ᑲᓬᐋᔑᔭᓇᒃ 2 - Ojibwe Kihcimasina'ikan

¹ Taka kiwii'wiintamawininim aaniin ehpiihcikihci⁠anohkiiyaan kiinawaa onci, iki kaye otepwehtamook Leyaatihsiiyaank (Laodicea) kaa‑ayaawaatc, iki kaye kahkina tipinawe mahshi kaawaapamihsikwaa.

² Miitahsh o'o kaaonci‑ishihcikeyaan kewiinawaa tahsh cimashkawentamowaatc ote'iwaank, maano kaye kahkina cimaamawi⁠wiici'itiwaatc ehsaaki'itiwaatc. Miitahsh kaye wiinke nihsitohtamowaatc cionci⁠wenoocihtoowaatc kehcinaa'owin. Miitahsh kewiinawaa cionci⁠kihkentamowaatc Kishemanitoon otinentamowinini otaanaank kaakihkencikaatehsininik, mii hsa iitok a'a Christ wiin iko kaatashimintc.

³ Wiin iitok Christ kaapiniskonank cikihkencikaatenik Kishemanitoon kaawenootaninik okakiihtaawentamowinini, okihkentamaawinini kaye.

⁴ Kiwiintamawininim itahsh, keko pakitinaahkek awiya ciwaniminek ahpii kakweshaakoosominek, aanawiin wiinke maminokiishwetc.

⁵ Aanawiin e'wiiciiwihsinowinakook niwiiyawink weti kaaishiayaayek, shaakooc itahsh kiwiiciiwininim nintinentamowinink. Aahpici kaye niminwentam e'waapantamaan e'mashkawikaapawiyek ehtepwehtawek Christ.

Wenootanini awiya opimaatisiwin e'wiiciiwaatc Christan

⁶ Aasha tahsh ekii'otaahpinek Christ Ciisahs citipeniminek, ishipimohsewaahk itahsh Christ otinaatisiwinink, aaniihsh kiwiiciiwaawaa.

⁷ Taapishkoo tahsh watapiin waahsa kaakotaawikihkin ahkiink, mii hsa tahsh kekiinawaa peshikwan ishikotaawikik i'imaa Christ opimaatisiwinink. Taapishkoo kaye waahkaa'ikan kaaompahkicikaatek, mii kaye ishiompahkihtook kipimaatisiwiniwaan i'imaa Christink, cinimashkawaakin kaye kitepwehtamowiniwaan, kaakii'ishikihkino'amaakooyek. Cimooshkineshkaakoyek kaye miikwehciwentamowin.

⁸ Ayaankwaamisik inkoci ci‑ishiwinihsinowinek cimamaancikwahpinikohsiwek ewiihtipeniminek awiya. Aaniihsh ayaawak ininiwak kehkino'ikewaatc ininiiwi⁠kihkino'ikewinan kekoon kaa‑ahpiihtentaakwahsininikin. Weti tahsh waahsa otaanaank otoontinaanaawaan ininiinaank kaapikihkino'ikaatenikin e'ishikihkino'ikewaatc, e'ontinamowaatc kaye ahcaahkwa' o'omaa ahkiink kaaishitipencikenitc, kaawiin tahsh wiin Christan kaaishikihkino'ikenitc.

⁹ Christ tahsh e'ininiiwaatisitc owiiyawi, kahkina hsa Kishemanitoon otinaatisiwinini okecishki⁠kikishkaakon.

¹⁰ Kiinawaa tahsh e'wiiciiwek Christ, mii hsa i'imaa kaaonci⁠mooshkineshkaakowek wenooci⁠pimaatisiwin; wiin aaniihsh kahkina oniikaanishkawaa' kahkina kaa‑ahcaahkwentaakosinitc kaaokimaawinitc, kaakashki'ewisinitc kaye.

¹¹ E'wiiciiwek tahsh Christ, mii 'i kaaishinaakosiyek e'ayaayek kihkinawaatashakeshokoowin, kaawiin wiin inini kaaishikihkinawaatashakeshowetc, i'i hsa Christ kaaishikihkinawaaci'iwetc. Mii hsa eshihseyek ekiihshiikoshkamek kaakii'nihtaamaci‑ishicikemakahk kehteinaatisiwin.

¹² Ahpii hsa kiihsiika'antaakooyek mii 'i kiiwiicininkwa'okoomek Christ, mii 'imaa kaye kaa'ishiwiici⁠kiiwepimaatisiimek. Aaniihsh kikiihtepwehtamowaam Kishemanitoo omashkawisiiwin ekiihkiiwepimaatisi'aatc Christan kaakii'niponitc.

¹³ Kiinawaa tahsh aapitink kikiinipowakinsom, aaniihsh macitootamowin kikiihkikishkaakom, kikiihtinowim kaye kaakihkinawaatashakeshwaahsiwintwaa ekii'ayaahsiwek Kishemanitoo otOonahshowewin. Noonkom itahsh Kishemanitoo kikiihtakopimaatisi'ikowaa kaaishipimaatisinitc Christan, ekiihpoonentamawinank kahkina kimacitootamowininaanin.

¹⁴ Kishemanitoo tahsh kaye kikiihkaahsii'amaakonaan kahkina kaaishioshipii'ikaatekin ini kaakiihpwaanawihtooyank Onahshowewin kekiihkanawentamankipan, mii 'iweni kaakii'akosaka'ank i'imaa aashiteyaahtikonk.

¹⁵ Christ itahsh kiinipotc i'imaa aashiteyaahtikonk, kahkina okii'mashashkonamawaa' i'i omashkawisiiwinini kaa‑ahcaahkwentaakosinit kaaokimaawinitc ini kaye kaakashki'ewisinitc. Miitahsh kaa'ishihciketc, ekiihpimiwinaatc i'i kaakiihshaakooci'aatc piniskwe piko ciwaapancikaniwinitc.

¹⁶ Keko tahsh pakitinaahkek awiya cionentamawinek wekonen ini tino miicim kemiiciyek, wekonen ini kaye keminihkweyek, aaniin kaye keishihcikewek ahpii anami'ehkamikaninik. Keko kaye pakitinaahkek awiya cionentamawinek aaniin keishihcikewek kaanihtaa⁠inahkamikisiyek kiioshkiakoocink tipihkikiisihs, kiiAnwepiiwi kiishikaninikin kaye.

¹⁷ Ini hsa inaahkonikewinan, mii hsa ehta niiyaak ehkakwenaapinaakwahkin aaniin piciinak mayaa kaawii'naakwahkin. Christ itahsh wiin a'a mayaa kaa‑aawitc.

¹⁸ Keko tahsh pakitinaahkek awiya ciotahpinamawinek i'i kaawiihtipa'amaakooyek. Aaniihsh ayaawak ininiwak keoncina'enintisowaatc ehkakwaataki'itisowaatc citapahsinaakosiwaatc, e'anami'ehtawaawaatc kaye encala'. Wa'a tino otahpenimonotaan kaye otishinamowinan, anihshaa i'i kaaoncikihtenimotc i'i nahke ininiinaank e'ishinaanaakatawentamowaatc.

¹⁹ A'a tino inini kaawiin kaye keyaapi omincimenimaahsiin Christan, kaaohtikwaanishkaminitc wiiyawimaa, otepwehtamook kaainintwaa. Christ tahsh ehtipentank oncipimaatisiimakanini i'i wiiyawimaa, miitahsh i'imaa kaaishi⁠ayaanihkawikanenk, kaaishi⁠ociihtateyaapiink kaye wencimincimishkaak, e'oncimaaciikininik Kishemanitoon kaaishi⁠antawentaminitc.

E'wiicinipoomintc, e'wiicipimaatisiimintc kaye Christ

²⁰ Kiinawaa itahsh wiin, kikii'wiicinipoomaawaa Christ, kaaonci⁠tipenimihsinowinekwaa iki ahcaahkwak kaaokimaahkantamowaatc kekoonan kaaoshihcikaatenikin kiishikonk 'omaa kaye ahkiink. Wekonen itahsh wenci‑ishipimaatisiyek taapishkoo o'omaa ahkiink keyaapi e'oncitipentaakosiyek? Wekonen kaye keyaapi wencina'ihtamek ono tino inaahkonikewinan:

²¹ “Keko papaamentanken o'o,” “Keko kocihpitanken i'i,” “Keko kaye 'i pahkaan kekoon saaminanken!” kaaihkitoomakahkin.

²² Ono tahsh kahkina kaatashintekin i'imaa inaahkonikewinink, kaaonci'ikooyek cipimentansiwek, aapitink iko kiiaapacihcikaatekin, mii 'i eshipoonihsekin. Ono tahsh inaahkonikewinan, kihkino'ikewinan kaye, ininiinaank onciimakanoon.

²³ Aahpici tahsh ini okihkino'ikewiniwaan kakiihtaawinaakwaniniwan, miitahsh ehkakaansomiwewaatc encala' cianami'ehtawimintc, ehkakwetapahsinaakosiwaatc, ehkakwaataki'itisowaatc kaye owiiyawiwaank. Kaawiin itahsh wiin ono inaahkonikewinan okaoncikashkihtoohsiin awiya cipoonihtootc omacimihsawencikewinan.