Coop 38 - Ojibwe Kihcimasina'ikan

KaaTipenciketc Kiinahkwehtawaatc Coopan

¹ Coop (Job) tahsh kaaTipencikenitc kihci ishiwepanonk okii onci kanoonikoon,

² “Awenen hsa 'a kaa⁠nakaashkawitc o'o kaashi waawiintamaakewak ci‑ishihcikenaaniwaninik e⁠aapacihtootc ishikiishwewinan kekoon kaa⁠inwaatehsininikin.

³ Taka ininiiwentaakosin ci⁠niipawiyan; ci⁠nahkwehtawiyan aaniin eshi kakweciminaan.

⁴ Aaniinti kiin kaa‑ayaayan kii⁠oshihtooyaan o'o ahki kaashi ahtek. Wiintamawihshin tahsh kiin kekoon kaa⁠kihkentaman.

⁵ Awenen tahsh kaa⁠onentank aaniin ke⁠inikohkwaanik o'o ahki? Awenen tahsh kaye kaah⁠tipaapiikinank, kiin iitok kekoon kikihkentaan.

⁶ Aanti tahsh wenci kihciwihshinoowaatc iki ahswaahkwa'ikanak o'o ahki kaashi ahtek? Awenen tahsh kaa⁠onaapihkihshimaatc ini ahsiniin kiihkeyaapihkahsiniin?

⁷ I'i ahpii kii⁠piitaapank wanankohshak kii⁠maamawi nikamowaatc, kahkina kaye kihcikiishiko awiyak kii⁠shaakowewaatc kaa‑ahpiihci minwentamowaatc?”

⁸ “Awenen tahsh kaah⁠kipa'ankipan kihci ishkwaanteman awahshime kihcikamiiwinipi cipi ocihcipiihsininok ahpii anaamink ahkiink kii⁠onciciwankipan nipi?

⁹ Niin ohsha kaakii oshihtooyaan wahkwiin ke⁠aakawakootekin i'imaa kihcikamiink, kaashi kashkiitipihkahk tahsh kaye ninkii ishi kashkiikinaan.

¹⁰ Niin kaye ninkii onahtoon aanti ke⁠ahko nipiihkaak i'i kihcikam.

¹¹ Miihsh kaa'itamaan kihcikam, ‘Mii 'owe minihk kepi ahkopiiyan, kaawiin awahshime o'omaa nahke kika piishaahsii. Mii 'omaa e⁠mashkawaahshkaayan keshi kipihciiyan.’

¹² Coop (Job), wiihkaa na minihk kaakii pimaatisiyan kikanootaan kaa⁠kishepaawakahk? Kaa⁠piitaapank kaye aanti eshi tipentaakwahk?

¹³ Wiihkaa na kikanootaan kaa⁠piitaapank ci⁠otihtinank ahkiini? Ci⁠wahkawiwepinank ahkiini ci⁠mohshe wepinintwaa omacitootamook aanti eshi kaasowaatc?

¹⁴ Saakaahtenk ohsa kaa⁠onci na'inaakwahk aanti eshi papiihkwatinaak, aanti kaye eshi papahsatinaak taapishkoo ishiikin kaa⁠piskiikinikaatek, e⁠ishi pakahkinaakwahk taapishkoo waapikanihkaank kaashi mansinihcikaatek kaa⁠kihci inentaakwahk.

¹⁵ Kii⁠waaseyaanik eh⁠kiishikaninik ohsha onsaam owaahseyentaanaawaa mecaatisiwaatc, owanahshkwe'ikoonaawaa awahshime noociko aana wii ishihcikewaatc.”

¹⁶ “Wiihkaa na kikii pi ayaa wenci maaciiciwank kihcikam? Wiihkaa na kaye kitonci pimohse ahshiciintim.

¹⁷ Awiya na wiihkaa kipi waapanta'ik eshi ishkwaantemiwank nipowin? Wiihkaa na kipi waapantaan kaashi akawaahtehsink nipowin?

¹⁸ Konike wiihkaa kitaa tepi kihkentaan enikohkwaak o'o ahki? Wiintamawihshin kiishpin kihkentaman!”

¹⁹ “Kikihkentaan ina aanti wenciimakahk kaa⁠waahseyaak? Aanti kaye wenciimakahk kaa⁠kashkiitipihkahk?

²⁰ Kitaa waapanta'aahtoonan ina aaniin minihk ke⁠ishaamakahkipanen? Kitaa kashkihtoon ina ci⁠kiiwenisha'amampan?

²¹ Kehcinaac maawiin kitaa kashkihtoon, aaniihsh kitahkiwensiiw, aasha kaye kikii ayaanaatok ahki kii⁠oshihcikaatekipan.”

²² “Wiihkaa na kipiintike nintahtaahsowikamikoon, eshi kanawenimak koon, sehsekanan kaye?

²³ Mii iitok keshi kwayaanciiyaan ahpii wahsitaawihsenaaniwank, ishi kiishikahk ci⁠miikaatinaaniwank, kaye tahsh otihtinitinaaniwank.

²⁴ Wiihkaa na kipi ayaa wenci moohka'ank kiisihs kaa⁠onci siswe'aahtek? Weti kaye pemi onciik i'i kaa⁠waapaninoowek?”

²⁵ “Awenen itahsh kaa⁠inaanihketc inahke keshi kimiwaninik? Awenen kaye kaa⁠ishi miihkanaahciketc keshi pinesiiwaninik?

²⁶ Awenen itahsh kaa⁠kimiwanohketc awiyan eshi'ayaahsinik, eshi paahtenik kaye ahkiini?

²⁷ Awenen itahsh ke⁠tihpapaawatootc o'o wiinke kaa⁠paahtenik ahki, ci⁠onci mino nihtaawikininikin mashkohsiin?

²⁸ Otetemiimakan ina kaa⁠kimiwank? Awenehsh kaakii nihtaawikihtootc kaa⁠shahki'ayaak?

²⁹ Kaanaka awekwenan mihkwam wemaamaakwen? Awenehsh kaakii nihtaawikihtootc kaa⁠ninkiikwatink?

³⁰ Awenen itahsh kaa⁠tootank nipi kaa⁠onci mashkawaahkwatink, kaye kaa⁠onci kashkatink kihcikam?”

³¹ “Awenen itahsh ke⁠kashkihtoohpan ci⁠maamawahpinaatc kaa⁠ohkwakoocinowaatc ninkotwaahso wanankohsha' Palii'atiis (Pleiades) enimintc? Awenen itahsh ke⁠aapa'waahpan eshi ohkwahpisonitc wanankohsha' Oraayan (Orion) kaa‑antawencikenitc enimintc?

³² Kitaa kashki'aak ina wanankohshak ci⁠onakoonatwaapan eshi pepahkaanihsek peshiko pipoon? Ci⁠akoonatwaapan kaye wanankohshak kihci niimaahko minihkwaakanink enakoocinowaatc, niimaahko minihkwaakanensink kaye enakoocinowaatc.

³³ Kikihkentaan ina eshi anohkiimakahk kiishik? Kitaa kashkihtoon ina i'i peshikwan ci‑ishihsekipan o'omaa ahkiink, taapishkoo kaashi anohkiimakahk kiishik?”

³⁴ “Kitaa kashkihtoon ina ci⁠kanootamampan wahkwiin, ci⁠wiintamampan aanti keshi kimiwanohkemakahkipanen?

³⁵ Kiin ina kaa⁠onentaman aaniinti kenishi waahtehsek? Mii na'i ke'ikoyan, ‘Aasha omaa nintayaamin ewiih tootamaank ehkitoyan’?

³⁶ Awenen itahsh kaa⁠ishihtootc ote'imaa ci⁠kakiihtaawentamoomakaninik? Awenen kaa⁠ishihtootc naakatawencikan ci⁠nihsitohtamoomakaninik.

³⁷ Awenen itahsh kete kakiihtaawentankipan ci⁠kashkihtoohpan ci⁠akintank wahkwiin? Awenen kaye ke⁠ohpimenankipan wahkwiin ke⁠onci kimiwaninikipan,

³⁸ kimiwaninik keni onci mashkawaanik paashkinehkamik ci⁠papiihkwaahkwatwaanik.”

³⁹ “Kikakwe mihkamowaan ina ke⁠miiciwaatc mihshipishiwak, ci⁠tewiihsiniwaatc mihshipishiinhsak,

⁴⁰ ahpii kota kii⁠kaasowaatc owaashiwaank, kii⁠ahkantoowaatc kaye eshi saki'ayaanik?

⁴¹ Awenen itahsh ehshamaatc kaakaakiwa' kii⁠papaami ayaanitc e⁠noontehskatenitc, kaakaakiwensak kii⁠kanooshiwaatc ewii wiihsiniwaatc?” ihkito kaaTipenciketc.