Coowel 3 - Ojibwe Kihcimasina'ikan

Kishemanitoo Citipaahkonaatc Kahkina Pemaatisinitc

¹ Miihsh ehkitotc kaaTipenciketc, “I'i tahsh ahpii kiishikahk, mii hsa 'i ci⁠kiiwe naapahtooyaan eshi minohsekipan Coota (Judah) ahki, i'i kaye kihci ootena Ceroosalam (Jerusalem).

² Miitahsh ci⁠maawantoonakwaa kahkina kaa⁠tahswewaanakisiwaatc pemaatisiwaatc ci⁠piinakwaa i'imaa Ceoohshahpaat (Jehoshaphat) pahsatinaank. Miihsh i'imaa ke⁠ishi tipaahkonakwaa aaniin kaakiih tootawaawaatc tepinawewisiimimak nimpimaatisiima' Isriyala'. Okii ohsweyaamohkiinaawaa' iitok nimpimaatisiima' eshi ayayaanitc pahkaanwewaan pemaatisinitc, ekii nenaawinamowaatc Isriyalahki nintahkiimini.

³ Miihsh kaakii ahpakicikewaatc ke⁠onci kihkentamowaatc aaniin ke⁠tootawaawaatc nimpimaatisiima'. Okii ataawaakenaawaa' kwiiwisenhsa', ihkwesenhsa' kaye ci⁠mihtanohkii'imintc meshkwac ci⁠miinintwaa pihshikwaacihkwewa', shoominaapooni kaye.”

⁴ “Aaniin itahsh inaa kekwe tootawiyek Tayar (Tyre) ootenaank eyaayek, Saaitan (Sidon) ootenaank kaye, Pilistiya (Philistia) ahkiink kaye eyaayek? Kekoon ina kikakwe kiiwe tipa'amawim? Kiishpin itahsh i'i eshihcikewekwen, aahpici hsa ninka kitaahtapii niin ci⁠kiiwe tipa'amawinakook!

⁵ Kikii maaciinaawaa iitok niwaapaapihko shooniyaam, nintoosaawi shooniyaam kaye, kikii maaciitoom kaa⁠tipinawewisiyaan wenooci kekoonan ekii ishiwitooyek kitanami'ewikamikowaank.

⁶ Kikii ataawaakem kaye pemaatisiwaatc Coota ahkiink wenciiwaatc, Ceroosalam kaye wenciiwaatc Kariihkak (Greeks) ekii ataaminekwaa. Miihsh kaakii onci ishihcikeyek pehsho ci⁠ayaahsikwaa otahkiimiwaank.

⁷ Miihsh waa⁠ishihcikeyaan ewii onci piinakwaa aaniinti kaakii ishi ataawaakeyekipan, ewiih kiiwe tipa'amawinakook aaniin kaakiih tootawekwaapan.

⁸ Ninka ishi ataawaakenak itahsh kikosihsiwaak, kitaanihsiwaak kaye eshi'ayaanitc pemaatisinitc Coota ahkiink wenciinitc. Miitahsh Coota wenciinitc kenishi aanihke ataawaakaanikowaatc eshi'ayaanitc Sepiiyan (Sabeans) enimintc waahsa ahkiink eyaanitc. Niin kaaTipencikeyaan ohsha o'o kaa⁠ihkitoyaan.”

⁹ “Mii hsa 'owe papaa wiintamaakek mekweya'ii eshi'ayaawaatc kaa⁠pepahkaanwewaanakisiwaatc pemaatisiwaatc: ‘Oshiihtaak ciwii miikaasoyek! Amaci'ihkok kaa⁠soonkentaakosiwaatc ininiwak. Taka kahkina miikaasowininiwak ta⁠piishaawak ci⁠ehpemiiwaatc ci⁠mawine'ikewaatc.

¹⁰ Pashipa'ikewihkomaanink hsa inaapihkakanaantamok kipiikwahkamikipicikaniwaan, ciipowepinikanink kaye inaapihkakanaantamok kikihtikaani mooshwaakaniwaan. Taka mecentaakosiwaatc ta⁠ihkitowak eh⁠soonkentaakosiwaatc.

¹¹ Weyiip piishaak, kahkina kiinawaa waahkaaya'ii eyaayek kaa⁠pepahkaanwewaanakisiyek, ohko piishaak kaashi pahsatinaak.’ ” Kiin Tepencikeyan, taka ishinisha'o kishimaakanihshiimak kaa⁠soonkentaakosiwaatc.

¹² “Miihsh eshinaakwaninik kaa⁠tahswewaanakisiwaatc pemaatisiwaatc ta⁠kwayaanciiwak ci⁠piishaawaatc Ceoohshahpaat (Jehoshaphat) pahsatinaank keshi tipaahkonitiwintc, miihsh weti keshi namatapiyaan ci⁠tipaahkonakwaa kahkina entahswewaanakisiwaatc pemaatisiwaatc misiwe waahkaaya'ii eyaawaatc.

¹³ Etatawe paahtiinatininiwan omaci'ishiwepisiwiniwaan, kawisho taapishkoo pahkweshikaniminan kaa⁠kishkishikaatekin, shikoshkaw taapishkoo shoominak kaashi shikoshkawintwaa. Eh⁠mooshkinewaatc kaashi maamaakoshkawintwaa e⁠aamipiiwaatc ahtoopaanink, etatawe ohsha paahtiinatininiwan omaci'ishiwepisiwiniwaan.”

¹⁴ Etatawe ohsha ta⁠kihci paahtiinowak pemaatisiwaatc e⁠ayaawaatc pahsatinaank onentamowinink ecikaatenik. Mii hsa weti kaaTipenciketc okiishikanom aasha kekaa kaawii ishi kiishikaninik.

¹⁵ Kiisihs, tipihkikiisihs kaye tani kashkiitipihkisiwak, wanankohshak kaye kaawiin ta⁠saakaasikehsiiwak i'i ahpii.

Kishemanitoo Cishawenimaatc Opimaatisiima'

¹⁶ KaaTipenciketc ihsa Saayanink tashi kohtaanihtaakosi, Ceroosalamink eh⁠tashi pinehsiiwihtaakositc, miihsh ahki, kiishik kaye eshi nininkihsenik. Wiin itahsh iko oka aakawishkawaa' opimaatisiima' ci⁠naatamawaatc.

¹⁷ “Miitahsh ci⁠kihkentamek niin Tepencikeyaan eh⁠Kishemanitoowiyaan, e⁠ishitaayaan Saayanink, niwaciimink kaashi tipinawewisiyaan eh⁠tanentaakosiyaan. Ceroosalam ootena hsa ta⁠kihtencikaate niin eh⁠tipinawewisiyaan; kaawiin miinawaa wiihkaa meyakisiwaatc oka shaakoocihtoohsiinaawaa.

¹⁸ Miitahsh i'i ahpii kihci waciihkaank oshki shoominaapo ci⁠onciciwank, coocoohshaapo kaye eshi papiihkwatinaak ci⁠ayonciciwank. Misiwe hsa kaashi papahsatinaak tashi papimiciwan nipi Coota ahkiink. I'i hsa nipi ke⁠pimiciwank ta⁠onciciwan kaaTipenciketc otanami'ewikamikonk ci⁠mooshkinepiik pahsatinaa Akesha ecikaatek.”

¹⁹ “I'i tahsh wiin Iicipahki pikwatahkamikonk tani inentaakwan, Iitam ahki kaye tani manshashkwaa, onsaam aaniihsh kaawiin okii manaaci'aahsiwaawaa' Coota ahkiink wenciinitc, ekii nihsaawaatc kekoon enentaakosihsinik.

^20-21 Niin hsa ninka na'ahcikehtamawaak kaakii nihsintwaa; kaawiin ninka manaaci'aahsiik iki kekoon kaashi anaamentaakosiwaatc. I'i tahsh wiin Coota ahki, i'i kaye Ceroosalam kihci ootena nehpic iko tani taanotewan, Niin kaaTipencikeyaan itahsh ninka ishitaa waciink Saayanink.”