Coop 4 - Ojibwe Kihcimasina'ikan

Nihtam Kiikakanoonitiwaatc

¹ Miitahsh o'o Elipaas (Eliphaz) Tiiman (Teman) ahkiink wenciitc kaa⁠ihkitotc,

² “Kiishpin hsa awiya wiih⁠kanoonihk, kitaa shashiipenimaa na? Awenen hsa naa ke⁠kashkihtoohpan ci⁠kiikitohsikipan?

³ Niipiwa' hsa awiyak kipi kihkino'amawaak, ekiih pi mashkawisii'atwaa mecentaakosiwaatc!

⁴ Ehkitowatc hsa kaye kitoonci sookentamo'aak, kitoonci wiici'aak kaye iki kaakii niinamikaapawiwaatc.

⁵ Kiin itahsh noonkom maanshihsewin e⁠otihsikoyan, wiinke hsa kipakitentam e⁠mooshihtooyan, mii 'i wiinke eshi pakitentaman.

⁶ Kishemanitoo iitok kitanami'ehtawaa, kipimaatisiwin kekoon e⁠ishi anaamentaakwahsinokipan; kitaa onci ayaan tepweyenintisowin, pakohsenimowin kaye?

⁷ Taka hsa kakwe maamihkawin, ci⁠wiintamampan awiya mahshi memaashiihsik ci⁠nihshiwanaatisitc? Wiihkaa na awiya okwayahkwaatisi nihshiwanaatisi?

⁸ Eshi waapankeyaan hsa, iki hsa pemaatisiwaatc enentaakwaninik taapishkoo eh⁠pikishkahkamikipitoowaatc macikekoon, kehtikaatamowaatc itahsh maanshihsewin, mii hsa 'i nahke keshi manishikewaatc.

⁹ Kishemanitoon hsa onishkaatisiwin nootinonk inentaakwanini, miihsh i'imaa eshi nihshiwanaaci'aatc.

¹⁰ Mihshipishiwak hsa ta⁠noontaakosiwak, ta⁠nenkimowak kaye, shaakooc itahsh wiipitiwaan ta⁠poohpoohkohseniwan.

¹¹ Miitahsh mihshipishiw eshi nipotc kekoon kii⁠nihtoohsik, miihsh noonshe mihshipishiw oniicaanihsa' eshi piiwehsenitc.”

¹² “Kekoon hsa ninkiih pi kiimooci wiintamaakoo, akaawaa ninkii noontaan kaa‑ahpiihci akaawaa noontaakwahk.

¹³ Taapishkoo hsa kaa⁠kiiwashkwenkwahshink eh⁠tipihkahk, ahpii kii⁠nipaaniwank,

¹⁴ mii hsa kaakiih sekisiyaan, ekii nininkaanimisiyaan, miihsh kahkina nihkanan kaakii wahkawihsekin.

¹⁵ Miitahsh nihshihkaac kaa⁠piminoowek kaakiih saamiinkweshkaakoyaan, miihsh nimiihshaahkonawaanan kaakiih patahkitekin.

¹⁶ Miihsh kaa⁠ishi kipihcishkaak, kaawiin hsa ninkii kihkentansiin wekotokwen iitok i'i. Miitahsh kaakii ahshaawaasinaakwahk eh⁠kanawaapantamaan, miihsh kaakii noontawak awiya nihshik eh⁠kiikitotc,

¹⁷ ‘Nawac na awiya ta⁠kwayahko pimaatisi ahpiihc wiin Kishemanitoon? Nawac ina inini ta⁠pehkentaakosi ahpiihc wiin ini kaakii oshi'ikotc?

¹⁸ Inashke kaawiin Kishemanitoo otepweyenimaahsii' otanohkii'aakana' kihcikiishikonk eyaanitc, otencalima' kaye e⁠ahshitakintamawaatc eshi mamaashiinitc,

¹⁹ aaniin itahsh inaa tekwac keshi tepweyenimaahpan ashashkiink enentaakosinitc, paashkinehkamikonk kaakii onci oshi'imintc? Nawac ci⁠wentisitc ci⁠shikonikaniwitc taapishkoo memenkwanhs.

²⁰ Maakishaa inini ta⁠pimaatisi kishepaawakaninik, kaawiin itahsh ta⁠kihkentaakwahsinini iinsan nipotc cipwaa onaakohshininik, miihsh keshi nehpici nipotc.

²¹ Mii hsa enentaakositc taapishkoo pakwaanekamik kaa‑aapa'ikaatek wenci mincimahpitek, miihsh eshi⁠nipotc, e⁠ayaahsik kakiihtaawentamowin iinsan.’ ”