Coop 42 - Ojibwe Kihcimasina'ikan

Coop Kii'aantentank

¹ Coop (Job) tahsh okii ishi nahkwehtawaan kaaTipencikenitc,

² “Tepencikeyan, ninkihkentaan ohsha kahkina kekoon e⁠kashkihtooyan ci‑ishihcikeyan. I'i kaye kaawii ishihcikeyan kaawiin awiya otaa kashkihtoohsiin ci⁠kipihtinihkipan.

³ Kitishi kakwecimihsh itahsh wekonen wenci kashkite'eyaan ci⁠anta aanwehtamaan i'i kiin kaashi kakiihtaawentaman, niin itahsh wiin e⁠ayeshaawaatisihsiwaan. Ninkiih tashintaanan hsa ini kekoonan kaa⁠nihsitohtansiwaan, kekoonan kaa⁠maamahkaatentaakwahkin niin kaa⁠kihkentansiwaan.

⁴ Kikiih kanoosh iitok ci⁠pisintawinaan mekwaa kiin eh⁠kiikitoyan, ci⁠nahkwehtawinaan tahsh kaye kikii ishi kanoonihsh.

⁵ Otaanaank hsa wiin, kotak ehta kaakii wiintamawiwaatc kekoonini kaakii onci kihkeniminaan, noonkom tahsh wiin nishkiishikonk iko kitoonci waapamin.

⁶ Etatawe tahsh nimenihshentam i'i kaye kaakii ihkitoyaan. Miitahsh i'i kaa⁠onci namatapiyaan kaashi paashkinehsek, i'imaa kaye ahkahkashenk ekii aantentamaan.”

Ehtashintenik Aaniin Coop Kaakii'ishikiiweminohse'ikotc KaaTipencikenitc

⁷ KaaTipenciketc tahsh kaa⁠ishkwaa'inaatc o'o Coopan, miihsh kaa⁠ishi kanoonaatc ini Elipaasan (Eliphaz) ekii'inaatc, “Etatawe kinishki'ihsh, iki kaye niishin kaa⁠wiiciiwihkwaa, aaniihsh kaawiin kwayahk kitinaacimihsiim taapishkoo wiin Coop nintanohkii'aakan kwayahk kaashi inaacimitc.

⁸ Noonkom tahsh maaciinihkwak niishwaahso (7) aape pishihkiinhsak, niishwaahso (7) kaye aape maanahcaanihshak, ci‑ishiwitawek nintanohkii'aakan Coop, miitahsh iki ke⁠aapaci'ekwaa ci⁠pakitinaahsoohtamaasoyek. Coop nintanohkii'aakan tahsh kika anami'ehtamaakowaa. Wiin iitok ehta ninka noontamowaan keshi anami'ehtawitc, kaawiin tahsh kika tootawihsinooninim kaashi kashkihtamaasoyek i'i onci kaakii ishi kakiipaacihcikeyek. Kaawiin hsa kwayahk tepwe kikii inaacimihsiim taapishkoo wiin wa'a nintanohkii'aakan Coop kaakii inaacimitc.”

⁹ Miitahsh Elipaas, Piltaat (Bildad) a'a kaye Soohpar (Zophar) eshinihkaasowaatc kaa⁠ishihcikewaatc kaakii'ikowaatc kaaTipencikenitc. KaaTipenciketc tahsh okii noontawaan Coopan kaakii ishi anami'ehtaakotc.

¹⁰ Coop tahsh kaa⁠ishkwaa anami'ehtamawaatc osaaki wiiciiwaakana', miihsh kaaTipencikenitc kaa⁠ishi kiiwe minohse'ikotc. Niishink hsa minihk kii⁠ahpiihci wenootisi ahpiihc wiin otaanaank kaakii ahpiihci wenootisihpan.

¹¹ Kahkina tahsh wiicihkiweya', otawemaa' kaye, kahkina kaye otaanaank kaakiih kihkenimikotc okiih pi'anta waapamikoo' ekii wiici wiihsiniimikotc otaawinink. Miitahsh kaah⁠tootaakotc ekiih kakwe wiici'ikotc, ekiih kakwe minwentamo'ikotc kaye i'i kahkina kaakii ishi wahsitaawihse'ikotc kaaTipencikenitc. Entahshinitc kaye okii miiniko' shooniyaan, osaawi shooniyaa waapihkowi naapininciipisona' kaye.

¹² Miitahsh i'i ahkonaak kaaTipencikenitc kaakii minohse'ikotc, ahpiihc wiin otaanaank kaakii ahpiihci minohsehpan. Coop hsa okiih tipenimaa' mitaahshiniiwink mitaahswaahk (14,000) maanahcaanihsha', ninkotwaahcink mitaahswaahk (6,000) pihkwaawikane mihtatimoo'. Niishink mitaahswaahk (2,000) pishihkiwa', mitaahswaahk (1,000) kaye noonshe maanshimihtatimoo'.

¹³ Kii⁠niishwaahciwa' itahsh okosihsa', otaanihsa' kaye kii⁠nihsiwa'.

¹⁴ Nihtam tahsh kaakii nihtaawikinitc otaanihsan Ciimaaima (Jemimah) okii ishinihkaanaan, i'imaahsh iko kaakii ani onciinitc Kesaaya (Keziah) okii ishinihkaanaan. Ini tahsh iko ishkwaac kaakii ani onciinitc Keran Hapak (Keren Happuch) okii ishinihkaanaan.

¹⁵ I'imaa hsa misiwe ahkiink, otaanihsa' hsa maawac kii⁠onishihshiwa' aahpiihc wiin kotak i'i ihkwewa'. Coop kaye okii miinaa' otaanihsa' peshikwan minihk ci⁠tipinawewisinitc otaya'iiman taapishkoo minihk kaakii ishi miinaatc okosihsa'.

¹⁶ Keyaapi tahsh o'o ishi ahpii ninkotwaahk niimitana (140) tahsopipoon kii⁠ani pimaatisi. Okii⁠waapamaa' hsa okosihsa', ooshihsa', otaanihkoopisa' kaye.

¹⁷ Wiinke hsa kii⁠kihci ahkiwensiiwi kii‑ishkwaa pimaatisitc. Kiih⁠te'ishihcike minihk kaakii ishi miinikoowisitc entahso kiishik cikii ishihcikehpan.