ᑑᑕᕒᐋᓇᒦ 24 - Ojibwe Kihcimasina'ikan

Wepinitiwin Ehtashintek

¹ “Kiishpin hsa inini kii⁠wiitikemaatc ihkwewan, ani na'enimaahsik itahsh, onsaam kekoon e⁠mihkank eshi pehkaatisihsinik mii hsa 'i ke⁠ishihciketc ci⁠oshipii'ank wepinitii masina'ikan ci⁠miinaatc itahsh. Ninkoci itahsh kaye otaawinink oka onci ishinisha'waan.

² A'a tahsh ihkwe kii‑ishkwaa nakatank otaawinini ini ininiwan, kotak itahsh ininiwan ani wiitikemikotc,

³ kiishpin itahsh ini otaanci onaapeman antawenimikohsik, oshihtoonitc itahsh i'i wepinitii masina'ikan, miinikotc itahsh otaawininiink kaye onci saakicinisha'okotc, komaa kaye niponitc ini onaapeman,

⁴ ini hsa nihtam kaakii wiitikemikohpan ininiwan kaawiin ta⁠pakitinaahsiiwan ci⁠kiiwe wiitikemikotc, onsaam aaniihsh kii⁠wiinentaakosi'itiso; mii iitok i'iweni kaa⁠kakwaanihsakentank kaaTipenciketc. Kaawiin kika piitoohsiim macitootamowin i'imaa ahkiink kaaTipenciketc kiKishemanitoomiwaa kaa⁠miininek ci⁠tipinawewisiyek.”

Kotak Onahshowewinan Ehtashintekin

⁵ “Ahpii hsa inini oshkihkwewetc, kaawiin hsa ta‑anta miikaasohsii, kaawiin kaye ta⁠miinaahsii kekoon ci⁠opapaamisiwinitc. Mii hsa 'i eshinaakwaninik peshikopipoon ci⁠ayaatc otaawinink, ci⁠minwentami'aahpan wiiwan kaakii wiitikemaatc.”

¹⁰ “Ahpii hsa kekoonini piko e⁠awi'atc kiwiicitaamaakan, keko piintikewaahken owaahkaa'ikan ci⁠naasihkamowatc kaakii ihkitotc e⁠aswii tipa'ikaaketc.

¹¹ Akwaciink hsa tashi pii'on, taka wiin a'a kaa‑awi'aasoomihk kika piitamaak i'i kaa⁠ihkitotc ewiih tipa'ikaaketc.

¹² Kiishpin itahsh wiin kitimaakisitc, keko wiin kapetipihk kanawentamowaahken kaakii ihkitotc ewiih tipa'ikaaketc.

¹³ Entahsonaakosh ihsa kehcinaac kika kiiwe miinaa i'i kaakii ihkitotc ewiih tipa'ikaaketc, ci⁠kiiwe miinatc i'i okashkiikiiwin ke⁠pisihkank nipaatc, miikwehc itahsh kika'ik. Mii hsa tahsh i'i ke⁠inakintek kwayahkohcikewin enaahsamiitc kaaTipenciketc kiKishemanitoom.”

¹⁴ “Kaawiin hsa kika wayeshimaahsiwaawaa awiya enohkii'ek ketimaakisitc, kekoon kaa⁠noontehsetc, kaa⁠wiici onciimek i'imaa Isriyalahkiink (Israel), mihsawaa ko kaye piiwitewikwen kitootenaamiwaank eshitaatc.

¹⁵ Entahso kiishik hsa kika tipa'amawaawaa cipwaa pankihshimonitc kiisihsoon, eh⁠kitimaakisitc aaniihsh otahpenimonotaan i'i keshi tipa'amawek. Kiishpin tipa'amawaahsiwek, maakishaa oka shaakowaanaan kaaTipencikenitc ci⁠naatamaakotc kiinawaa onci, miihsh macitootamowinink ci‑inakintamaakoyek.”

¹⁶ “Oniiki'ikomaak hsa kaawiin ta⁠onci nihsaahsiiwak aaniin kaashi mamaashiinitc oniicaanihsiwaa', apinoonciishak kaye kaawiin ta⁠onci nihsaahsiiwak aaniin kaakii ishi mamaashiinitc oniiki'ikowaa'. Awiya hsa ko ta⁠onci nihsaa wiin iko kaakii ishi mamaashiitc.”

¹⁷ “Keko kaye maanshi tootawaahkekwaanik kaa⁠piiwitewiwaatc, kiiwahshishaanak kaye ci⁠otaahpinamawekwaa weweni ke⁠onci tootawintwaapan. Keko kaye okashkiikiiwin kiiwaacihkwe otaahpinamawaahkek ci‑inakintamawek kekoonini ke⁠kiiwe tipa'ikaaketc.

¹⁸ Maamihkawik kiinawaa ekiih kakwaataki mihtanohkii'ikooyek weti Iicipahkiink (Egypt), kaaTipenciketc kiKishemanitoomiwaa tahsh weti kikii onci shaapwii'ikowaa. Miitahsh kaa⁠onci anooninakook o'o ci‑ishihcikeyek.”

¹⁹ “Ahpii tahsh manishikeyek kikihtikewahkamikowaank, panaapantamek itahsh pahkweshikaniwi kihtikaan, kaawiin hsa kika kiiwe naasihkansiim. Miiwan hsa ini kaa⁠mayakisiwaatc, kiiwahshishaanak, kiiwaacihkwewak kaye kepi maamooshakinamowaatc, kaaTipenciketc kiKishemanitoomiwaa ci⁠shaweniminek kahkina kekoon eshihcikewek.

²⁰ Ahpii tahsh pawakanaamekwaa aalip tinowaahtikook, keko naahsaap papaamentankek watihkwanan. Miiwan hsa ini kaa⁠piiwitewiwaatc, kiiwahshishaanak, kiiwaacihkwewak kaye ke⁠maamooshakinamowaatc.

²¹ Ahpii kaye mamooshakinekwaa shoominak kaashi kihtikeyek, keko wiin miinawaa naahsaap papaamentankek watihkwanan. Miiwan hsa ini kaa⁠mayakisiwaatc, kiiwahshishaanak, kiiwaacihkwewak kaye kepi maamooshakinamowaatc.

²² Miitahsh ci⁠maamihkawiyek kekiinawaa ekiih kakwaataki mihtanohkii'ikooyek weti Iicipahkiink, miitahsh kaa⁠onci anooninakook o'o ci‑ishihcikeyek.”