Coowel 1 - Ojibwe Kihcimasina'ikan

¹ Mii hsa o'oweni Coowel (Joel) kaakii otetetc Piihtoowel (Pethuel) eshinihkaasonitc kaa'ikotc kaaTipencikenitc ci‑ishi wiintamaaketc.

Pemaatisiwaatc Kiimawintamowaatc Kiinihshiwanaataninikin Okihtikaaniwaan

² Pisintamok o'o kiinawaa kaa⁠kihtaatisiyek; kahkina Coota (Judah) ahkiink eyaayek. Wiihkaa na o'owe kiih⁠pimi ishiwepan otaanaank kaa⁠pimaatisiyek, kiih⁠pimaatisiwaahpan kaye kikehteya'aamiwaapaniik?

³ Wiintamawihkwak kiniicaanihsiwaak cini wiintamawaawaatc oniicaanihsiwaa', ci⁠ani aanihke wiintamawaanitc itahsh oniicaanihsini.

⁴ Wiinke hsa ta⁠paahtiinwewaanakisiwak pahpahkinek ke⁠takohshinowaatc kikihtikewiniwaank. Peshikwewaan hsa ke⁠ishkwantamowaatc kikihtikaaniwaan, miiwan hsa ini kotak ke⁠kitaawaatc.

⁵ Koshkosik, mawik kiinawaa kaa⁠kiiwashkwepiishkiyek; mawik kahkina kaa⁠nihtaa minihkweyek shoominaapo. Mii 'i iitok e⁠mahkamikooyek ci⁠minihkwehsiwek.

⁶ Pahpahkinek hsa eh⁠paahtiinowaatc eh⁠soonkentaakosiwaatc pi⁠takohshinook kitahkiiminaanink; aahpici eh⁠paahtiinowaatc. Kaawiin ta⁠kashki'aahsiiwak ci⁠akimintwaapan. Mihshipishiink hsa ahpiihci kaahshaapitewak.

⁷ Wiinke hsa onihshiwanaacihtoonaawaan kaashi nihtaawikinitc shoomina'. Pik (fig) tinowaahtikoo' kaye wiinke onihshiwanaaci'aawaa'. Wanakehkwa' kaye wiinke onihshiwanaaci'aawaa', miihsh enishi waapishkaanikin watihkwanan enaahpinatoowaatc.

⁸ Pemaatisiyek, mawik ci‑ishihcikeyek taapishkoo pehki oshkiniikihkwe kaashi mawitc eh⁠kikishkank ahsapatapiiwekin. Mii iitok eshihciketc kii⁠mawimaatc kii⁠wani'aatc kaawii onaapemihpan.

⁹ Kaawiin ohsha awahshime pahkweshikan kaa⁠pakitinintc, shoominaapo kaye kaa⁠pakitinikaatek kihci anami'ewikamikonk ayaahsinoonan. Miihsh kaa⁠onci mawiwaatc anami'ewikimaak, iki kaye kaa⁠pamiihtawaawaatc kaaTipencikenitc.

¹⁰ Kihtikewahkamikoon hsa wiinke mashashkwaawan, mihtahkamik kaye wiinke paahte. Pahkweshikan wiinke e⁠nihshiwanaatisitc, oshki shoominaapo kaye noontehse. Kaawiin kaye pimite onciimakahsinoon.

¹¹ Pakitentamok kiinawaa kaa⁠kihtikeyek. Kihci mawik kiinawaa kaa⁠nihtaawiki'ekwaa shoominak. Ci⁠mawimek pahkweshikaniminan, manoominan kaye aaniihsh noonte nihshiwanaacihcikaatewan ci⁠maamooshakinikaatehsinokin ahpii manishikenaaniwank.

¹² Shoominaahtikook hsa wiinke paahsowak, pik (fig) tinowaahtikook kaye. Kahkina hsa ko mihtikook paahsowak kaashi nihtaawikinkin shiiwimiiciman. Pemaatisiwaatc hsa ko kaa⁠minwentamo'ikowaatc kaawiin ta⁠kihkentaakwahsinini.

¹³ Kiinawaa enami'ewikimaawiyek, kaa⁠pamiihtawek kaye kaaTipenciketc kaashi pakitinaahsonk, pihsihkamok ahsapatapiiwekin ci⁠mamawiyek. Ampeyohk, kapetipihk i'i ishihkonayek, kiinawaa kaa⁠pamiihtawek enaahsamiitc kaaTipenciketc. Ci⁠ontatemoyek pahkweshikan, shoominaapo kaye kaa⁠nihtaa pakitinikaatekipanen ekiih kiishkinamaakooyek i'imaa kiKishemanitoomiwaa okihci anami'ewikamikonk.

¹⁴ Anoohkiik ci‑ishihcikaaniwank kehtentaakwahk ci⁠wiihsininaaniwansinok ci⁠anami'aank; antom ci⁠maawaci'itiwaatc pemaatisiwaatc. Antom kahkina kaa⁠niikaanisiwaatc, kahkina i'imaa ahkiink kaa⁠ishitaawaatc ci⁠piishaawaatc otanami'ewikamikoniink kaaTipencikenitc kiKishemanitoomiwaan. Miihsh i'i ci⁠shaakowaanaawaatc!

¹⁵ Etatawe ohsha wii⁠kihci ishi kiishikan! KaaTipenciketc okiishikanom ohsha aasha kekaa ocihcihseni. Mii hsa 'i ahpii kaaMaawaci mashkawisiitc kaawii kihci nihshiwanaacihciketc.

¹⁶ Kikiih kanawaapimin hsa e⁠nihshiwanaacihcikaatekin kaakiih kihtikaatamank. Kaawiin hsa aapiinciko minwentamowin ayaahsinoon kihci anami'ewikamikonk.

¹⁷ Kihtikaanenhsan hsa shiiko paahtewan paahtehkamikohkaank. Kaawiin hsa kekoon miicim ayaahsinoon ke⁠na'inikaatekipan. Miicimiwi ahtaahsowikamikoon hsa wiinke piikoshkaawan.

¹⁸ Inashke enwewi'itiwaatc pishihkiwak, misiwe eh⁠papaamohsewaatc aaniihsh kaawiin ninkoci ishi mashkohsiihkaahsinini. Maanahcaanihshak kaye kakwaatakihtoowak.

¹⁹ Kiin Tepencikeyan, kiin ohsha kaa⁠shaakowaaninaan! Kaashi mamashkohsiihkaak ohsha wiinke caakaahkite. Mihtikook hsa kaye wiinke caakaahkisowak.

²⁰ Aya'aawihshak ohsha kaye kinanaantomikook; onsaam aaniihsh iskahtewan siipiinhsan. Wiinke kaye kiih⁠caakaahkite kaashi maashkosiihkaakipan mihshawahkamik.