ᑑᑕᕒᐋᓇᒦ 30 - Ojibwe Kihcimasina'ikan

Aaniin Kekii'ishihcikenaaniwankipan Cishawentaakosink

¹ “Inashke tahsh aasha kikii miinininim kiinawaa piko ci⁠onentamaasoyek entawentamowekwen ci⁠shawentaakosiyek, komaa kaye entawentamowekwen ci⁠macakimikooyek. Ahpii tahsh ishitaayek weti kaashi ayaawaatc kaa⁠pepahkaanwewaanakisiwaatc pemaatisiwaatc, kaakii ishi ohsweninek kaaTipenciketc, o'o tahsh ishihseyek, miitahsh i'i ci⁠maamihkawiyek aaniin kaakii ishi miininakook cishi onentamaasoyek.

² Kiishpin tahsh kiinawaa, iki kaye kipiiwesiimiwaak kiiwe naasihkawek kaaTipenciketc, wawiinke misiwe kite'iwaank onci na'ihtamowek otinaahkonikewinan ono kaa⁠wiintamawinakook noonkom kaa⁠kiishikahk.

³ Miitahsh kaaTipenciketc kiKishemanitoomiwaa ci⁠kiiwe minohse'inek, ci⁠kitimaakinawinek kaye. Misiwe hsa kaakii ayishi ohsweninekipan kaashi ayaanitc pehkaanwewaanakisinitc pemaatisinitc, kika onci kiiwe maamooshakinikowaa kahkina kaa⁠tahshiyek kaaTipenciketc kiKishemanitoomiwaa.

⁴ Mihsawaa ko kiishpin kii‑ishiwinikooyekipan maawac iko kaashi wawaahsawank o'o ahki, mii hsa weti kaaTipenciketc kiKishemanitoomiwaa ke⁠onci maawantooninek, mii kaye weti ke⁠onci piininek.

⁵ KaaTipenciketc kiKishemanitoomiwaa tahsh kika pi ishiwinikowaa i'imaa ahkiink kikehteya'aamiwaa' kaakiih tipinawewisinitc, kiinawaa ci⁠tipinawewisiyek. Kika ishi'ikowaa kaye nawac kiinawaa ci⁠minohsewek, nawac kaye ci⁠paahtiinowek ahpiihc wiin i'i kaakiih tahshinitc kikehteya'aamiwaapanii'.

⁶ Miihsh kaaTipenciketc kiKishemanitoomiwaa ci‑ishi'inek, kipiiwesiimiwaa' kaye ci⁠na'ihtamowek kite'iwaank. Mii hsa tahsh i'i ci⁠saaki'ek kaaTipenciketc kiKishemanitoomiwaa misiwe ko kite'iwaank, misiwe kaye kitahcaahkowaank kiinawaa ci⁠onci pimaatisiyek.

⁷ Miihsh kaaTipenciketc kiKishemanitoomiwaa meshkwac ci‑ishi'aatc kaa⁠shiinkenimiminek, kaa⁠kakwaataki'iminek kaye ci⁠pakamishkaakonitc i'i kaakii ishi nipowakimikooyekipan.

⁸ Miitahsh miinawaa ci⁠na'ihtamowek kaaTipenciketc kaa'ininek, ci⁠kanawentamowek kaye kahkina otinaahkonikewinan kaa⁠wiintamawinakook noonkom kaa⁠kiishikahk.

⁹ KaaTipenciketc kiKishemanitoomiwaa hsa tahsh kaye kika ishi'ikowaa wawiinke ci⁠wenooci minohsewek, kahkina kekoon kininciiwaank kaa⁠onci ishihcikewek. Kika ishi'ikowaa kaye cini paahtiinonitc kiniicaanihsiwaa', cini paahtiinonitc kaye kipishihkiimiwaa'. Miitahsh peshikwan ke⁠tootank kikihtikaanahkamikowaan ci⁠wenooci nihtaawikihcikemakaninikin. KaaTipenciketc ohsha ta⁠minwentam miinawaa ci⁠minohse'inek, taapishkoo kaakii ishi minwentank e⁠minohse'aatc kaakii okehteya'aamiyek.

¹⁰ Kiishpin kota na'ihtamowek aaniin eninek kaaTipenciketc kiKishemanitoomiwaa, ci⁠kanawentamowek otinaahkonikewinan, otihkitowinan kaye kaa⁠oshipii'ikaatenikin i'imaa masina'ikanink kaashi oshipii'ikaatenik onahshowewin. Kiishpin kota ishi kwehkiihtawek kaaTipenciketc kiKishemanitoomiwaa misiwe ko kite'iwaank, misiwe ko kaye kitahcaahkowaank.”

¹¹ “O'owe hsa inaahkonikewin kaa⁠wiintamawinakook noonkom kaa⁠kiishikahk kaawiin kika sanakentansiim, kaawiin kaye waahsa ayaamakahsinoonan.

¹² Kaawiin kaye kihci kiishikonk ayaahsinoon kiinawaa ci⁠onci ihkitoyekipan, ‘Awenen itahsh inaa ke⁠ishaahpan ishpimink kihci kiishikonk ci⁠naasihkankipan, ke⁠pisintamankipan, ci⁠tootamowankipan kaye eshihsininik.’

¹³ Kaawiin kaye akaamink kihcikamiink ayaahsinoon ci⁠onci ihkitoyekipan, ‘Awenen itahsh akaamink ke⁠ishaahpan kihcikamiink ci⁠naasihkankipan ci⁠piitamawinank tahsh ci⁠pisintamowank, ci⁠tootamowankipan kaye?’

¹⁴ I'iweni tahsh wiin Kishemanitoo otihkitowin kipeshwaapantamowaam, kitooniwaank iitok kitayaam, kite'iwaank kaye, kiinawaa ci⁠kashkihtooyek ci⁠tootamowek.”

¹⁵ “Inashke tahsh kiwaapantaam noonkom kaa⁠kiishikahk eh⁠pakitinamawinakook ci⁠onentamaasoyek wekonen entawentamek, pimaatisiwin komaa kaye nipowin; kaa⁠onishihshink komaa kaye kaa⁠maanaatahk.

¹⁶ Kiishpin hsa na'ihtamowek otinaahkonikewinan kaaTipenciketc kiKishemanitoomiwaa kaa⁠wiintamawinakook noonkom kaa⁠kiishikahk, kiishpin kaye saaki'ek, na'ihtamowek kaye, kanawentamowek itahsh kaye kahkina otinaahkonikewinan, mii hsa 'i ci⁠minohseyek, miikaye'i cini paahtiinoyek kaa⁠tahshiyek. KaaTipenciketc kiKishemanitoomiwaa hsa kika minohse'ikowaa i'imaa ahkiink kaawiih tipinawewisiyek.

¹⁷ Kiishpin tahsh wiin shashiipihtawek, wiih⁠pisintansiwek kaye, ishi wiihkoshkaayek itahsh kaye ci⁠anami'ehtawekwaa kotak pahkaan manitook wii⁠anohkiihtawekwaa kaye,

¹⁸ miitahsh kekeht eshi wiintamawinakook noonkom kaa⁠kiishikahk, mii hsa 'i ci⁠nihshiwanaaci'ikooyek. Kaawiin tahsh kinwesh kika pimaatisihsiim weti ahkiink kaa⁠ishaayek akaamisiipi Cwaartan (Jordan).

¹⁹ Miihsh ci⁠kanootamaan i'i kiishik, i'i kaye ahki ci⁠tipaacimikoyek noonkom kaa⁠kiishikahk eh⁠pakitinamawinakook enaahsamiiyek ci⁠otaahpinamek pimaatisiwin; komaa kaye nipowin; i'i kaye shawentaakosiwin komaa kaye macakimikoowin. I'i hsa intawaa pimaatisiwin otaahpinamok, kiinawaa ci⁠pimaatisiyek, iki kaye kipiiwesiimiwaak ci⁠pimaatisiwaatc.

²⁰ Saaki'ek tahsh kaaTipenciketc kiKishemanitoomiwaa, na'ihtawek kaye aaniin eninek, e⁠kihci inenimek kaye, mii hsa imaa ke⁠ontinamek pimaatisiwin kinwesh ke⁠onci pimaatisiyek. I'imaa hsa ahkiink ci⁠tashi pimaatisiyek kaaTipenciketc kaakii ahshotamawaatc ewii miinaakopanen kikehteya'aamiwaapanii' Eparahaaman (Abraham), Aaisikoon (Isaac), ini kaye Cekapoon (Jacob),” kii‑ihkito.