ᑑᑕᕒᐋᓇᒦ 11 - Ojibwe Kihcimasina'ikan

KaaTipenciketc Okihci'inentaakosiwin Ehtashintenik

¹ “Kika saaki'aawaa hsa kaaTipenciketc kiKishemanitoomiwaa, mooshak kaye kika kanawentamowaam eshi antaweniminek, otihkitowinan kaye otanami'ehcikewinan kaye otinaahkonikewinan kaye.

² Noonkom itahsh kaa⁠kiishikahk kihkentamok kaawiin wiin kiniicaanihsiwaak kaa⁠kanoonakwaa, kaakiih pi kihkentansikwaa, kaakiih pi waapantansikwaa kaye eshi kihkino'ikenitc kaaTipencikenitc kiKishemanitoomiwaan. Kiinawaa ohsha kaa'ininakook kaakii waapantamowek okihci inentaakosiwin, omashkawisiiwin, eshihciketc kaye kii⁠wahkawinihkenitc,

³ okihkinawaacihcikewinan kaye, kaakii ishihciketc mekweya'ii Iicipahkiink (Egypt). Kaakiih tootawaatc kaye Peroon (Pharaoh) kihci okimaan, kaakiih tootank misiwe kaye otahkiimini.

⁴ Kikii waapankem iitok aaniin kaah⁠tootawaatc Iicipiiwi shimaakanihsha', omihtatimoomini kaye, otootaapaanaahkoni kaye, ahpii kii‑ishihciketc Misko kihcikamiini (Red Sea) kii⁠nihsaapaawaanikonitc mekwaa kii⁠piminisha'onek. KaaTipenciketc iitok wiinke okiih caaki'aa'.

⁵ Kikihkentaam kaye aaniin kaa⁠ishihcikehtamawinek weti pikwatahkamik piinihsh o'omaa kiihpi takohshinek.

⁶ Kikihkentaam kaye aaniin kaah⁠tootawaatc Tehtanan (Dathan), Apaairaman (Abiram) kaye kaakii otetenitc Iilaaipan (Eliab), Oroopanink (Reuben) kaakii ontahkaanesinitc, ahpii kii⁠paahkihsenikipan ahki kii⁠piincihsewaahpan itahsh. Kahkina entahshinitc iitok otaawininiink eyaanihpan kiih⁠piincihsewa', opakwaanekamikoni, kahkina hsa ko kekoon pemaataninik kaakiih tipentaminitc.

⁷ Kiinawaa hsa kishkiinshikowaank kikii onci waapantaam kihci kekoonan kaaTipenciketc kaakii ishihcike'inek.”

Ehtashintek I'i Ahki Kishemanitoo Kaakii'ahshotamaaketc

⁸ “Kika kanawentaam itahsh kahkina inaahkonikewinan kaa'ininakook noonkom kaa⁠kiishikahk, ci⁠soonkentaakosiyek piintikeshkaayek ci⁠tipinawewisiyek i'i ahki. Aasha iitok kekaa kiwii aashawishkaam ci⁠tipinawewisiyek.

⁹ Miihsh kinwesh ci⁠pimaatisiyek i'imaa ahkiink kaaTipenciketc kaakii ayiici ahshotamawaakopanen kikehteya'aamiwaa' ewii miinaakopanen, opiiwesiimini kaye. Mii hsa i'imaa ahkiink eshi wenooci nihtaawikik kekoon.

¹⁰ I'i hsa ahki kaa⁠piintikeshkaayek ewiih tipinawewisiyek, kaawiin wiin taapishkoo Iicipahkiink (Egypt) kaakiih pi onciiyek inentaakwahsinoon. Wiinke iitok wiin weti kikii kihci anohkiim kii⁠kihtikeyekipan, kii⁠oshihtooyekipan kaye nipi ke⁠ishiciwank kaashi kakihtikaaniwank.

¹¹ I'i tahsh kaawii aashawishkaayek ewii awi tipinawewisiyek i'i ahki, mii hsa i'imaa ahkiink eshi'ayaakin kihci waciin, miikaye imaa eshi papahsatinaak. Wiinke kaye i'imaa nihtaa kimiwan.

¹² Mii hsa 'iweni kaaTipenciketc kiKishemanitoomiwaa kaa⁠naanaakacihtootc ahkiini, kapeya'ii e⁠naanaakacihtootc.”

¹³ “Kiishpin itahsh pakiciihsiwek ci⁠na'ihtamek inaahkonikewinan kaa⁠wiintamawinakook noonkom kaa⁠kiishikahk, ci⁠saaki'ek kaaTipenciketc kiKishemanitoomiwaa, ci⁠anohkiihtawek kaye enikohkote'eyek, misiwe kaye kitahcaahkowaank,

¹⁴ miitahsh i'i ci‑ishihciketc ci⁠kimiwaninik kitahkiimiwaank ahpaniko, kaa⁠nihtaa kimiwank kii⁠takwaakink, kii⁠siikwank kaye. Miitahsh ci⁠nihtaawikink ke⁠maamooshakinamek. Kika ayaam kaye oshki shoominaapo, ke⁠opimitemiyek kaye.

¹⁵ Miihsh ci‑ishihcikeyaan ci⁠mashkohsiihkaak mihshawahkamik ke⁠miiciwaatc kipishihkiimiwaak, kiinawaa tahsh mii 'i ci⁠wiihsiniyek, wiinke ci⁠te'inamanci'oyek.

¹⁶ Ayaankwaamisik itahsh, maakishaa kika kashki'ikoom ci⁠kwehkihcikeyek, ci⁠animihkohtaayek ci⁠anami'ehtawekwaa kotak manitook.

¹⁷ Kiishpin itahsh wiin i'i ishihcikeyek, kaaTipenciketc hsa kika nishki'aawaa. Ta⁠ishihcike tahsh ci⁠kimiwansininik. Inashke kimiwansinok, kaawiin hsa kekoon mihtahkamik ta⁠nihtaawikihsinoon; aahpici tahsh wiipa kika onci kakawaskatem i'imaa sasekaa ahkiink kaaTipenciketc kaa⁠miininek.”

¹⁸ “Ayiitahtook itahsh ono nintihkitowinan kite'iwaank, kinaanaakatawentamowiniwaank kaye; kininciiwaank ishi'akwahpitook, kiskahtikowaank itahsh kaye ishi kikishkamok ke⁠onci kihkinawaaci maamihkawiyek.

¹⁹ Miitahsh o'o keshi kihkino'amawekwaa kiniicaanihsiwaak. Kika kanoonaawaak hsa kitaawiniwaank nanamatapiyek, pimohseyek kaye miihkanaank, pimihshinek kaye, ahpii kaye wanishkaayek.

²⁰ Kiwaahkaa'ikaniwaank itahsh kaye eshi'ayaakin ishkwaantemaahtikoon, kimenikanishkwaantemiwaank kaye kika ishi oshipii'aam nintihkitowinan.

²¹ Kinwesh itahsh kika pimaatisim, kiniicaanihsiwaak kaye kinwesh ta⁠pimaatisiwak i'imaa ahkiink kaaTipenciketc kaakii ayiici ahshotamawaatc kikehteya'aamiwaapanii' ewii miinaatc ci⁠tipinawewisinitc minihk iko ke⁠ayaanik kiishik ishpimink ahkiink.”

²² “Kiishpin itahsh weweni ishihcikeyek ono kahkina onahshowewinan kaa‑anooninakook ci‑ishihcikeyek ci⁠saaki'ek kaaTipenciketc kiKishemanitoomiwaa, ci‑ishi pimohsewek misiwe eshihtwaatc, ci⁠pooni tepweyenimaahsiwek kaye.

²³ Miihsh i'i kaaTipenciketc ci⁠saakitaama'waatc kahkina o'o kaa⁠paapahkaanwewaanakisinitc pemaatisinitc ke⁠ani ishaawek, ci⁠mahkamekwaa iki pemaatisiwaatc nawac kaa⁠paahtiinowaatc, nawac kaye meshkawentaakosiwaatc ahpiihc kiinawaa.

²⁴ Aaniinti hsa ko keshi tahkohkiiyek, mii hsa 'i ke⁠tipinawewisiyek; i'i ke⁠tipinawewisiyek weti ta‑ahkohse pikwatahkamikonk piinihsh weti Lepanan (Lebanon) ahkiink, piinihsh itahsh weti Iyoohparetiis (Euphrates) siipink, piinihsh weti kihcikamiink ninkaapii'anonk inahke.

²⁵ Kaawiin hsa awiya kika shaakooci'ikohsiiwaa; kaakii ishi ahshotamawinek hsa kaaTipenciketc kiKishemanitoomiwaa ta⁠ishihcike aaniinti piko ke⁠ishaayek ci‑ishi'aatc ci⁠kohsiminek i'i pemaatisinitc misiwe i'imaa ahkiink eyaanitc.”

²⁶ “Noonkom itahsh kaa⁠kiishikahk kipakitinamawininim ci⁠onentamek wekonen entawentamek, komaa ci⁠shawentaakosiyek, komaa kaye ci⁠macakimikooyek.

²⁷ Kika shawentaakosim ihsa tahsh kiishpin na'ihtamowek otoonahshowewinan kaaTipenciketc kiKishemanitoomiwaa kaa⁠miininakook noonkom kaa⁠kiishikahk.

²⁸ Kika macakimikoom itahsh wiin kiishpin na'ihtamowaahsiwek otoonahshowewinan kaaTipenciketc kiKishemanitoomiwaa, nakatamek noonkom kaa⁠kiishikahk kaa'ininakook ci‑ishihcikeyek, ishi piminisha'wekwaa tahsh kotak manitook kaakii kihkenimaahsiwekwaa.

²⁹ Ahpii tahsh ani ishihsenik kaaTipenciketc ishiwininek i'imaa ahkiink, ani piintikeshkaayek itahsh ewiih tipinawewisiyek, i'i hsa tahsh shawentaakosiwin i'imaa waciink Kiiraaisim (Gerizim) ecikaatek kika ishi wiintaam, i'i tahsh wiin macakimikoowin i'imaa Iipal (Ebal) waciink kika ishi wiintaam.

³⁰ Ini hsa waciin akaamink Cwaartan (Jordan) siipink ishi'ayaawan, weti nahke kaashi pankihshimotc kiisihs, eshi'ayaawaatc Kenan kaatinowiwaatc (Canaanites). Miiwak iitok iki kaa⁠ishitaawaatc ayaawinink Aarapah (Arabah) ciikaya'ii eshi'ayaanitc kehtentaakosinitc mihtikoo' Moore (Moreh) ecikaatenik, nahpaacinahke eshi'ayaanik Kilkal (Gilgal) ayaawin.

³¹ Miitahsh i'i aasha ewii aashawishkaayek i'i Cwaartan siipi ci⁠tipinawewisiyek i'i ahki kaaTipenciketc kiKishemanitoomiwaa kaa⁠miininek. Kiinawaa tahsh iko kika tipinawewisim, ci‑ishitaayek i'imaa.

³² Aahpici tahsh kika ayaankwaamisim ci⁠na'ihtamek kahkina ihkitowinan, inaahkonikewinan kaye noonkom kaa⁠kiishikahk kaa⁠wiintamawinakook,” Moosihs okii inaa' pemaatisinitc.