasoohtawaak i'i ahpii kiishikaninik onsaam aaniihsh misiwe ishi macitootamok ewii nooci'aawaatc kotak manitoo'.”

¹⁹ “Noonkom itahsh oshipii'an o'o nikamon kiinawaa onci, ci⁠kihkino'amawatwaa Isriyalak (Israel) ci‑ina'amowaatc. Miitahsh i'iweni ke⁠tipaacimikowaatc nikamonini Isriyalak.

²⁰ Ahpii tahsh piinakwaa i'imaa ahkiink kashi wenooci nihtaawikininik kekoon, kaakii ahshotamawimakipan okehteya'aamiwaa', ishkwaa tewiihsiniwaatc itahsh, ani wenoocihsewaatc itahsh kaye, mii hsa 'i ci⁠kwehkiiwaatc ci⁠nooci'aawaatc kotak manitoo', ci⁠anami'ehtawaawaatc kaye. Miihsh keshi aanawenimiwaatc, ci⁠piikonamowaatc kaye ahshotamaakewin kaakii oshihtamawakwaapan.

²¹ Tani ishihseni tahsh ahpii ci⁠otihsikowaatc niipiwa' macikekoonan, wahsitaawihsewinan kaye. Miitahsh o'oweni nikamon ke⁠tipaacimikowaatc aaniihsh kaawiin oka waniihkenotansiini ke⁠opiiwesiimiwaatc. Ninkihkenimaak hsa noonkom kaa⁠kiishikaninik enentamowaatc cipwaa ishiwinakwaa weti ahkiink kaakii ayiici ahshotamawakwaa.”

²² Miitahsh Moosihs kaakii oshipii'ank o'o nikamon i'i peshikwan eh⁠kiishikaninik, ekiih kihkino'amawaatc Isriyala'.

²³ Miitahsh kaaTipenciketc kaakii onakimaatc Caahshowaan kaakii otetenitc Nan (Nun) eshinihkaasonitc, o'o hsa okii'inaan, “Mashkawi ayaan, mashkawentan kaye, kiin ohsha kika ishiwinaak Isriyalak weti ahkiink kaakii ayiici ahshotamaakeyaampan, kika wiiciiwin kaye,” okii'inaan.

²⁴ Miihsh Moosihs masina'ikanink kaakii ishi oshipii'ank otoonahshowewinini kaaTipencikenitc piinihsh wiinke ekiih kiishipii'ank.

²⁵ Miihsh kaakii'inaatc Liipaaink wentahkaanesinitc kaakiih pimiwitoonitc kaaTipencikenitc Otahshotamaakemahkahkoni ekii'inaatc,

²⁶ “Otaahpinamok hsa o'o masina'ikan eshi oshipii'ikaatek onahshowewin cishi ahtooyek ohpimeya'ii eshi ahtek i'i kaaTipencikenitc kiKishemanitoomiwaa otahshotamaakemahkahk. Miitahsh i'imaa ke⁠ayaak ke⁠tipaacimikoyek.

²⁷ Kikihkenimininim ohsha eh⁠shashiipihtamek, e⁠mamayehciwiyek kaye; inashke noonkom iko kaa⁠kiishikahk e⁠wiicipimaatisiiminakook, kipi shashiipihtaam, e⁠shashiipihtawek kaaTipenciketc. Aanciihke maawiin kika shashiipihtaam kii‑ishkwaa pimaatisiyaan!

²⁸ Piitamawihshik hsa kahkina kaa⁠niikaanisiwaatc entahswewaanakisiyek, kaani aanihke niikaanisiwaatc kaye ewii wiintamawakwaa ono ihkitowinan ci⁠noontamowaatc. Kiishik itahsh ahki kaye niwiih kanootaanan ci⁠tipaacimikoyek.

²⁹ Ninkihkentaan ohsha kii‑ishkwaa pimaatisiyaan noociko ishihcikeyek, ci⁠nakatamek kaye kaakii'ininakook ci‑ishihcikeyekipan. Naanaake tahsh ta‑ani ishihse macikekoon ci⁠otihsikoyek, aaniihsh kika maci'ishihcikem enaahsamiitc kaaTipenciketc. Kitishihcikewiniwaank hsa kika onci nishki'aawaa,” kii‑ihkito.

Moosihs Kaakii'ina'ank

³⁰ Moosihs itahsh kiih⁠kakito ekii noontaakotc kahkina Isriyala' ekii wiintank ehkitoomakaninik o'o nikamon, piinihsh ekiih kiishihtootc.