Coop 39 - Ojibwe Kihcimasina'ikan

¹ “Kikihkentaan ina ahpii waciiwi maanatihkwak nehtaawikinaawahsowaatc? Wiihkaa na kiwaapamaa pikwaci waawaashkeshi e⁠nihtaawikinaawahsotc?

² Kikihkentamowaan ina minihk kekishkawaawahsowaatc? Kihkentamowaan ina ahpii nehtaawikinaawahsowaatc?

³ Ociciinkwanihtaawak hsa, miihsh eshi nihtaawiki'aawaatc otaya'aanhsimiwaa'; miihsh eshi pooni wiihsakentamowaatc.

⁴ Otaya'aanhsimiwaa' hsa tashi mashkawikiwa' weti mihshawahkamik; kaawiin pikiiwehsiiwa' kii⁠maacaanitc!”

⁵ “Awenen hsa kaa⁠pakitinaatc pikwaci maanshimihtatimoo' pisaan ci⁠papaami ayaanitc? Awenen hsa kaa‑aapa'waatc pisaan itahsh ci⁠papaamipa'itinitc?

⁶ Niin hsa kaa⁠pakitinakwaa pikwatahkamikonk ci⁠tashiihkewaatc, kaa⁠pakitinakwaa kaye ci‑ishitaawaatc eshi'ayaanik shiiwihtaakanahki.

⁷ Oshiinkentaanaawaa hsa eshi nipaatwewitamowintc kihci ootenaahkaank, kaawiin ta⁠kashki'aahsiiwak ci⁠waankawi'intwaapan, ci⁠anohkii'intwaapan kaye.

⁸ Eshi ayayaanikin hsa waciin ishi tashiihke e⁠ontanciketc eshi mashkohsiihkaanik, eh⁠papaa nanaantone'ank kekoon mashkohsi osaawashkwaanik ke⁠miicitc.”

⁹ “Ta⁠inentam ina pikwaci pishihki ci⁠anohkiihtawihkipan? Ta‑ayaa na kipishihkiiwikamikonk tipihkaninik?

¹⁰ Kitaa kashki'aa na ci⁠mincimahpinatipan shinootaakan aapacihtaawatc, ci⁠pikishkahkamikipicikehpan kaye ci⁠piisahkamikipicikehpan pashkwaahkamikaank.

¹¹ Kitaa ahpenimonotamowaan ina a'a pishihki okihci mashkawisiiwin, wiin ci⁠miinatipan kahkina kimashkawanohkiiwinan?

¹² Kitaa ahpenimonotawaa na ci⁠piitoohpan kipahkweshikaniminan, ci⁠ohko piitoohpan kaye ke⁠tashi pawikanaancikewintc?”

¹³ “Inashke ehpiihci kitaahtapi ninkwiikanepani'otc a'a kinwaahkokwayawewi kishiipahtoo kihci pinehshiinsh, kaawiin itahsh a'a tino ishi pimihsehsii taapishkoo moohshka'ohsi.

¹⁴ Mihtahkamik hsa iko pisaan tashi pakicii waawane mihtaawankaank e⁠onci kiishoohsininikin,

¹⁵ e⁠kihkentansik maakishaa awiyan ci⁠tahkohkaataminitc, komaa kaye pikwaci'aya'aawihshan ci⁠shikoshkaminitc.

¹⁶ Kaawiin hsa omanaaci'aahsii' oniicaanihsa' eh⁠tootawaatc taapishkoo wiin eh⁠tipinawewisihsik; kekoon e⁠inentansik anihshaa iinsan i'i kaakii anohkiitc.

¹⁷ Kaawiin iitok okii ishi'ikohsiin Kishemanitoon ci⁠kakiihtaawentank, kaawiin kaye cikii miinikotc ci⁠onihsitohtamowinitc.

¹⁸ Ahpii tahsh wiin kii⁠tehsininkwiihtaatc e⁠maaciipahtootc, mii hsa 'i eshi paahpi'aatc mihtatimoon, pemiwanepa'ikonitc kaye ehpiihci kishiipahtootc.”

¹⁹ “Kiin ina kaakii ishi'atc mihtatim ci⁠mashkawisiitc, kaakii ishi'atc kaye ci⁠minonaakwaninik omiihshikwekanaan?

²⁰ Kiin ina kaa⁠ishi'atc ci‑ishpi kwaashkwanitc taapishkoo pahpahkinek, wenci sekimaatc ininiwan kii⁠matwe shankwane noontaakositc?

²¹ Wencitoo piko kaashkaashkipicike ahkiink kaashi waanatinaanik, onci minwentam kaye e⁠mashkawisiitc; ehpiihciitc hsa ishi moohkiihcike entashi miikaatiwintc.

²² Omihci paahpihtoon hsa kohtaaciwin, e⁠kihkentansik kohtaaciwin kaa'icikaatenik; kaawiin kaye pashipa'ikewihkomaan oshaakootaama'okohsiin.

²³ Miikaasowi aapacihcikanan pemiwitoonitc pemiwanaanaatc hsa shinawaapihkihsininiwan, saasaakaahteyaapihkihseniwan kaye eshi saakaahtenik.

²⁴ Kaawiin hsa koshkwaawaaci'ayaahsii ehpiihci anamentank, kaawiin okashkihtoohsiin ci⁠koshkwaawaacikaapawitc ahpii e⁠noontaakwaninik pootaacikan.

²⁵ E⁠noontaakwaninik itahsh pootaacikan, mii 'i eshi matwe shaankwane noontaakositc e⁠inihtaakositc, ‘Haw’; waahsa otoonci minaantaan entashi miikaatiwintc, otepihtawaa' kaye shimaakanihshiiwikimaa' e⁠shaakowenitc, e⁠inihtaakwaninik kii⁠miikaatiwintc.”

²⁶ “Kiin ina mikisi wenci kihkentank ci⁠nihtaa pimihsetc, ahpii shaawanonk inahke kii‑ishi ninkwiikanenitc?

²⁷ Kiin ina eh⁠kanoonatc mikisi ishpimink kaa⁠onci pimaasimoonotc, wenci oshihtootc kaye owasihson kaa⁠ishi ishpatinaanik?

²⁸ Weti hsa eshi ishpaapihkaanik ishitaa, mii kaye weti eyaatc eh⁠tipihkaninik, eshi kaahcitaapihkaanik eshi soonkaninik.

²⁹ Mii hsa weti wensaapantank ke⁠miicitc; waahsa e⁠onci na'aapantank ke⁠nihtootc.

³⁰ Oniicaanihsa' hsa kaye omiicini miskwiini; eyaanik hsa kekoon e⁠nihcikaatenik, mii hsa i'imaa eyaatc,” okii'ikoon Coop Kishemanitoon.