ᑑᑕᕒᐋᓇᒦ 18 - Ojibwe Kihcimasina'ikan

Kishemanitoo Kii'ihkitotc Ewiihpiicinisha'waatc Kekanootamaakotc

¹⁴ Miitahsh Moosihs (Moses) kaa⁠ihkitotc, “Ikiweniwak hsa pehkaanwewaanakisiwaatc pemaatisiwaatc ke⁠mahkamekwaa otahkiiwaa opisintawaawaa' kaa⁠kakanoonaanitc ciipaya', i'i kaye kaa⁠mamaantaawi anta kihkencikenitc. Kiinawaa tahsh wiin kaaTipenciketc kiKishemanitoomiwaa kaawiin kipakitinikohsiiwaa o'o ci‑ishihcikeyek.

¹⁵ Meshkwac tahsh kaaTipenciketc kika ishinisha'amaakowaa ke⁠kanootamaakotc taapishkoo niin tino, ewii ontinaatc i'imaa kaashi ayaanitc kiicipimaatisiiwaa'. Miitahsh wa'a ke⁠pisintawek.”

¹⁶ “Miitahsh o'oweni kahkina kaakii ishi kakwecimekipan kaaTipenciketc kiKishemanitoomiwaa weti kihci waciink Oorep (Horeb) ecikaatenik. Mii ahpii eh⁠kiishikahk kaakiih pi naasihkawiyekipan ekii ihkitoyekipan, ‘Keko pakitinihshinaahkaank ci⁠noontawankitc kaaTipenciketc ninKishemanitoominaan, keko kaye pakitinihshinaahkaank awahshime ci⁠waapantamaank i'i kihci ishkote ci⁠nipohsiwaank.’

¹⁷ Miitahsh o'o kaa'ishihpan kaaTipenciketc, ‘Aahpici hsa kwayahk ihkitowak i'i kaa⁠ihkitowaatc.’

¹⁸ O'o tahsh kii⁠ani ihkito, ‘Ninka ontinamawaak hsa ke⁠kanootamaakowaatc taapishkoo kiin tino, i'imaa hsa ninka ontinimaan kaashi ayaanitc wiicipimaatisiiwaa'. Nintihkitowinan hsa oka tashintamaakowaan; keshi anoonimak tahsh kaye kahkina oka'ikowaan.

¹⁹ Awenen tahsh iko ke⁠pisintansik nintihkitowinan ke⁠ihkitonitc i'imaa niwiinsowininiink, niin hsa piko a'awe ninka nana'ahsaa.

²⁰ A'a tahsh Kishemanitoon kaa⁠kanootamawaatc kiishpin kekoonini ihkitotc niwiinsowinink kaakii ishi anoonaahsiwak, a'a kaye kekoonini kaa⁠ihkitotc owiinsowininiink kotak manitoo', mii hsa awe ke⁠nipotc.’ ”

²¹ “Kite'iwaank maawiin kitihkitomiwaatok, ‘Aaniin tahsh ke⁠onci kihkentamaank kaaTipenciketc ehkitohsik?’

²² Ahpii hsa kekoonini kii‑ihkitotc a'a Kishemanitoon kaa⁠kanootamawaatc otishinihkaasowininiink kaaTipencikenitc, kiishpin itahsh ishihsehsininik i'i kaa⁠ihkitotc, tepwewansininik kaye, kaawiin iinsan i'iweni kaaTipenciketc otihkitowin. Wiin iinsan piko i'iweni kii‑inentam kaakii ihkitotc a'a okanootamaake; keko tahsh memwehc kohtaanenimaahkek a'a tino,” okii inaa'.