Coop 40 - Ojibwe Kihcimasina'ikan

¹ KaaTipenciketc tahsh okii'inaan Coopan (Job),

² “Awiya na otaa ayaan kekoonini keshi anaamimaahpan Kaa⁠Maawaci mashkawisiinitc Kishemanitoon ci⁠kwayahkomaahpan? Taka hsa kaa‑anaamimaatc Kishemanitoon, wiin iko oka nahkwehtawaan.”

³ Coop itahsh okii ishi nahkwehtawaan kaaTipencikenitc,

⁴ “Inashke hsa niin kaawiin kekoon nintahpiihtentaakosihsii, aaniin itahsh niin keshi nahkwehtawinaampaan? Mii ohsha 'i kaa⁠onci kiponamaan nintoon kekoon ci‑ihkitohsiwaan.

⁵ Aasha ohsha aapitink nintaanakiih kiikit, kaawiin hsa ninkii nahkwehtansii. Mihsawaa ko niishink aana kiikitoyan, kaawiin kekoon awahshime ninta ihkitohsii,” okii'inaan.

⁶ Miitahsh kihci nootinink Coop okii onci kanoonikoon kaaTipencikenitc,

⁷ “Taka ininiiwentaakosin ci⁠niipawiyan, kiwiih kakwecimin ohsha kekoon, kika nahkwehtawihsh itahsh.

⁸ Kiwiih kakwe aanishihtoon ina weweni awiya kaa⁠inaahkonak? Mii na 'i noociko wenci'ishiyan weweni eh⁠tootaakehsiwaan, kiin tahsh ewii onci minwakimikooyan?

⁹ Kaa‑ahpiihci mashkawisiitc ina Kishemanitoo kitahpiihcii? Pinehsiink ina kitinwe kii⁠kiikitoyan taapishkoo Kishemanitoo kaa'inwetc?

¹⁰ Taka hsa ishihkonaye'itison ci⁠kikishkaman kihci inentaakosiwin, ci⁠minonaakosiyan kaye. Ishi'itison tahsh kaye ci⁠kihtentaakosiyan, ci⁠kihciokimaawentaakosiyan kaye.

¹¹ Taka hsa tahsh kanawaapam iki kaa⁠kihci inenintisowaatc, nishkaatisiihkantaw ci⁠tapahsenimo'atwaa.

¹² Kanawaapam kahkina kaa⁠kihci inenintisowaatc, ishi' itahsh ci⁠tapahsenintisowaatc; ci⁠shikoshkawatwaapan omacaatisiik aanti kaashi niipawiwaatc.

¹³ Ci‑ishi ninkwa'watwaapan kahkina i'imaa anaamahkamik, ci‑ishi akwahpinatwaapan kaye kaa⁠tanahkiinitc kaa⁠niponitc.

¹⁴ Mii hsa tahsh iinsan o'o ke'ininaan, kiin iinsan iko kitaa kashkihtoon ci⁠pimaaci'itisoyampan,” okii'ikoon.

¹⁵ “Inashke kanawaapam a'a kaa⁠kohtaasinaakositc aya'aawihsh pihiimaht (behemoth) kaa⁠ishinihkaacikaniwitc, mii iitok a'a kaakiih tako oshi'ak kii⁠oshi'inaan. Mashkohsiin hsa omiicinan taapishkoo pishihki.

¹⁶ Etatawe hsa mashkawisii owiiyawink, omihsataank ihsa kaye inahke ishi mashkawisii.

¹⁷ Taapishkoo hsa kiishkaahtik kaashi wewepaahshitc, mii hsa 'i osow eshinaakwaninik, ociihtateyaapiin hsa opwaamink wiinke sakohsininiwan.

¹⁸ Ohkanan hsa inentaakwaniniwan taapishkoo kaa⁠wiimpaapihkahk osaawaapihk, opahkesiwinan kaye piiwaapihkonk inentaakwaniniwan.”

¹⁹ “Mii hsa awe maawac meyaamahkaatentaakositc kahkina kaa⁠tahshiwaatc aya'aawihshak! Kaakii oshi'ikotc hsa ehta otaa shaakooci'ikoon.

²⁰ Kaa⁠miicitc hsa waciink tashi nihtaawikinini, miihsh i'imaa aya'aawihshak entashi otaminowaatc.

²¹ Eshi sakihkopaanik hsa ishi pimihshin, eshi ayasanii ayaanik eshi mashkiikonaakwaninik e⁠ishi kaasotc.

²² Eshi ayakawaahtehkopaanik hsa ishi kaaso; wiikopiiwaahtikoo' ayaawa' waahkaa'aya'ii kaashi ayaatc kaashi pahsisiipiinhsiwaninik.

²³ Kaawiin okohtansiin kiih⁠kishiiciwaninik siipi, kaawiin kanake ci⁠mikoshkaaci'ayaatc Cwaartan siipi kii‑ishiciwaninik otoonink.

²⁴ Awiyan ina otaa kaahcitinikoon ahpii ahshawaapitc? Awiyan ina oshkishiink inahke otaashi pakonehta'okoon ke⁠tanahpinikotc?”