Coop 3 - Ojibwe Kihcimasina'ikan

Coop Kaakii'ishiminciinawesitc

¹ Kekahpii tahsh Coop (Job) kii⁠onci maacii kakito, ekii maci'itank ahpii eh⁠kiishikaninik kaakii nihtaawikikopanen.

² Mii hsa 'oweni kaa⁠ihkitotc,

³ “Taka ta⁠waniihkenote ahpii eh⁠kiishikahk kaakii nihtaawikiyaan, i'i kaye eh⁠tipihkahk kii‑ihkitonaaniwanikopanen, ‘Kwiiwisenhs hsa kii⁠nihtaawiki.’

⁴ I'iwe kaakiih kiishikanokopanen taka ta⁠kashkiitipihkihcikaate, taka kaye Kishemanitoo ishpimink kaa‑ayaatc kaawiin oka papaapisiskentansiin. Taka kaye kaawiin ta⁠waahseyaahsinoon.

⁵ Taka kaye i'i ahpii eh⁠kiishikahk kaakii nihtaawikiwaampaanen ta⁠kashkiitipihkan, wiinke ta⁠siipihskaatentaakwan, taka kaye wawiinke ta⁠ninkwahkwan, taka kaye kaa⁠kashkiitipihkahk oka shaakoocishkaan kaa⁠waahseyaanik.

⁶ I'i tahsh eh⁠tipihkahk ahpii kaakii nihtaawikiwaampaanen, taka i'imaa kaashi kashkiitipihkahk tashi wanihse. Taka kaye kaawiin ta⁠takwakintehsinoon i'imaa kaashi takwakintekin minihk ini kaa⁠tipihkahkin peshikopipoon. Taka kaye kaawiin i'imaa entahsokiisihsonk tashi takwakintehsinoon.

⁷ I'i hsa eh⁠tipihkahk kaakii nihtaawikiwaampaanen, taka wiinke ta⁠manshashkwaawentaakwan, taka kaye kaawiin ta⁠minwentamowansinaaniwan.

⁸ Taka iki kaa⁠mamaantaawisiwaatc oka maci'itaanaawaa i'i eh⁠kiishikaninik kaakii nihtaawikiwaampaanen. Ikiweniwak kaa⁠kashki'aawaatc kihci ohkaatiikinepikoon e⁠waahkawi'aawaatc.

⁹ Taka kaye kishepaa wanankohshak kaawiin ta⁠saakaahsikehsiiwak, kaawiin kaye ta⁠nehpici piitaapansinoon. Taka kaye kaawiin i'i kaa⁠tipihkahk tawii piitaapahsinoon.

¹⁰ Taka ta⁠maci'icikaate kaakiih tipihkanokopanen kii⁠nihtaawikiwaampaanen. Mii iitok i'i ahpii kaakii ishi mohshenikoowaampaanen kaashi ayaak maanshihsewin, maanentamowin kaye.

¹¹ Ampehsh inaa piincaya'ii nimaamaa omihsataank ishi nipoyaampaan, komaa kaye kii⁠nihtaawikiyaan ishi nipoyaampaan.

¹² Kaanaka wekotokwenini nimaamaa kaa⁠onci nihtaawiki'ikopanen, wekotokwenini kaye kaa⁠onci nooni'ikopanen.

¹³ Kiishpin hsa i'i ahpii ishi nipoyaampaan, inashke aasha o'o ishi ahpii nintaakiih pimihshin, kaawiin nintaakii noontaatihsii. Cikii nanipaayaampaan, cikii ayanwehshinaampaan itahsh kaye.

¹⁴ Nintaakii wiitaahkohshinoomaak kaakii kihciokimaawiwaahpan, iki kaye kaakii maamiinomiwewaatc o'omaa ahkiink, ikiweniwak kaye kaakii nihtaa oshihtamaasowaatc kaakiih piikoshkaanikin kihci ishi maaciiwinan.

¹⁵ Komaa kaye iki nintaakii wiitaahkohshinoomaak kaawii ani kihciokimaawiwaahpan kaakii ayaawaawaatc osaawi shooniyaan, kaakii mooshkina'aawaatc waapaapihko shooniyaan owaahkaa'ikaniwaank.

¹⁶ Komaahsh kaye nintaakii ishinaakos apinoonciishak tino kaa⁠pimaatisihsikwaa kaa⁠saakitaahpinewaatc apinoonciishak wiihkaa kaa⁠waapantansikwaa kaa⁠waahseyaanik.

¹⁷ Weti hsa kaashi ayaawaatc kaa⁠nipowaatc, mii hsa 'i weti omacaatisiik keshi pooni macitootaakewaatc, mii kaye weti kaa‑ayehkosiwaatc keshi anwepiwaatc.

¹⁸ Mii hsa kaye weti tahkonikanak kaa⁠minwentamowaatc, kaawiin kaye awahshime onoontawaahsiwaawaa' kaa⁠tahkonikowaatc ci⁠kihci kanoonikowaatc.

¹⁹ Mii hsa kaye weti eyaawaatc kaa⁠kihci inentaakosiwaatc, iki kaye kaa⁠kihci inentaakosihsikwaa. Iki hsa kaye kaa⁠kakwaatakanohkii'intwaa kaawiin miinawaa otipenimikohsiiwaa' otookimaamiwaa'.

²⁰ Wekonenini tahsh maano ininiwak wenci miinintwaa pimaatisiwin kiih⁠kakwaataki pimaatisiwaatc? Iki tahsh kaye wenci miinintwaa pimaatisiwin kaa⁠kakwaatakihtoowaatc otahcaahkowaank?

²¹ Iki tahsh kaa‑antawentamowaatc ci⁠nipowaatc, kaawiin hsa nipohsiiwak, nawac e⁠antone'amowaatc nipowin, ahpiihc wiin wenootisiwin.

²² Paanimaa hsa kii⁠nipowaatc kii‑ishkwaa ninkwa'ontwaa mii hsa 'i payesh ci⁠minwentamowaatc.

²³ Wekonenini tahsh wenci miinintc pimaatisiwin a'a inini kaa⁠kihkenimaahsiwintc aanti inahke eshi maaciishkaatc, Kishemanitoon kaa⁠waahkaashkaakotc?

²⁴ Cikii wiihsiniyaampaan itahsh, meshkwac ihsa ninkiih moohkone, taapishkoo nipi kaa⁠pimiciwank mii 'i eshinaakwahk kii⁠mawiyaan.

²⁵ I'i hsa kaakiih kohtamaampaan ninkii otihsikoon, i'i kaye kaakiih kakwaanihsakentamaampaan, mii 'i kaa⁠ishi'ayaayan.

²⁶ Kaawiin hsa pisaan nintayaahsii, kaawiin kaye ninkoskwaawaatentansii. Kaawiin kaye nintayaahsiin anwepiwin, miiyehtako wahsitaawihsewin eyaayaan,” kii‑ihkito Coop.