Coop 41 - Ojibwe Kihcimasina'ikan

¹ “Kitaa kaahcitinaa na kihci ohkaatiikinepik ci⁠aapacihtaawatipan kwaashkwepicikanenhs, ci⁠tahkopitaawatipan kaye otenaniw shinootaakan ci⁠aapacihtaawatipan?

² Kitaa kashkihtaawaan ina ci⁠pakonehta'amowatipan oshkiish ke⁠tanahpinatipan shinootaakan, ci⁠pashi'amawatipan kaye otaamihkan kwaashkwepicikan ci⁠aapacihtaawatipan?

³ Kaawiin ina ta⁠pakiciihsii ci‑inihk ci⁠koohpaatenimatc? Weweni na ci⁠noohki kakanoonihk?

⁴ Kitaa'ik ina wiihkaa peshikwan ci‑inentamek, ci‑ishi otaahpinatipan nehpic ci⁠anohkiihtawihk?

⁵ Kitaa tootawaa na taapishkoo kaashi awahkaasotc pinehshiinsh? Kitaa sakaapiikinimaan ina ci⁠miinatwaapan itahsh kitaanihsak?

⁶ Otataawek ina otaa meshkotoonaawaan? Ta⁠nenaawa'oonitiwak ina ohkaatiikinepikoon ataawewaatc.

⁷ Kitaa mooshkine wepinamowaanan ina kaa⁠pahpahkeyaapihkahkin ciipowepinikanan owiiyawink, komaa kaye ohtikwaanink kinooshewi ciipowepinikanan.

⁸ Kiishpin saaminatc, kaawiin miinawaa wiihkaa kika kocihtoohsiin, kaawiin aaniihsh kika waniihkehsii kaakii ishi miikaatiyekipan.”

⁹ “Anihshaa hsa awiya inentam kii‑inentank ci⁠shaakooci'aahpan; kii⁠mihci waapamintc hsa mii 'i eshi kawaanimisink.

¹⁰ Ahpii hsa kii⁠nishki'intc, wiinke hsa kakwaanihsakentaakosi; awenen itahsh inaa ke⁠kashkihtoohpan ci⁠niipawihpan niin eshi'ayaayaan?

¹¹ Awenehsh kekoon kaa⁠miishitc kekiih kiiwe tipa'amawakipan. Kahkina ohsha kekoon o'omaa ahkiink kaa‑ayaamakahk niin nintipentaan.”

¹² “Inashke niwiih tashintamowaanan ohkaatan, ewii wiintamawinakook kaye aaniin ehpiihci mashkawisiitc, ehpiihci minonaakositc kaye.

¹³ Awenen itahsh inaa ke⁠pihshakihkonayepinikohpan, ke⁠shawihta'aminihpan omiikaasoowayaan.

¹⁴ Awenen ihsa inaa ke⁠kashkihtoonihpan ci⁠paahkitaamihkanepinikohpan? Wiipitan waahkaahkiteniwan, kaye kohtaasinaakwaniniwan.

¹⁵ Inashke opihkwanink owanakaya', mii hsa 'i enentaakosinitc taapishkoo nakaa'ikanan kaa⁠niipitehsinkin; wiinke e⁠ayahshicihshininitc.

¹⁶ Ehpiihci sakakohshininitc hsa, kaawiin iitok kanake i'imaa ta⁠ishinoowehsinoon nahsawaya'ii.

¹⁷ Ehpiihci ayaayiicihshininitc hsa opihkwanink, kaawiin kanake ta⁠kashkihcikaniwihsiiwa' ci⁠pahkwacipinimintc.

¹⁸ Kii⁠aayinimohsetc hsa mii 'i eshi waawaahsahkonehsenik; oshkiinshikoon kaye e⁠ishinaakwaninikin taapishkoo kiisihs kaapi⁠moohka'ank.

¹⁹ Otoonink kaye onci saakitahkonehseni; mii kaye'imaa wenci saahsaakicipahkinenik.

²⁰ Oshkishiink hsa onci saakitaapahteni, taapishkoo ahkihk kaa⁠onsotc kaashi piskanekin mashkohsiwan.

²¹ Kii⁠pakitanaamotc hsa mii 'imaa wenci maaciikishaanshenik, otoonink hsa onci saakitahkoneni.

²² Ohkwekanink hsa tanentaakwanini mashkawisiiwin, nekishkaakotc hsa kahkina pinaanimisiwa'.

²³ Eshi ayaahkwiitawishaketc hsa wiinke ayiici ayaani, aahpici e⁠mashkawashaketc, kaawiin wahkawihsehsinini.

²⁴ Ote' hsa kaye ahsiniink ahpiihci mashkawaani, kaa‑ahpiihci mashkawisiinitc pikishkipoocikanahsiniin anaamink kaa‑aapatisinitc.

²⁵ Ahpii hsa kii⁠pasikwiitc, meshkawentaakosinitc hsa sekisiwa', ehpiihci sekisinitc kaawiin kekoon okashkihtoohsiini ci‑ishihcikenitc.

²⁶ Kaawiin hsa ayaahsinini pashipa'ikewihkomaan ke⁠maahki'ikohpan, ciipowepinikan, pihkwahkoonhs, ciipowepinikanenhs kaye kanake ke⁠shawishkaakohpan.

²⁷ Mashkohsiink hsa otinentaan piiwaapihkoni, noohkiciihsakonk kaye otinentaan osaawaapihk.

²⁸ Kaawiin hsa omaaciipa'iwaatansiinan pihkwahkoon, ahsinii' kaye kaa⁠coowepaneshkwaanimitc mii 'i enenimaatc taapishkoo paahte mashkohsiin.

²⁹ Mashkohsiink hsa otinentaanan pakamaakan; omihci paahpihtoon hsa kii⁠ahpakitamawintc ciipowepinikanan.

³⁰ Omihsat hsa mii 'i eshinaakwaninik taapishkoo kaa⁠niihsiikaapihkisitc waapikanahkihk; e'eshihsininik kaahpii'ishaatc taapishkoo piikwahkamikipicikan kaashi eshihsek.

³¹ Kii⁠mikoshkaataakamiwepishkank hsa kihcikam mii hsa 'i enentaakwaninik taapishkoo nipi kaa⁠ontek; shikwaahsh kaye ayapooshkipii wepishkike taapishkoo kaa⁠kihpakaak pimite kaa⁠ontek.

³² Wiinke hsa waahseyaakaminini kaahpii'ishaatc, kihcikam e⁠piihtewaakamishkank.

³³ Kaawiin hsa o'omaa ahkiink ayaahsinini ci‑inentaakwaninik kaatinowitc, kekoon e⁠kohtansik.

³⁴ Kaawiin opapaapisiskaapamaahsiin kaa⁠kihci inenintisonitc; wiin e⁠kihciokimaawitc kaa⁠tashinitc pikwaci aya'aawihsha',” okii'ikoon Coop Kishemanitoon.